ខេត្តសៀមរាប ៖ នៅយប់ថ្ងៃទី១៧ ខែមិថុនា ឆ្នាំ២០២១នេះ រដ្ឋបាលខេត្តសៀមរាប បានប្រកាសរកឃើញអ្នកវិជ្ជមានជំងឺកូវីដ-១៩ ថ្មី ចំនួន២៦នាក់ សម្រាប់ថ្ងៃទី១៧ ខែមិថុនានេះ ក្នុងនោះអ្នកមកពីប្រទេសថៃចំនួន៤នាក់ និងមកពីខេត្តផ្សេងចំនួន០១នាក់ រួមមាន ៖ ១- ស្រុកសូទ្រនិគម ចំនួន០៨នាក់ , ស្រុកជីក្រែង ចំនួន០៦នាក់, ក្រុងសៀមរាប ចំនួន០៦នាក់ , ស្រុកអង្គរជុំ ចំនួន០២នាក់ , ស្រុកក្រឡាញ់ ចំនួន០២នាក់ , ស្រុកប្រាសាទបាគង ចំនួន០១នាក់ និង ក្រុងប៉ោយប៉ែត ខេត្តបន្ទាយមានជ័យចំនួន០១នាក់ ។
សូមបញ្ជាក់ថា អ្នកវិជ្ជមានជំងឺកូវីដ-១៩ ពីលេខរៀងទី០១ ដល់លេខរៀងទី១៥ ជាករណីឆ្លងរាលដាលជំងឺកូវីដ-១៩ ក្នុងសហគមន៍ ដែលមានពាក់ព័ន្ធដោយផ្ទាល់ និងប្រយោល នឹងប្រភពមកដើមពីស្រុកជីក្រែង។ ចំណែកអ្នកវិជ្ជមានជំងឺកូវីដ-១៩ ពីលេខរៀងទី១៦ ដល់លេខរៀងទី២១ គឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ។ រីឯអ្នកវិជ្ជមានជំងឺកូវីដ-១៩ លេខរៀងទី២២ ជាករណីមករកសេវាព្យាបាលនៅមន្ទីរពេទ្យព្រះបាទជ័យវរ្ម័នទី៧ ដោយមានអាការៈសង្ស័យ ក្រុមគ្រូពេទ្យក៏បានយកសំណាកស្រាវជ្រាវរកមេរោគកូវីដ-១៩ ទទួលបានលទ្ធផលវិជ្ជមាន និងអ្នកវិជ្ជមានជំងឺកូវីដ-១៩ ពីលេខរៀងទី២៣ ដល់ករណីទី២៦ គឺជាប្រជាពលរដ្ឋដែលត្រឡប់មកពីប្រទេសថៃ លុះមកដល់ខេត្តសៀមរាប ហើយជាករណីសង្ស័យ ត្រូវបានក្រុមគ្រូពេទ្យដាក់ឱ្យធ្វើចត្តាឡីស័កនៅវិទ្យាល័យសម្ដេចឪ និង វិទ្យាល័យវត្តស្វាយ ។
នៅក្នុងថ្ងៃទី១៧ ខែមិថុនានេះដែរ ក៏មានអ្នកជាសះស្បើយពីជំងឺកូវីដ-១៩ ចំនួន១៨នាក់ផងដែរ ហើយត្រូវក្រុមគ្រូពេទ្យអនុញ្ញាតឱ្យចេញពីមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុកសូទ្រនិគម រួចត្រឡប់ទៅលំនៅឋានវិញ ដោយត្រូវបន្តការធ្វើចត្តាឡីស័ករយៈពេល១៤ថ្ងៃ ។
ក្នុងឱកាសនេះដែរ រដ្ឋបាលខេត្តសៀមរាប បានធ្វើការអំពាវនាវដល់បងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ ហើយបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុម ការងារចាត់វិធានការក្នុងការយកសំណាកធ្វើតេស្តស្រាវជ្រាវ ។
គួរបញ្ជាក់ថា ពាក់ព័ន្ធនឹងព្រឹត្តិការណ៍សហគមន៍២០កុម្ភៈ គិតត្រឹមយប់ថ្ងៃទី១៧ ខែមិថុនា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន៥៣៤នាក់ ក្នុងនោះបានព្យាបាលជាសះស្បើយចំនួន១៣៦នាក់, កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក ចំនួន៣៩៤នាក់ និងស្លា.ប់អ្នកវិជ្ជមានជំងឺកូវីដ-១៩ ចំនួន០៤នាក់ហើយ ក្នុងនោះអ្នកស្លា.ប់ចំនួន០២នាក់ គឺជាអ្នកជំងឺខូចតម្រងនោមធ្ងន់ធ្ងរ និង រ៉ាំរ៉ៃ មុននឹងគាត់មានវិជ្ជមានជំងឺកូវីដ-១៩ ចំណែកអ្នកស្លាប់ចំនួន០១នាក់ទៀតដោយសារជំងឺរលាកសួតបង្កដោយមេរោគកូវីដ-១៩ គួបផ្សំនឹងបញ្ហាបេះដូង និងអ្នកស្លាប់ចំនួន០១នាក់ផ្សេងមួយទៀត ជាករណីសាកស.ព ដែលរកឃើញវិជ្ជមានជំងឺកូវីដ-១៩ ៕
ចែករំលែកព័តមាននេះ