ព្រះសង្ឃ តាជី យាយជី សិស្ស-និស្សិត និងពលរដ្ឋ កំពុងធ្វើចត្តាឡីស័កនៅវត្តស្ទឹងមានជ័យ បានទទួលអំណោយរដ្ឋ
- ភ្នំពេញ
រាជធានីភ្នំពេញ ៖ កាលពីវេលាម៉ោង៧និង៣០នាទីព្រឹក ថ្ងៃទី១៨ ខែមិថុនា ឆ្នាំ២០២១នេះ លោក នួន ផារ័ត្ន អភិបាលរង…
រាជធានីភ្នំពេញ ៖ កាលពីវេលាម៉ោង៧និង៣០នាទីព្រឹក ថ្ងៃទី១៨ ខែមិថុនា ឆ្នាំ២០២១នេះ លោក នួន ផារ័ត្ន អភិបាលរង…
រាជធានីភ្នំពេញ ៖ កាលពីវេលាម៉ោង៧និង៣០នាទីព្រឹក ថ្ងៃទី១៨ ខែមិថុនា ឆ្នាំ២០២១នេះ លោក នួន ផារ័ត្ន អភិបាលរង រាជធានីភ្នំពេញ អមដំណើរដោយលោក ឌី រ័ត្នខេមរុណ អភិបាលរងខណ្ឌមានជ័យ បានអញ្ជើញចុះសួរសុខទុក្ខ និងនាំយកទេយ្យទាន មកប្រគេនព្រះសង្ឃ និងចែកជូនប្រជាពលរដ្ឋសរុបចំនួន៣៣៤អង្គ/នាក់ ដែលជាអំណោយដ៍ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រគេនជូនព្រះសង្ឃ និងចែកជូនតាជី យាយជី សិស្ស និស្សិត និងប្រជាពលរដ្ឋ ដែលកំពុងធ្វើចត្តាឡីស័កនៅវត្តចង្ក្រានតាព្រតាព្រហ្ម (ហៅវត្តស្ទឹងមានជ័យ) ស្ថិតក្នុងខណ្ឌមានជ័យ រាជធានីភ្នំពេញ ។
អំណោយជាទេយ្យទានដែលប្រគេនព្រះសង្ឃ និងចែកជូនតាជី យាយជី សិស្ស និស្សិត ស្នាក់នៅក្នុងវត្ត និងប្រជាពលរដ្ឋ រួមមាន ៖ អង្ករ២តោន មី៣០កេសតូច ទឹកត្រី ១០យួរ ទឹកស៊ីអ៊ីវ ១០យួរ ទឹកសុទ្ធ ៣០កេស ត្រីខ ៥កេស ដើម្បីសម្រួលដល់ចង្ហាន់ និងជីវភាពប្រចាំថ្ងៃផងដែរ ។
ក្នុងឱកាសនេះដែរ លោកអភិបាលរងរាជធានី បានពាំនាំនូវការផ្តាំផ្ញើរសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេចទាំងទ្វេ តែងតែយកចិត្តទុកដាក់ គិតគូពីសុខទុក្ខបងប្អូនប្រជាពលរដ្ឋ តាជី យាយជី សិស្ស និស្សិត ក៏ដូចជាព្រះសង្ឃតាមទីវត្តអារាមនានាក្នុងព្រះរាជាណាចក្រកម្ពុជា ។ សម្ដេចទាំងទ្វេ បានយកចិត្តទុកដាក់ណាស់ ចំពោះបងប្អូនប្រជាពលរដ្ឋកម្ពុជាទាំងមូល ជាពិសេសតាជី យាយជី សិស្ស និស្សិត និងព្រះសង្ឃ ដែលកំពុងធ្វើចត្តាឡីស័កនាពេលនេះ ។
លោកអភិបាលរង រាជធានីភ្នំពេញ បានជូនពរចំពោះព្រះសង្ឃ សិស្ស-និស្សិត តាជី យាយជី ប្រជាពលរដ្ឋ ដែលធ្វើតេស្តកាលពីម្សិលម៉ិញ ជាលទ្ធផលរកឃើញវិជ្ជមានមេរោគ កូវីដ-១៩ អោយបានឆាប់ជាសះស្បើយ ។
សូមរំលឹកថា កាលពីថ្ងៃទី១៧ មិថុនា ក្រុមគ្រូពេទ្យបានចុះមកធ្វើតេស្តនៅវត្តចង្ក្រានតាព្រហ្ម ហៅវត្តស្ទឹងមានជ័យ ទៅលើព្រះសង្ឃ តាជី យាយជី សិស្ស និស្សិត និងប្រជាពលរដ្ឋសរុបចំនួ ៣៧៣អង្គ/នាក់ បានរកឃើញករណីវិជ្ជមានសរុប៣៩អង្គ/នាក់ ។
លោកអភិបាលរង បានអំពាវនាវដល់បងប្អូនប្រជាពលរដ្ឋ តាជី យាយជី សិស្ស និស្សិត និងព្រះសង្ឃ ដែលកំពុងធ្វើចត្តាឡីស័កនាពេលនេះ សូមបន្តអនុវត្តតាមវិធានការក្រសួងសុខាភិបាល និងអនុវត្តនូវវិធាការ ៣កុំ ៣ការពារ របស់រាជរដ្ឋាភិបាល អោយបានខ្ជាប់ខ្ជួន ៕
ចែករំលែកព័តមាននេះ