សហរដ្ឋអាមេរិក ៖ ក្រុមហ៊ុនNOVAVAXប្រកាសកាលពីថ្ងៃទី១៤មិថុនាថា វ៉ាក់សាំងប្រឆាំងវីរុសកូវីដ-១៩ របស់ខ្លួន មានប្រសិទ្ធភាពដល់ជាង៩០% នេះបើតាមទិន្នន័យនានា ដែលទទួលបានក្រោយ ការសាកល្បងគ្លីនិកដំណាក់កាលឈានមុខមួយនៅសហរដ្ឋអាមេរិក។
ការចាក់សាកល្បងវ៉ាក់សាំងនេះ បានធ្វើលើអ្នកស្ម័គ្រចិត្តជិត៣០.០០០នាក់នៅសហរដ្ឋអាមេរិកនិងម៉ិកស៊ិក នាំឲ្យវ៉ាក់សាំងNOVAVAXដើរលើផ្លូវដ៏ល្អ សម្រាប់ស្នើសុំការអនុញ្ញាត ឲ្យប្រើជាបន្ទាន់នៅសហរដ្ឋអាមេរិកនិងនៅកន្លែងផ្សេងៗទៀត នាត្រីមាសទី៣នៃឆ្នាំ២០២១នេះ។ ក្រុមហ៊ុននោះបន្តថា វ៉ាក់សាំងរបស់ខ្លួនផលិតតាមមូលដ្ឋានប្រូតេអីុន បង្ហាញប្រសិទ្ធភាពលើសពី៩៣% ប្រឆាំងវីរុសកូវីដ-១៩ ដែលនាំឲ្យមានការព្រួយបារម្ភ របស់បណ្ដាអ្នកវិទ្យាសាស្ត្រនិងបណ្ដាអ្នកទទួលខុសត្រូវសុខាភិបាលសាធារណៈ។
វ៉ាក់សាំងនេះបង្ហាញប្រសិទ្ធភាព៩១% ចំពោះពួកអ្នកស្ម័គ្រចិត្ត ដែលមានហានីភ័យខ្ពស់នៃការឆ្លងធ្ងន់ធ្ងរ និង១០០%ចំពោះពួកអ្នកស្ម័គ្រចិត្តដែលពុំសូវមានហានីភ័យខ្ពស់នៃការឆ្លង។ វាមានប្រសិទ្ធភាពប្រមាណ៧០% ប្រឆាំង បណ្ដាវីរុសបំប្លែងខ្លួន ដែលNOVAVAXមិនទាន់អាចកំណត់អត្តសញ្ញាណច្បាស់។
ក្រុមហ៊ុននោះអះអាងថា ខ្លួនអាចផលិតវ៉ាក់សាំងនេះ បានដល់១០០លានដូសក្នុង១ខែ រហូតដល់ដំណាច់ត្រីមាសទី៣នៃឆ្នាំ២០២១ និង១៥០លានដូសក្នុង១ខែ ក្នុងត្រីមាសទី៤នៃឆ្នាំនេះដែរ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ