រាជធានីភ្នំពេញ ៖ យ៉ាងហោចណាស់មានអ្នកជំងឺចំនួន ១៤១ នាក់បានទទួលមរណភាពដោយសារតែជំងឺកូវីដ-១៩ ត្រឹមរយៈពេល ២ សប្តាហ៍នៃខែមិថុនា ឆ្នាំ២០២១ ដែលនាំឱ្យកម្ពុជាមានតួលេខអ្នកស្លាប់សរុបឡើងដល់ ៣៦១ នាក់ ចាប់តាំងពីមានការផ្ទុះឡើងនូវព្រឹត្តិការណ៍សហគមន៍ ២០ កុម្ភៈ ។
យោងតាមរបាយការណ៍ចេញជាប្រចាំថ្ងៃរបស់ក្រសួងសុខាភិបាល បានឱ្យដឹងថាចាប់តាំងពីថ្ងៃទី ១ ដល់ថ្ងៃទី ១៤ ខែមិថុនា កម្ពុជាមានអ្នកជំងឺទទួលមរណភាពដោយជំងឹកូវីដ-១៩ មានចំនួនសរុប ១៤១ នាក់ ឆ្លងសរុប ៨,៧៥៤នាក់ (ក្នុងនោះករណីនាំចូលមានចំនួន ៥១៩ នាក់) និងករណីព្យាបាលជាសះស្បើយសរុប ១០,១៨២ នាក់ ។
ចំនួនអ្នកជំងឺស្លា.ប់ដោយកូវីដ-១៩ ហាក់មានចំនួនច្រើនជារៀងរាល់ថ្ងៃនៅក្នុងខែមិថុនា ឆ្នាំ២០២១ ដែលជាធម្យមមានអ្នកជំងឺ ១០នាក់ស្លា.ប់ក្នុងមួយថ្ងៃ ខណៈការឆ្លងជាធម្យមភាគប្រចាំថ្ងៃមានចំនួន ៦២០នាក់ ។
យ៉ាងណាមិញ រយៈពេលចុងក្រោយនេះ ក្រសួងសុខាភិបាលមិនបានបញ្ចេញព័ត៌មានលម្អិតអំពីអត្តសញ្ញាណអ្នកស្លាប់ដោយកូវីដ-១៩ ដូចលើកមុនៗឡើយ តែយ៉ាងណាមិញបើតាមព័ត៌មានពីបណ្តាខេត្តមួយចំនួនបានឱ្យដឹងថា ករណីអ្នកជំងឺស្លាប់ដោយកូវីដ-១៩ មិនមែនមានតែនៅរាជធានីភ្នំពេញ ខេត្តកណ្តាលដូចកាលកំលុងខែមីនា និងខែមេសានោះទេ ។
ជាក់ស្តែងខេត្តកំពត នៅថ្ងៃទី ១៥ មិថុនានេះបានប្រកាសរកឃើញ រកឃើញ៨១នាក់ទៀត និង១នាក់បានស្លាប់ជាស្ត្រីកំពុងពពោះ៧ខែ ខណៈខេត្តសៀមរាបក៏មានករណីស្លាប់ជាបន្តបន្ទាប់ផងដែរ ។
សូមបញ្ជាក់ថា ប្រទេសកម្ពុជាបានរកឃើញករណីជំងឺកូវីដ-១៩ដំបូងបំផុតនៅថ្ងៃទី ២៧ មករា ២០២០ លើបុរសជនជាតិចិននៅខេត្តព្រះសីហនុ ។ គិតមកដល់បច្ចុប្បន្ន ក្រសួងសុខាភិបាលបាលបានឱ្យដឹងថា នៅកម្ពុជាមានចំនួនអ្នកឆ្លងជំងឺកូវីដ-១៩ សរុបនៅទូទាំងប្រទេសមាន ៣៩,៤៦៤ នាក់ អ្នកជាសះស្បើយ ៣៣, ៥៧១ នាក់ និងអ្នកស្លា.ប់ ៣៦១ នាក់ ។ ដូច្នេះបានតាមតួលេខខាងលើ កម្ពុជានៅមានអ្នកជំងឺកូវីដ-១៩ កំពុងសម្រាកព្យាបាលមានចំនួន ៥,៥៣២ នាក់ ៕
ចែករំលែកព័តមាននេះ