ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា បុរសជាសន្តិសុខយាមនៅធនាគារហត្ថា មួយកន្លែងបានដេកស្លា.ប់នៅក្នុងអង្រឹងបង្កឱ្យមានការភ្ញាក់ផ្អើលកាលពីវេលាម៉ោង០៦ព្រឹក ថ្ងៃទី១៤ ខែមិថុនា ឆ្នាំ២០២១ ស្ថិតនៅភូមិគោកថ្មី ឃុំពួកស្រុកពួក ខេត្តសៀមរាប ត្រង់ចំណុចប៉ុស្តិ៍យាមមុខធនាគារហត្ថាកសិករស្រុកពួក។
បើតាមប្រភពពីសមត្ថកិច្ចនគរបាលស្រុកពួក ដែលបានចុះទៅដល់កន្លែងកើតហេតុបានប្រាប់ថា ជនរងគ្រោះខាងលើមានឈ្មោះ សេង ខុន ភេទប្រុស អាយុ៥១ឆ្នាំ មុខរបរសន្តិសុខ មានទីលំនៅភូមិទួលរវៀង ឃុំល្វា ស្រុកពួក ខេត្តសៀមរាប និងមានប្រពន្ធឈ្មោះ សេង សែ ហើយក៏មានកូនចំនួន៨នាក់ក្នុងបន្ទុកផងដែរ។
ប្រភពដដែលបានបន្តថា បន្ទាប់ពីកើតហេតុ កម្លាំងជំនាញបានសាកសួរសន្តិសុខដែលត្រូវដូរវេនយាម មានឈ្មោះ ខន យុង ភេទប្រុស អាយុ៣២ឆ្នាំ នៅភូមិប្រយុទ្ធ ឃុំពួក ស្រុកពួក ខេត្តសៀមរាប បានប្រាប់ថា ពួកគាត់យាមនៅធនាគារនេះតែ២នាក់លើ២៤ម៉ោង គឺដូរគ្នាម្តង។ លុះនៅថ្ងៃទី១៣ វេលាម៉ោង០៦ព្រឹក (ជនរងគ្រោះ) មកដូរខ្លួនយាម រហូតដល់ម៉ោង០៦ព្រឹក ថ្ងៃទី១៤ ខែមិថុនា ឆ្នាំ២០២១ ខ្លួនក៏មកដូរយាមវិញ ប៉ុន្តែដាស់មិនភ្ញាក់សោះ ទើបដឹងថា គាត់បានស្លា.ប់បាត់ទៅហើយ។
ពាក់ព័ន្ធនឹងករណីខាងលើនេះ ក្រុមមន្ត្រីបច្ចេកទេស បានពិនិត្យសាកស.ពជនរងគ្រោះឃើញថា មិនមានស្លាកស្នាមពាក់ព័ន្ធបទល្មើសអ្វីនោះទេ។ ជាមួយគ្នានេះដែរ គ្រូពេទ្យក៏បានយកសំណាកជនរងគ្រោះទៅពិនិត្យឃើញថា ពុំមានជំងឺកូវីដ-១៩នោះទេ។
បើតាមការសន្និដ្ឋានរបស់លោកម៉ង់ សម្បត្តិ ប្រធានមន្ទីរពេទ្យបង្អែកពួក បានបញ្ជាក់ថា ជនរងគ្រោះបានស្លា.ប់ដោយសារខ្យល់គរ។ ហើយបច្ចុប្បន្ននេះជនរងគ្រោះត្រូវបានកម្លាំងជំនាញប្រគល់សាកស.ពឱ្យទៅក្រុមគ្រួសារ ដើម្បីយកទៅធ្វើបុណ្យតាមប្រពៃណីហើយ៕
ចែករំលែកព័តមាននេះ