ខេត្តកំពង់ឆ្នាំង៖ ពេជ្រចង្វារ គឺជាឃុំមួយ ក្នុងចំណោមឃុំទាំង ១១ ក្នុងស្រុកបរិបូណ៌។ ថ្វីបើឃុំមួយនេះ នៅចម្ងាយតែជាង ១២គីឡូម៉ែត្រ ពីទីរួមស្រុក…
ខេត្តកំពង់ឆ្នាំង៖ ពេជ្រចង្វារ គឺជាឃុំមួយ ក្នុងចំណោមឃុំទាំង ១១ ក្នុងស្រុកបរិបូណ៌។ ថ្វីបើឃុំមួយនេះ នៅចម្ងាយតែជាង ១២គីឡូម៉ែត្រ ពីទីរួមស្រុក និងពីផ្លូវជាតិលេខ៥ ក៏ពិតមែន ក៏ប៉ុន្តែហាក់នៅឆ្ងាយខ្លាំងណាស់ ព្រោះតែផ្លូវធ្វើដំណើរ ជួបការលំបាក។
យ៉ាងណាក៏ដោយ ថ្មីៗនេះ ក្រសួងអភិវឌ្ឍន៍ជនបទ បានសម្រេចកសាងផ្លូវ១ខ្សែ ក្នុងឃុំពេជចង្វារ ឲ្យក្លាយទៅជាផ្លូវក្រាលកៅស៊ូយ៉ាងស្រស់ស្អាត ងាយស្រួល ក្នុងការធ្វើដំណើរ ធ្វើអោយប្រជាពលរដ្ឋមានសេចក្តីត្រេកអរ និងរីករាយក្រៃលែង។
លោកតា អ៊ិត សុខ អាយុ ៦៧ឆ្នាំ ជាជនពិការ ជិះលើម៉ូតូកែច្នៃ បានបញ្ជាក់ថា គាត់រស់នៅលើទឹកដីនេះ តាំងពីសង្គមចាស់ និងក្នុងសម័យប៉ុលពត រស់នៅលើទឹកដីដែរ។ ប៉ុន្តែផ្លូវមួយខ្សែនេះ ពុំធ្លាប់មានថ្នល់កៅស៊ូស្អាតបែបនេះទេ ការធ្វើដំណើរជួបការលំបាកខ្លាំងណាស់ កន្លែងខ្លះ ក្លាយជាថ្លុកត្រពាំង ទៀតផង។ ក្រោយមក ប្រទេសជាតិ ចេះតែរីកចម្រើន ផ្លូវមួយខ្សែនេះ ក៏ត្រូវបានកសាង ជាផ្លូវគ្រួសក្រហម។ នៅពេលនេះ ក៏ចាក់កៅស៊ូស្រស់ស្អាត។ គាត់ពិតជាសប្បាយរីករាយក្រៃលែង និងថ្លែងអំណរគុណដល់រាជរដ្ឋាភិបាល ដែលបានយកចិត្តទុកដាក់កសាងផ្លូវនេះឡើង។
លោក ជា វ៉ិច មេឃុំពេជចង្វារ បានបញ្ជាក់ថា ផ្លូវមួយខ្សែនេះ បានកសាងឡើងដោយក្រសួងអភិវឌ្ឍន៍ជនបទ ដែលមានចំងាយ ១២២០០ ម៉ែត ស្មើនឹង ១២,២ គីឡូម៉ែត្រ ចេញពីចំណុចថ្នល់ជាតិលេខ៥ ជាប់ផ្សារពន្លៃ មកដល់មុខវត្តពេជ្រចង្វារ បានកសាងរួចរាល់ជាង ១០ថ្ងៃមុននេះ។
ក្នុងនាម លោក ជាអាជ្ញាធរឃុំ ជំនួសមុខឱ្យប្រជាពលរដ្ឋទាំង ៦ភូមិ សូមថ្លែងអំណរគុណដល់រាជរដ្ឋាភិបាល អំណរគុណដល់ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ដែលបានយកចិត្តទុកដាក់កសាងផ្លូវមួយខ្សែនេះ ឲ្យក្លាយទៅជាផ្លូវក្រាលកៅស៊ូយ៉ាងស្រស់ស្អាត ងាយស្រួលធ្វើដំណើរ ដែលអាចធ្វើដំណើរដោយបានឆាប់រហ័ស ចំណេញពេលវេលា ងាយស្រួលក្នុងការដឹកទំនិញ ដឹកកសិផលរបស់កសិករ គឺជួយកាត់បន្ថយភាពក្រីក្ររបស់ប្រជាពលរដ្ឋផងដែរ។
សូមបញ្ជាក់ថា ឃុំពេជចង្វារ មានចំនួន ៦ភូមិ មានប្រជាពលរដ្ឋចំនួន ១០១៥ គ្រួសារ មានមនុស្សចំនួន ៤២១៦ នាក់ (ស្រី ២២៥៨នាក់)៕ ពៅ សុខហ៊ាន
ចែករំលែកព័តមាននេះ