រាជធានីភ្នំពេញ ៖ រឿងហួសចិត្ត និងគួរឲ្យអស់សំណើចមួយបានកើតឡើង ខណៈដែលកម្លាំងគណៈបញ្ជាការខណ្ឌពោធិ៍សែនជ័យបានចុះទៅធ្វើការឡោមព័ទ្ធទីតាំងខារ៉ាអូខេចិនមួយកន្លែងដែលបានបើកដំណើរលួចលាក់ល្មើសបម្រាមរបស់សាលារាជធានីភ្នំពេញ ។ ពេលនោះ បានឃាត់មនុស្សប្រុសស្រីប្រមាណជាង១០០នាក់ដែលភាគច្រើនបំផុត គឺជាជនជាតិចិន កំពុងស្ថិតនៅយ៉ាងពពាក់ពពូនគ្នា…
រាជធានីភ្នំពេញ ៖ រឿងហួសចិត្ត និងគួរឲ្យអស់សំណើចមួយបានកើតឡើង ខណៈដែលកម្លាំងគណៈបញ្ជាការខណ្ឌពោធិ៍សែនជ័យបានចុះទៅធ្វើការឡោមព័ទ្ធទីតាំងខារ៉ាអូខេចិនមួយកន្លែងដែលបានបើកដំណើរលួចលាក់ល្មើសបម្រាមរបស់សាលារាជធានីភ្នំពេញ ។
ពេលនោះ បានឃាត់មនុស្សប្រុសស្រីប្រមាណជាង១០០នាក់ដែលភាគច្រើនបំផុត គឺជាជនជាតិចិន កំពុងស្ថិតនៅយ៉ាងពពាក់ពពូនគ្នា នៅក្នុងទីនោះ ប៉ុន្តែការឃាត់នោះពុំបាននាំយកទៅកាន់សាលាខណ្ឌ ឬក៏អធិការដ្ឋាននគរបាលខណ្ឌពោធិ៍សែនជ័យឡើយ ។ ដោយគ្រាន់តែធ្វើការឡោមព័ទ្ធពីក្រៅ និងពុំអនុញ្ញាតឲ្យពួកនោះចេញក្រៅប៉ុណ្ណោះ ព្រោះតែខ្លាចមានអ្នកផ្ទុកមេរោគCOVID-19 ។ ការឡោមព័ទ្ធបានធ្វើឡើងអស់ពេញ១យប់ លុះព្រឹកឡើងចូលទៅពិនិត្យមើលខាងក្នុងស្រាប់តែម្នាក់ៗស្រឡាំងកាំងរកនិយាយមិនចេញព្រោះមនុស្សនៅក្នុងទីតាំងខារ៉ាអូខេនោះ ប្រមាណជាង១០០នាក់បានបាត់ខ្លួនអស់នៅសល់ តែរថយន្ត និងម៉ូតូប៉ុន្មានគ្រឿងតែប៉ុណ្ណោះ ។
តាមប្រភពព័ត៌មានបានឲ្យដឹងថា ទីតាំងខារ៉ាអូខេចិនខាងលើដែលលួចបើកដំណើរការល្មើសការហាមឃាត់ក្នុងពេលកំពុងផ្ទុះឡើងជម្ងឺ COVID-19នេះ យីហោ«ជីនជន» ស្ថិតនៅតាមមហាវិថីសហព័ន្ធរុស្សី ក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
កាលពីវេលាយប់ថ្ងៃទី១៤ ខែមិថុនា ឆ្នាំ២០២១ បន្ទាប់ពីទទួលបានដំណឹងថា ទីតាំងខារ៉ាអូខេមួយនេះបើកដំណើរការល្មើសបម្រាមសាលារាជធានីភ្នំពេញ កម្លាំងគណៈបញ្ជាការឯកភាពខណ្ឌពោធិ៍សែនជ័យបានចុះទៅធ្វើការបង្ក្រាបភ្លាមៗ ។ ខណៈពេលទៅដល់ធ្វើការពិនិត្យជាបឋមឃើញថា ទីតាំងនេះ កំពុងដំណើរការមែនហើយក៏មានមនុស្សប្រុស ស្រី ប្រមាណជាង១០០នាក់ កំពុងស្ថិតនៅយ៉ាងពពាក់ពពូនដែលភាគច្រើនបំផុត គឺជាជនជាតិចិនតែម្ដង ។
ប្រភពដដែលបានបន្តថា ក្រោយពេលឃើញជាក់ស្ដែងកម្លាំងសមត្ថកិច្ចខាងលើបានឃាត់មនុស្សទាំងអស់នោះ ប៉ុន្តែពុំបានឃាត់នាំយកចេញពីទីតាំងនេះយកទៅកាន់អធិការដ្ឋាននគរបាលខណ្ឌឬនាំទៅកាន់សាលាខណ្ឌឡើយ ព្រោះតែមានការព្រួយបារម្ភអំពីការឆ្លងរាលដាលជម្ងឺCOVID-19 ។ ទើបបានត្រឹមតែឃាត់ឲ្យអ្នកទាំងនោះស្ថិតនៅក្នុងទីតាំងខារ៉ាអូខេនេះ ជាបណ្ដោះអាសន្នសិនរង់ចាំព្រឹកឡើង និងមានវិធានការថ្មី ហើយគ្រាន់តែដាក់កម្លាំងធ្វើការឡោមព័ទ្ធពីខាងក្រៅប៉ុណ្ណោះ ។
ប៉ុន្តែអ្វីដែលជារឿងគួរឲ្យហួសចិត្ត និងចង់សើចនោះការឡោមព័ទ្ធពេញ១យប់ បែរជាអត់ប្រយោជន៍ ព្រោះតែព្រឹកឡើងមានសភាពស្ងាត់ជ្រងំពេក សង្ស័យក៏ចូលទៅពិនិត្យខាងក្នុង ស្រាប់តែនិយាយលែងចេញ ព្រោះមនុស្សនៅក្នុងនោះទាំងអស់បានបាត់ខ្លួនពួកគេបានគាស់ទ្វារ ក្រោយរត់គេចខ្លួនបាត់អស់នៅសល់តែរថយន្តចំនួន៥គ្រឿង និងម៉ូតូ៨គ្រឿងនៅទីនោះ បន្ទាប់មកសមត្ថកិច្ចបានត្រឹមតែដាក់កម្លាំងចាំឃ្លាំមើលបន្តតែប៉ុណ្ណោះ ។
សូមបញ្ជាក់ផងដែរថា នៅវេលាយប់ថ្ងៃដដែលនោះមុន និងឈានដល់ការចុះទៅបង្ក្រាបទីតាំងខារ៉ាអូខេ ជីនជន នេះកម្លាំងសមត្ថកិច្ចខាងលើបាន ចុះបង្ក្រាប ហាងខារ៉ាអូខេមួយយីហោ«ផាត ធី» ដែលមានទីតាំងស្ថិតនៅតាមបណ្ដោយផ្លូវ២០០៤ ក្នុងភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ។
ហាងខារ៉ាអូខេមួយនេះត្រូវបានស្រាវជ្រាវដឹងថា បានល្មើសទៅនិងការហាមឃាត់របស់សាលារាជធានីមិនឲ្យដំណើរការដើម្បីទប់ស្កាត់ការឆ្លងរាលដាលជម្ងឺកូវីដ ហើយក្នុងខណៈនោះកម្លាំងបានឃាត់ខ្លួនបុរសចំនួន១៧នាក់ និងស្ត្រីចំនួន១៦នាក់ នាំទៅចាត់ការតាមច្បាប់ផងដែរ៕
ចែករំលែកព័តមាននេះ