រាជធានីភ្នំពេញ៖ ធាតុក្មួយហុង ត្រូវបានព្រះសង្ឃ គង់នៅវត្តវ៉ារិន្ទ ហៅវត្តព្រែកលៀប សម្រេចប្រគល់អោយឪពុក និងជីដូនរបស់ក្មួយហុង នាំយកទៅធ្វើបុណ្យហើយ នៅរសៀលថ្ងៃទី១៤ ខែ មិថុនានេះ ដោយសារតែពួកគាត់ មានឯកសារត្រឹមត្រូវ។ ទោះបីជាយ៉ាងណា នៅរសៀលនេះ ស្ត្រីម្នាក់ អះអាងថា ជាម្តាយមីងរបស់ក្មួយហុង ក៏ចង់យកធាតុក្មួយហុង ទៅធ្វើបុណ្យដែរ។ ការដណ្តើមយកធាតុក្មួយហុងនេះ ទំនងព្រោះតែផលប្រយោជន៍។
ក្មួយហុង ត្រូវបានគេដឹងថា ជាជនអនាថា និងជាក្មេងរពិស ដែលធ្លាប់ល្បីឈ្មោះ នៅក្នុងបណ្តាញសង្គម។
តាមសំបុត្រកំណើត ក្មួយហុង មានឈ្មោះ ម៉ិញ ម៉េងហុង ភេទប្រុស កើតនៅថ្ងៃទី២១ ខែឧសភា ឆ្នាំ ២០១១ នៅភូមិទី២ សង្កាត់លេខ៣ ក្រុងព្រះស៊ីហនុ ខេត្តព្រះស៊ីហនុ ដែលមានឪពុក ឈ្មោះ មិញ សារឿន ភេទប្រុស អាយុ ៣០ឆ្នាំ ជាកម្មករសំណង់ ស្នាក់នៅភូមិ ២ សង្កាត់លេខ១ ក្រុងព្រះសីហនុ ខេត្តព្រះសីហនុ។ ចំណែក ម្តាយហុង ពុំស្គាល់ឡើយ ដោយសារតែបានលែងលះគ្នា ទៅមានគ្រួសារថ្មី។
គួរបញ្ជាក់ថា ក្មួយហុង ជាក្មេងអនាថា ដែលបានស្លាប់បាត់បង់ជីវិត នៅក្នុងមន្ទីរពេទ្យ បន្ទាប់គ្រោះថ្នាក់ចរាចរណ៍ កាលពីវេលាម៉ោងប្រមាណ ៥ល្ងាច ថ្ងៃទី១១ ខែមិថុនា ឆ្នាំ២០២១ តាមបណ្តោយផ្លូវ ២៨គ្រួសារ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។ ហេតុការណ៍នោះ បានកើតឡើង បន្ទាប់ពីក្មួយហុង តោងកន្ទុយរថយន្ត ពេលបត់ ហើយបោកត្រូវ។
សពរបស់ហុង ត្រូវបានរថយន្តសាម៉ុយ បញ្ជូនទៅបូជា នៅក្នុងវត្តព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ កាលពីម៉ោងប្រមាណ ១២ថ្ងៃត្រង់ ថ្ងៃទី១៣ ខែមិថុនា ឆ្នាំ២០២១។ បន្ទាប់ពីស្លាប់ មានសប្បុសជនជាច្រើន មានការអាណិតអាសូរពីជីវិតអភ័ព្វរបស់ក្មួយ ហុង ដែលមានបញ្ហាខួរក្បាលឈាមកក ក្នុងសរសៃឈាម បានរត់ចេញពីឪពុក ទៅរស់នៅជាមួយជីដូន ក្រោយមក ក៏បានចេញទៅរស់នៅ ដោយអនាថារស់នៅតែលតោលហើយ ត្រូវបានអង្គការ យកទៅចិញ្ចឹម ហើយក៏បានរត់ចេញបន្តទៀត។ ចំណែកឪពុកម្តាយ ក៏បានលែងលះគ្នា ហើយមានប្រពន្ធ និងប្តីរៀងៗ តាំងពីហុង មានអាយុប្រមាណ ២ខែមកម្លេះ។
ដោយតែបញ្ហាខួរក្បាល បានធ្វើហុង តែងតែដើរលួចរបស់របរគេ។ បន្ទាប់ពីក្មួយហុង បានស្លាប់ និងបូជា នៅរសៀលថ្ងៃទី១៤ ខែមិថុនា ឆ្នាំ២០២១ ឪពុក ឈ្មោះ មិញ សារឿន និងជីដូន ក៏បានមកទទួលធាតុ ទៅធ្វើបុណ្យ។ ទន្ទឹមនោះ ស្ត្រីម្នាក់ ដែលអះអាងថា ជាម្តាយមីង (ម្តាយចិញ្ចឹម) ក៏ចង់បានធាតុ ទៅធ្វើបុណ្យដែរ។
ទោះបីជាយ៉ាងណា ដោយសារតែឪពុក និងជីដូន មានសៀវភៅស្នាក់នៅ សំបុត្រកំណើត និង លិខិតបញ្ជាក់ពីមេភូមិ២ សង្កាត់លេខ១ ក្រុងព្រះសីហនុ ខេត្តព្រះសីហនុ ទើបព្រះសង្ឃ វត្តវ៉ារិន្ទ ហៅ វត្តព្រែកលៀប បានប្រគល់ធាតុទៅអោយឪពុក នាំយកទៅធ្វើបុណ្យតាមប្រពៃណី៕ ម៉េង ធា
ចែករំលែកព័តមាននេះ