រាជធានីភ្នំពេញ ៖ បុរសជនជាតិចិនម្នាក់បានបើករថយន្តតូយ៉ូតាព្រូសមួយគ្រឿង ទៅចតចោលក្នុងស្ថានីយប្រេងឥន្ទនៈភីធីធី ទាំងដែលម្ចាស់ស្ថានីយនោះមិនទទួល ក៏ត្រូវម្ចាស់ស្ថានីយប្រេងឥន្ធនៈ រាយការណ៍ជូនសមត្ថកិច្ចឲ្យជួយធ្វើការអន្តរាគមន៍ កាលពីវេលាម៉ោង៨យប់ ថ្ងៃទី១៣ ខែមិថុនា ឆ្នាំ២០២១ ត្រង់ចំណុចស្ថានីយប្រេងឥន្ធនៈភីធីធី ក្បែរផ្សារសារឿន តាមបណ្តោយផ្លូវ២១៧ ស្ថិតក្នុងសង្កាត់ដង្កោ ខណ្ឌដង្កោ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គឺមានជនជាតិចិនម្នាក់ បានបើករថយន្តមួយគ្រឿងម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2AU-3445 បានបើកមកឈប់ជាប់នៅក្នុងស្ថានីយប្រេងឥន្ទៈកើតហេតុ ហើយជនជាតិចិននោះ ក៏បានចាកចេញទៅបាត់។ ដោយពេលកន្លងមក រថយន្តនេះក៏ធ្លាប់បានបើកមកឈប់ចោលនៅខាងក្នុងស្ថានីយខាងលើចំនួន២ទៅ៣ដងរួចមកហើយដែរ។
ប្រភពដដែលបន្តថា ដោយម្ដងៗនោះ គឺរយៈពេល២ទៅ៣ថ្ងៃ ទើបម្ចាស់ត្រឡប់មកបើកយករថយន្តចេញទៅវិញ ហើយខាងម្ចាស់ស្ថានីយប្រេងឥន្ធនៈក៏បានប្រាប់ទៅកាន់ម្ចាស់រថយន្តផងដែរថា ស្ថានីយប្រេងឥន្ធនៈរបស់ខ្លួនមិនទទួលផ្ញើរថយន្តនោះទេ តែជនជាតិចិនរូបនោះនៅតែបើករថយន្តយកមកថតទុកដដែល។ ហើយដោយខ្លាចបាត់បង់ទ្រព្យសម្បត្ដិនៅក្នុងរថយន្ដ ក៏ដូចជាបាត់បង់រថយន្តផ្ទាល់ ទើបម្ចាស់ស្ថានីយប្រេងឥន្ធនៈ ធ្វើការរាយការណ៍ជូនសមត្ថកិច្ចមូលដ្ឋានឲ្យមកជួយធ្វើការអន្តរាគមន៍តែម្តង។
ក្រោយពេលកើតហេតុ គឺរថយន្តខាងលើត្រូវបានសមត្ថកិច្ចមូលដ្ឋានធ្វើការទំនាក់ទំនងហៅរថយន្តស្ទួចមកធ្វើការទទួលយករថយន្តនោះទៅរក្សាទុកនៅអធិការដ្ឋាននគរបាលខណ្ឌដង្កោ ដើម្បីរង់ចាំម្ចាស់យកឯកសារពាក់ព័ន្ធមកយករថយន្តត្រឡប់ទៅវិញ៕
ចែករំលែកព័តមាននេះ