ខេត្តបាត់ដំបង៖ គិតត្រឹមម៉ោង៩ព្រឹកថ្ងៃទី១៥ មិថុនា ទឹកស្ទឹងសង្កែបានហក់ឡើងដល់កម្ពស់ជាង១១ម៉ែត្រហើយ ដោយសារតែនៅប៉ែកខាងលើ នៃដងស្ទឹងសង្កែ មានភ្លៀងធ្លាក់ខ្លាំងបង្គួរជាបន្តបន្ទាប់នាប៉ុន្មានថ្ងៃកន្លងទៅនេះ។ នេះបើតាមមន្ត្រីធនធានទឹកនិងឧតុនិយមខេត្ត បាននិយាយ ពេលត្រូតពិនិត្យកម្ពស់ទឹកស្ទឹងសង្កែ។
មន្ត្រីជំនាញបាននិយាយថា ទឹកស្ទឹងសង្កែ បានឡើងខ្លាំងដោយសារទឹកភ្លៀងនៅប៉ែកខាងលើ ។ ទំនប់ពហុបំណង សេកសក នៅស្រុករតនមណ្ឌល ត្រូវបានបើកទម្លាយ រីឯប្រព័ន្ធធារាសាស្ត្រ នៅក្នុងស្រុកបាណន់ ដែលស្ថិតនៅតាមបណ្ដោយដងស្ទឹងសង្កែ ជាមួយគ្នាក៏ត្រូវបានបើកទម្លាយដែរ ដែលជាហេតុធ្វើឲ្យ ប៉ែកខាងក្រោយ នៃដងស្ទឹងចាប់ផ្ដើមហក់ឡើងខ្លាំង។ មន្ត្រីដដែលបានបញ្ជាក់ថា បើតាមការពិនិត្យនីវូទឹកជាក់ស្ដែង គិតត្រិមម៉ោង៩ព្រឹថ្ងៃទី១៥ មិថុនា កម្ពស់ទឹកស្ទឹងសង្កែ នៅក្នុងក្រុងបាត់ដំបង បានឡើងដល់កម្ពស់ជាង១១ម៉ែត្រហើយ ហើយក៏មិនទាន់មានសញ្ញាថមថយដែរ។
ដោយឡែក ពាក់ព័ន្ធនឹងស្ទុះទឹកភ្លៀងនេះដែរ មន្ត្រីស្រុកសំឡូត ដែលជាស្រុកហ៊ុំព័ទ្ធទៅដោយព្រៃភ្នំ និង ជាប្រភពនៃជំនន់ទឹកភ្លៀង បានផ្ដល់ព័ត៏មាននៅព្រឹកថ្ងៃដដែលនេះថា បើតាមការសង្កេត នៅក្នុងភូមិសាស្ត្រស្រុកសំឡូត បានរងនូវឥទ្ធិពលសម្ពាធទាប ដែលបង្កឲ្យមានភ្លៀងធ្លាក់ជាបន្តបន្តាប់ចាប់តាំងពីថ្ងៃទី០៨ មិថុនា រហុទមកដល់ពេលនេះ។
ប្រភពបានឲ្យដឹងទៀតថា ប៉ុន្មានថ្ងៃកន្លងទៅនេះ ភ្លៀងបានធ្លាក់រាយប៉ាយពាសពេញស្រុកសំឡូត ស្រុករតនមណ្ឌ និង តាមបណ្ដាស្រុកមួយចំនួនទៀត ដូច្នេះហើយទើបធ្វើឲ្យទឹកស្ទឹងសង្កែ មានសន្ទុះឡើងខ្លាំង។ ប៉ុន្តែមន្ត្រីធនធានទឹក បានបញ្ជាក់ថា ពេលនេះទឹកស្ទឹងសង្កែ កំពុងហក់ឡើងខ្លាំង ដោយសារមានភ្លៀងជោកជាំនៅប៉ែកខាងលើ នៃដងស្ទឹង តែវានឹងថមថយវិញយ៉ាងឆាបរហ័ស ប្រសិនបើទឹកភ្លៀងនៅតាមបណ្ដាស្រុក ប៉ែកខាងលើៗ នៃដងស្ទឹងមានការថមថយដែរ។
មន្ត្រីជំនាញរូបនេះបានបញ្ជាក់បន្ថែមថា ទឹកស្ទឹងសង្កែ តែងតែហក់ឡើងរបៀបនេះជារៀងរាល់ឆ្នាំ នៅពេលមានភ្លៀងធ្លាក់ខ្លាំងនៅប៉ែកខាងលើៗ តែវាក៏ស្រកវិញលឿនណាស់ដែរ នៅពេលសណ្ធានភាពទឹកភ្លៀងប៉ែកខាងលើថយចុះ។ ប៉ុន្តែយ៉ាងណា ប្រជាពលរដ្ឋដែលរស់នៅតាមដងស្ទឹងសង្កែ គូរតែមានការប្រុងប្រយ័ត្នចំពោះជំនន់ទឹកភ្លៀងដែលហក់ឡើងមួយភ្លេតៗនៅដងស្ទឹងសង្កែនេះ ព្រោះវាអាចបង្កគ្រោះថ្នាក់ដល់មនុស្ស ដោយយថាហេតុ បើយើងមានការធ្វេសប្រហែស ៕
ចែករំលែកព័តមាននេះ