កសិករ២ភូមិកាក់កបនឹងរបរលក់ដៃដំឡូងជ្វា ខណៈខ្លះលក់បានជាង១០ម៉ឺនរៀលក្នុង១ថ្ងៃ
- កំពង់ឆ្នាំង
ខេត្តកំពង់ឆ្នាំង ៖ ប្រជាពលរដ្ឋជាអ្នកធ្វើចំការនៅភូមិកំពង់រាំង ឃុំស្វាយជ្រុំ និងភូមិស្ទឹងជ្រៅ ឃុំកំពង់ព្រះគគីរ (ព្រំប្រទល់ជាប់គ្នា
ខេត្តកំពង់ឆ្នាំង ៖ ប្រជាពលរដ្ឋជាអ្នកធ្វើចំការនៅភូមិកំពង់រាំង ឃុំស្វាយជ្រុំ និងភូមិស្ទឹងជ្រៅ ឃុំកំពង់ព្រះគគីរ (ព្រំប្រទល់ជាប់គ្នា) មានក្តីសប្បាយរីករាយ ព្រោះដៃដំឡូងជ្វារបស់ពួកគាត់មានហាងឆេង ទោះបីស្ថិតក្នុងកាលៈទេសៈកំពុងផ្ទុះកូវីដយ៉ាងណាក្តី។ បច្ចុប្បន្នពួកគាត់កំពុងតែមមាញឹកកាត់ដៃដំឡូងលក់ឲ្យអតិថិជនរបស់ពួកគាត់មកពីទីជិត ទីឆ្ងាយ គ្រប់ទិសទី ។
លោក សុខ ធឿន អាយុ 63 ឆ្នាំ ជាកសិករ រស់នៅភូមិស្ទឹងជ្រៅ ឃុំកំពង់ព្រះគគីរ ដែលកំពុងចងដៃដំឡូងជ្វាជាដុំ ដើម្បីរាប់លក់ ទៅឲ្យអតិថិជនរបស់គាត់នាព្រឹកថ្ងៃទី 16 ខែមិថុនា ឆ្នាំ 2021 នេះបានរៀនរាប់ឱ្យដឹងថា កាលពីមួយរយៈមុននេះបន្តិច ដៃដំឡូងជ្វាលក់មិនដាច់នោះទេ គ្មានអ្នកទិញឡើយ ។ ប៉ុន្តែបច្ចុប្បន្នមានអតិថិជនមកកុំម្ម៉ង់ទិញយ៉ាងច្រើន នេះប្រហែលដោយសារតែបញ្ហាកូវីដស្ងប់បន្តិច ឬក៏អាចថាជារដូវធ្លាក់ភ្លៀងមកដល់ផង ក៏មានអតិថិជនមកពីខាងព្រៃខ្មែរ មកពីស្រុកកំពង់ត្រឡាច និងខ្លះទៀតមកពីខេត្តពោធិ៍សាត់ផងដែរ ដោយអតិថិជនទាំងនោះទិញដឹកទាំងគោយន្តត្រឡប់ទៅវិញ ។
កសិករមួយរូបខាងលើបានបន្តថា ចំពោះតម្លៃដៃដំឡូងជ្វានៅទីនេះវិញ គឺដៃដំឡូងជ្វាចំនួន100ទង ឬស្មើនឹងចង១ដុំ លក់បាន 2500រៀល ។ ដោយឡែកសម្រាប់រូបគាត់តែម្នាក់ ក្នុងមួយថ្ងៃគាត់អាចកាត់ដៃដំទ្បូងជ្វា បានពី40 ទៅ50 ដុំ ដែលអាចរកចំណូលបានពី10 ទៅ12ម៉ឺន5ពាន់រៀល ហើយបើយកមកកាត់កង ទៅលើកម្រៃពលកម្ម ការដាក់ជី និងបូមទឹកស្រោច ឃើញថានៅសល់ចំណេញល្មមអាចបង្កើនជីវភាពគ្រួសារបាន ។ ជាមួយនឹងក្តីរីករាយខាងលើនេះ រូបគាត់ក៏សូមអំពាវនាវដល់បងប្អូនប្រជាកសិករ ដែលមានបំណងដាំដំឡូងជ្វា សូមមកទិញដៃដំឡូងពីគាត់ក្នុងតម្លៃសមរម្យ ទោះបីត្រូវការប៉ុណ្ណា ក៏អ្នកភូមិនៅទីនេះ មានលក់ឲ្យដែរ ។
ដោយឡែកបុរសម្នាក់ឈ្មោះ ជា ភាព ជាកសិករមកពីស្រុកក្រគរ ខេត្តពោធិ៍សាត់ ដែលកំពុងតែរៀបចងដៃដំឡូងនៅលើគោយន្តបានបញ្ជាក់ថា គាត់មកទិញដៃដំឡូងនៅទីនេះជារៀងរាល់ឆ្នាំ ក្នុងមួយឆ្នាំមកទិញតែមួយជើងទេ គឺមកអំឡុងពាក់កណ្ដាលខែមិថុនា ។ សម្រាប់ឆ្នាំនេះគាត់ និងបងថ្លៃ ទិញដៃដំឡូងជ្វា ចូលគ្នាសរុបចំនួន150 ដុំ អស់ទឹកប្រាក់37 ម៉ឺន5ពាន់ ដែលអាចយកទៅដាំលើផ្ទៃដី កន្លះហិកតា ក្នុងម្នាក់ ។
ជាចុងក្រោយ បុរសរូបនោះបានបញ្ជាក់ថាដៃដំឡូងជ្វាដែលមកទិញឆ្នាំនេះធំៗល្អណាស់ សង្ឃឹមថា ពេលយកទៅដាំនិងទទួលបានទិន្នផលខ្ពស់ជាពុំខាន៕
ចែករំលែកព័តមាននេះ