រាជធានីភ្នំពេញ ៖ តាមរយៈក្រសួងកសិកម្មរុក្ខាប្រមាញ់និងនេសាទ និងក្រុមហ៊ុនរបស់ជប៉ុន ប្រទេសកម្ពុជា និងជប៉ុនកំពុងបង្ហញពីការពង្រីកកិច្ចសហប្រតិបត្តិការលើវិស័យកសិកម្មកាន់តែស៊ីជម្រៅ ខណៈកម្ពុជាកំពុងតែមានសក្ដានុពលលើវិស័យនេះផងដែរ ។ នៅក្នុងជំនួបរវាងរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ និងក្រុមហ៊ុនYamato…
រាជធានីភ្នំពេញ ៖ តាមរយៈក្រសួងកសិកម្មរុក្ខាប្រមាញ់និងនេសាទ និងក្រុមហ៊ុនរបស់ជប៉ុន ប្រទេសកម្ពុជា និងជប៉ុនកំពុងបង្ហញពីការពង្រីកកិច្ចសហប្រតិបត្តិការលើវិស័យកសិកម្មកាន់តែស៊ីជម្រៅ ខណៈកម្ពុជាកំពុងតែមានសក្ដានុពលលើវិស័យនេះផងដែរ ។
នៅក្នុងជំនួបរវាងរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ និងក្រុមហ៊ុនYamato Green ភាគីទាំងពីបានពិភាក្សាលំអិតពី ពីកិច្ចសហប្រតិបត្តិការលើវិស័យកសិកម្មខណៈក្រុមហ៊ុននេះក៏បាននិងកំពុងដាក់ទុនវិនិយោគនៅក្នុងវិស័យកម្ពុជាជាយូរមកហើយដែរ ។
យោងតាមឯកឧត្តមវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទឱ្យដឹងថា ជំនួបពិភាក្សារវាងភាគីកម្ពុជា និងជប៉ុនគឺមានគោលបំណងដើម្បីបង្កើនសហប្រតិបត្តិការភាពជាដៃគូវិនិយោគដើម្បីអភិវឌ្ឍន៍វិស័យសាកវប្បកម្ម ( ដំណាំបន្លែ ) សម្រាប់បង្កើនផលិតភាពផលិតកម្មនិងការនាំចេញ ។
នៅពេលខាងមុខក្រុមហ៊ុន Yamato Green នឹងចុះហត្ថលេខាជាមួយសម្ព័ន្ធកសិកម្មកម្ពុជា ដើម្បីរួមគ្នាក្នុងការអភិវឌ្ឍវិស័យកសិកម្ពុជានៅកម្ពុជា និងជំរុញក្នុងការផលិត ផលិតផលកសិកម្មកម្ពុជាសម្រាប់នាំចេញទៅកាន់ទីផ្សារជប៉ុននិងទីផ្សារប្រទេសដទៃទៀតផងដែរ ។
ឯកឧត្តមវេង សាខុនក៏បានមានប្រសាសន៍បន្តថា អនាគតដ៏ខ្លីខាងមុខ ក្រសួង ក៏ចង់ឃើញក្រុមហ៊ុនជប៉ុនផ្សេងទៀត ពិសេសក្រុមហ៊ុន Yamato សហការជា មួយអ្នកផលិតនាំចេញបន្លែ និងផ្លែឈើកម្ពុជាចេញទៅកាន់ទីផ្សារជប៉ុនផងដែរ។ មួយក្នុងចំណោមផ្លែឈើដែលមាន សក្តានុពលនាំចេញគឺផ្លែមានប៉ៃលិន (ផ្លែតាង៉ែន) ដោយសារក្រុមហ៊ុនមានដៃគូ បទពិសោធន៍ក្នុងការផលិត កែច្នៃ ជាពិសេសទំនាក់ទំនងទីផ្សារល្អនិងសូមស្នើឱ្យក្រុមហ៊ុនសិក្សាពីគុណសម្បត្តិផ្លែមានប៉ៃលិនដើម្បីនាំចេញជាស្រស់ និងក្រៀម នាពេលអនាគត ។
ឯកឧត្តម ក៏បានបង្ហាពីសក្ដានុពលនៃដំណាំជាច្រើនទៀតដែលកំពុងតែអភិវឌ្ឍន៍និងកំពុងស្វែងរកដៃគូអភិវឌ្ឍន៍ពង្រឹងគុណភាព សម្រាប់នាំចេញទៅកាន់ទីផ្សារប្រទេសជាច្រើនខណៈកម្ពុជាក៏បានចរចាបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសទីផ្សារធំៗជាច្រើនផងដែរ ។ លោកឧកញ៉ា ចេង ខេង អគ្គនាយកក្រុមហ៊ុនស៊ីភីអិល ក៏បានលើកឡើងផងដែរថា កសិកម្មកម្ពុជាក៏ជាវិស័យមួយទាក់ទាញដល់វិនិយោគិនបរទេសចូលមកបណ្ដាក់ទុនវិនិយោគផងដែរ ខណៈសក្ដានុពលនៃវិស័យនេះនៅមានភាពទូលំទូលាយនៅឡើយ ។ លោកថា៖«បច្ចុប្បន្ននេះ មានវិនិយោគិនពីបណ្ដាប្រទេសជាច្រើនបានបង្ហាញការចាប់អារម្មណ៍លើការវិនិយោគក្នុងវិស័យកសិកម្មក្នុងប្រទេសកម្ពុជា ហើយសង្ឃឹមថានៅពេលចប់វិបត្តិកូវីដ១៩ នឹងមានវិនិយោគិនជាច្រើនចូលមកស្វែងរកការបណ្ដាក់ទុនលើវិស័យកសិកម្មកម្ពុជាបន្ថែមទៀត » ។
រដ្ឋាភិបាលកម្ពុជាបានប្រកាសកន្លងមកជំរុញនិងលើកទឹកចិត្តដល់ការវិនិយោគក្នុងវិស័យកសិកម្ម រួមទាំងជំរុញនិងលើកទឹកចិត្តដល់កសិករកម្ពុជាក្នុងការកែប្រែកសិកម្មពីប្រភេទកសិកម្មគ្រួសារទៅជាកសិកម្មទីផ្សារ ដើម្បីផ្គត់ផ្គង់ក្នុងស្រុកផង និងឈានដល់ការនាំចេញទៅកាន់ទីផ្សារអន្តរជាតិផង ។
វិស័យកសិកម្មកម្ពុជា ក្នុងវិបត្តិកូវីដ១៩នេះក៏បានដើរតួនាទីសំខាន់មួយសម្រាប់ប្រាក់ចំណូលរបស់ប្រជាពលរដ្ឋ និងជាជន្ទល់សំខាន់មួយក្នុងកំណើនសេដ្ឋកិច្ចកម្ពុជា ខណៈវិស័យមួយចំនួនបានរង្គោះរង្គើដោយសារតែវិបត្តិនិងធ្វើឱ្យប្រជាពលរដ្ឋជាច្រើនមានបញ្ហាប្រាក់ចំណូលផងដែរ ៕
ចែករំលែកព័តមាននេះ