ADផ្ទាំងផ្សព្វផ្សាយពាណិជ្ជកម្ម

Picture

ប៉ូលិស Interpol បិទ​គេហទំព័រ​ជាង​១១​ម៉ឺន លក់​ឱសថ​ខុសច្បាប់​តាម​អន​ឡាញ និង​ចាប់ខ្លួន​មនុស្ស ២៧៧​នាក់

1 ខែ មុន

រាជធានី​ភ្នំពេញ ៖ ដោយ​មានការ​សហការ​ពី​បណ្ដា​ប្រទេស​ជុំវិញ​ពិភពលោក​ចំនួន ៩២​ប្រទេស អង្គភាព​ប៉ូលិស​ព្រហ្មទណ្ឌ​អន្តរជាតិ (Interpol) បាន​បើក​យុទ្ធនាការ Operation Pangea XIV…

រាជធានី​ភ្នំពេញ ៖ ដោយ​មានការ​សហការ​ពី​បណ្ដា​ប្រទេស​ជុំវិញ​ពិភពលោក​ចំនួន ៩២​ប្រទេស អង្គភាព​ប៉ូលិស​ព្រហ្មទណ្ឌ​អន្តរជាតិ (Interpol) បាន​បើក​យុទ្ធនាការ Operation Pangea XIV ដើម្បី​បង្ក្រាប​ការ​លក់​ឱសថ និង​បរិក្ខារ​ពេទ្យ​ខុសច្បាប់​អន​ឡាញ ។

បើ​យោង​តាម​នាយកដ្ឋាន​ប្រឆាំង​បទល្មើស​បច្ចេកវិទ្យា ក្រសួងមហាផ្ទៃ កម្ពុជា បានអោយ​ដឹង​នៅ​ថ្ងៃ​ទី​១៥ មិថុនា​នេះ​ថា នៅ​ក្នុង​យុទ្ធនាការ​នេះ ប៉ូលិស Interpol បាន​បិទ ឬ​លុប​ចោល​គេហទំព័រ និង​តំណ​ភ្ជាប់ ចំនួន​ប្រមាណ​ជាង ១១​ម៉ឺន និង​បាន​ចាប់​ឃាត់ខ្លួន​ជនសង្ស័យ ចំនួន ២៧៧​នាក់ ។

ជាង​នេះ​ទៅ​ទៀត ប៉ូលិស​អន្តរជាតិ ក៏​បាន​រឹបអូស​យក​ឱសថ និង​ឧបករណ៍​ក្លែងក្លាយ ដែល​មាន​ចំនួន​ទឹកប្រាក់​ប្រហែល ២៣​លាន​ដុល្លារ ប៉ុន្តែ​អ្វី​ដែល​ធ្វើ​ឲ្យ​ពួក​គេ​មានការ​ភ្ញាក់ផ្អើល​នោះ គឺ​ឧបករណ៍​ក្លែងក្លាយ​ភាគច្រើន គឺជា​ឧបករណ៍​សម្រាប់​ធ្វើ​តេស​ជំងឺ​កូ​វី​ដ​-១៩ ។

ទាំង​ប៉ូលិស Interpol និង​អាជ្ញាធរ​មក​ពី​បណ្ដា​ប្រទេស​ធំ​ៗ ជា​ច្រើន​ទៀត មាន​ដូច​ជា FBI របស់​សហរដ្ឋអាមេរិក តែងតែ​ធ្វើការ​ណែនាំ ឲ្យ​អ្នក​ប្រើប្រាស់​មានការ​ប្រុង​ប្រយ័ត្ន ក្នុង​ករណី​ដែល​ពួក​គេ​មាន​បំណង​ចង់​ទិញ​ឱសថ តាម​រយៈ​អន​ឡាញ ព្រោះ​ឱសថ​ក្លែងក្លាយ អាច​ធ្វើ​ឲ្យ​ប៉ះពាល់​ធ្ងន់ធ្ងរ ដល់​សុខភាព​របស់​អ្នក​ប្រើប្រាស់ ។

លោក​អ្នក​គួរតែ​ទិញ​ឱសថ ពី​ឱសថស្ថាន ដែល​មានការ​អនុញ្ញាត​ត្រឹមត្រូវ និង​សូម​ពិនិត្យ​ពី​គុណភាព​របស់​ឱសថ ឲ្យ​បាន​ច្បាស់លាស់​មុន​នឹង​ចាប់ផ្ដើម​ប្រើប្រាស់ ៕