ខេត្តមណ្ឌលគិរី ៖ ស្ថានភាពជំងឺកូវីដ១៩នៅខេត្តមណ្ឌលគិរីបានឈានដល់ការផ្ទុះក្នុងសហគមន៍ ខណៈអាជ្ញាធរសម្រេចបិទខ្ទប់ផ្នែកខ្លះនៃក្រុងសែនមនោរម្យ ដែលកំពុងមានអ្នកជំងឺច្រើនឆ្លងរាលដាល។ គិតពីថ្ងៃទី១១ ដល់ត្រឹមព្រឹកថ្ងៃទី១៥ មិថុនា ២០២១ នេះ មានចំនួនអ្នកវិជ្ជមានជំងឺកូវីដ១៩នៅខេត្តមណ្ឌលគិរី មានចំនួន២៣នាក់ ស្លាប់ម្នាក់ ហើយអ្នកពាក់ព័ន្ធប្រយោលនិងពាក់ព័ន្ឋផ្ទាល់ កំពុងធ្វើចត្តាឡីស័កមាន១១៥នាក់។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានបញ្ហាឲ្យអាជ្ញាធរក្រុងសែនមនោរម្យ បិទខ្ទប់ភូមិសាស្ត្រមួយចំនួនដែលមានហានិភ័យខ្ពស់ដូចជា ផ្នែកខ្លះភូមិដើមស្រល់ សង្កាត់មនោរម្យ ដល់ថ្ងៃទី២៦ មិថុនា ដោយសាររកឃើញប្រជាពលរដ្ឋមានករណីវិជ្ជមាន និងស្លាប់ដោយសារជំងឺកូវីដ១៩ ត្រង់ចំណុចផ្លូវចាក់បេតុងអាមេ ផ្លូវចូលហួសសាលាក្រុងសែនមនោរម្យ (អាហារដ្ឋានរ៉ាម៉ន) រហូតដល់ផ្លូវបំបែកផ្នែកខាងក្រោម និងផ្លូវបំបែកទៅកាន់សាលាសង្កាត់មនោរម្យ។
ការបិទខ្ទប់ផ្នែកខ្លះនៃភូមិជ្រៃសែន សង្កាត់មនោរម្យ រហូតដល់ថ្ងៃទី២៦ មិថុនា តាមបណ្តោយផ្លូវ កៅស៊ូ ចាប់ពីផ្លូវបំបែកហួសវត្តព្រះពុទ្ឋមណ្ឌលគិរី រហូតដល់ផ្លូវបំបែកទទៅកាន់ទឹកជ្រោះដំណាក់ស្តេច។ បិទខ្ទប់បណ្តោះអាសន្នផ្នែកខ្លះ នៃភូមិចំប៉ក់ សង្កាត់ស្ពានមានជ័យ ដល់ថ្ងៃទី២៦ មិថុនា តាមផ្លូវចាក់បេតុងអាមេ ក្បែរមន្ទីរពេទ្យខេត្ត ត្រង់ចំនុចផ្ទះជួល របដស់ឈ្មោះ ហ៊ន់ ចំណាន ទល់មុខផ្ទះលោក យូ ចន្ទីរ ប្រធានក្រុមប្រឹក្សាស្រុកកោះញែក។
ស្ថិតក្នុងស្ថានភាពដ៏ប្រឈមគ្រោះថ្នាក់នេះ អភិបាលខេត្តមណ្ឌលគិរីបានបង្កើនវិធានការដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ទ្រង់ទ្រាយធំចូលក្នុងសហគមន៍ សាធារណជននិងបងប្អូនប្រជាពលរដ្ឋទាំងអស់ ត្រូវរក្សាភាពស្ងៀមស្ងាត់មួយរយៈពេល និងមិនត្រូវដើររហេតរហូតឆ្លងកាត់ទៅភូមិសាស្ត្រមួយទៅភូមិសាស្ត្រមួយផ្សេងទៀត ចំពោះពលករកម្មករនិយោជិតនិងអ្នកធ្វើដំណើរមកពីក្រៅខេត្ត ស្នើមន្ត្រីសុខាភិបាល និងសមត្ថកិច្ចដែលប្រចាំការ ត្រួតពិនិត្យ នៅទីតាំងឈរជើង តាមព្រំប្រទល់ រវាងខេត្តមណ្ឌលគិរី ជាមួយខេត្តក្រចេះនិងខេត្តរតនគិរី ត្រូវធ្វើការម៉ឺងម៉ាត់ម៉ត់ចត់បំផុតដោយធ្វើការវាស់កំដៅ បាញ់អាកុល និងស្កេនQR code ឲ្យបានត្រឹមត្រូវ។
គ្រប់អាជីវកម្មផ្ទះសំណាក់ សណ្ឋាគារ បូទិកនិងរីសត ដែលមានច្បាប់អនុញ្ញាតត្រូវបំពាក់ឧបករណ៍វាស់កំដៅបាញ់អាកុលលាងសម្អាតដៃ។គ្រប់ភោជនីយដ្ឋានអាហារដ្ឋាន និងតូបលក់ដូរ អនុញ្ញាតឲ្យបើកដំណើរការជាធម្មតា ប៉ុន្តែត្រូវធ្វើការវេចខ្ចប់ ដោយមិនអនុញ្ញាតឱ្យមានភ្ញៀវចូលទទួលទាននៅក្នុងភោជនីយដ្ឋាននិងអាហារដ្ឋាន លក្ខណៈប្រមូលផ្តុំមនុស្សច្រើន ត្រូវធានានូវគំលាតសុវត្ថិភាពសង្គម និងគំលាតសុវត្ថិភាពបុគ្គល។បិទជាបណ្ដោះអាសន្ននូវសកម្មភាពកីឡាផ្សេងៗដូចជាក្លឹបហាត់ប្រាណនិងទីតាំងកីឡា។
គ្រប់វត្តអារាម វិហារសសូរ៉ាវអ៊ីស្លាមសាសនា និងវិហារគ្រិស្តសាសនា ហាមឃាត់មិនអនុញ្ញាតឲ្យមានការជួបជុំប្រមូលផ្តុំមនុស្សលើសពីចំនួន៥នាក់ឡើយ។ចំពោះរថយន្តដឹកទំនិញត្រូវបានអនុញ្ញាតឱ្យដំណើរការធម្មតា ដោយកំណត់អ្នករួមដំណើរត្រឹមតែចំនួនម្នាក់ប៉ុណ្ណោះ អ្នកបើកបរនិងជំនួយការបើកបរនិងគ្រប់ទំនិញត្រឹមត្រូវស្របច្បាប់៕
ចែករំលែកព័តមាននេះ