រាជធានីភ្នំពេញ ៖ មន្ត្រីការិយាល័យរៀបចំដែនដីនគររូបនីយកម្មនិងសំណង់ និងភូមិបាលខណ្ឌជ្រោយចង្វារ ចំនួន៣២នាក់ ត្រូវបានក្រុមគ្រូពេទ្យចុះយកសំណាក កាលពីរសៀល ថ្ងៃទី១៤ ខែ មិថុនា…
រាជធានីភ្នំពេញ ៖ មន្ត្រីការិយាល័យរៀបចំដែនដីនគររូបនីយកម្មនិងសំណង់ និងភូមិបាលខណ្ឌជ្រោយចង្វារ ចំនួន៣២នាក់ ត្រូវបានក្រុមគ្រូពេទ្យចុះយកសំណាក កាលពីរសៀល ថ្ងៃទី១៤ ខែ មិថុនា ឆ្នាំ២០២១នេះ ព្រមទាំងណែនាំអោយធ្វើចត្តាឡីស័ក បន្ទាប់មន្ត្រីម្នាក់ និងក្រុមគ្រួសាររកឃើញវិជ្ជមានកូវីដ១៩ ។
ទោះបីជាយ៉ាងណា ការធ្វើតេស្តនោះមិនទាន់ចេញជាលទ្ធផលនៅឡើយ ។ តាមព័ត៌មានអោយដឹងថា ការប្រមូលគ្នាយកសំណាកនេះ បន្ទាប់ពីមន្ត្រី ភូមិបាលម្នាក់ រួមទាំងក្រុមគ្រួសារបានរកឃើញឆ្លងវិជ្ជមានកូវីដ១៩ កាលពីល្ងាច ថ្ងៃទី១៣ ខែមិថុនា ឆ្នាំ២០២១ ។ បន្ទាប់ពីរកឃើញវិជ្ជមានក៏មានការភ្ញាក់ផ្អើលដល់អាជ្ញាធរខណ្ឌជ្រោយចង្វារ ផងដែរ ព្រោះមន្ត្រី ដែលជាអ្នកពាក់ព័ន្ធដោយផ្ទាល់ និងប្រយោល ក៏បានចូលរួមអនុវត្តវិធានការណ៍រដ្ឋបាលរុះរើ បែចិញ្ចឹមត្រី ផ្ទះទឹក ផ្ទះតូចៗ និងសំណង់មិនរៀបរយនៅតាមដងទន្លេ កាលពីថ្ងៃទី១៣ខែ មិថុនាផងដែរ ។
ទោះបីជាយ៉ាងណា អ្នកពាក់ព័ន្ធទាំងនោះមិនទាន់ដឹងថា បានឆ្លងកូវីដ ឬយ៉ាងណានោះទេ រង់ចាំលទ្ធផលសិន ។
ដោយឡែក មន្ត្រីនគរបាលផ្នែកព្រហ្មទណ្ឌ២នាក់នៃអធិការដ្ឋានជ្រោយចង្វារត្រូវបានគេរាយការណ៍ថា បានរកឃើញវិជ្ជមានកូវីដ១៩ បន្ទាប់ពីមន្ត្រីនគរបាល២២នាក់ បានធ្វើសំណាក កាលពីវេលាក្បាលព្រលប់ ថ្ងៃទី១៣ ខែមិថុនា ឆ្នាំ២០២១ ម្សិលមិញ ។
ក្រៅពីអ្នកវិជ្ជមាន ក៏មានអធិការរងនគរបាលផ្នែកព្រហ្មទណ្ឌនៃអធិការដ្ឋានខណ្ឌជ្រោយចង្វារម្នាក់ និងនាយកប៉ុស្តិ៍ជ្រោយចង្វារ កំពុងតែធ្វើចត្តាឡីស័កផងដែរ ។
ការឈានទៅធ្វើសំណាក រកឃើញមន្ត្រីនគរបាលវិជ្ជមាននេះ ត្រូវបានគេបង្ហើបអោយដឹងថា ដោយសារតែមន្ត្រីទាំងនោះចាប់ជនសង្ស័យម្នាក់ កាលពីពេលថ្មីៗនេះ នៅក្នុងមូលដ្ឋានសង្កាត់ជ្រោយចង្វារ មានផ្ទុករោគកូវីដជាហេតុ បណ្តាលអោយមានការឆ្លងទៅមន្ត្រីនគរបាលព្រហ្ម២នាក់ និងមួយចំនួនទៀតកំពុងតែធ្វើចត្តាឡីស័ក ៕
ចែករំលែកព័តមាននេះ