រាជធានីភ្នំពេញ ៖ កាលពីព្រឹកថ្ងៃទី២៥ សីហា សាលាដំបូងរាជធានីបានអនុញ្ញាតឱ្យអនុរក្សពន្ធនាគារព្រៃស នាំខ្លួនជនឈ្មោះនេត ខៃ មកសាកសួរលើបណ្តឹងជនរងគ្រោះ៣នាក់ ដែលបានដាក់ពាក្យប្តឹងក្នុងចំណោមនារីរងគ្រោះដោយការងូតទឹកមន្តប្រមាណជាង៦០០នាក់ ។ ក្នុងចំណោមបណ្តឹងរបស់នារីទាំង៣នាក់នោះក៏មានអនីតិជនម្នាក់ផងដែរ ពាក់ព័ន្ធនឹងរឿងលួចថតរូបស្រាត ពេលងូតទឹកមន្តក្នុងបន្ទប់ ហើយយកទៅផ្សាយតាមរយៈការបាញ់ប៊្លូធូ ពីទូរស័ព្ទដៃមួយ ទៅទូរស័ព្ទដៃ មួយតៗគ្នា ។
ពេញមួយព្រឹក លោកស្រីចាំង ស៊ីណាត ចៅក្រមស៊ើបសួរ សាលាដំបូងរាជធានីភ្នំពេញ បានសួរឈ្មោះនេត ខៃ ពីរឿងថតរូបស្រីស្រាត នៅវត្តស្រះចកដែលមានរហូតដល់ទៅ៦២៧នាក់ ទៅរកទឹកមន្តពីជនកំហូចនោះ ។ ប្រភពព័ត៌មានត្រូវបានឱ្យដឹងថា តុលាការអនុញ្ញាតឱ្យអនុរក្សពន្ធនាគារនាំឈ្មោះនេត ខៃ មកសាកសួរនេះ គឺយោងលើបណ្តឹងថ្មីទៀតដែលមានជនរងគ្រោះ៣នាក់ចេញមុខប្តឹង ក្នុងនោះម្នាក់ជាអនីតិជនផង ។ ការសាកសួរចាប់តាំងពីម៉ោង៨ព្រឹក រហូតដល់ម៉ោង១២ថ្ងៃត្រង់ រហូតជនឈ្មោះនេត ខៃ ត្រូវទទួលអាហារបាយកញ្ចប់នៅបន្ទប់រង់ចាំ របស់សាលាដំបូងរាជធានីភ្នំពេញ ។ គួររំលឹកថាកាលពីព្រឹកថ្ងៃទី៥សីហាជនរងគ្រោះដោយសារទឹកមន្ដ របស់ជនកំហូចឈ្មោះនេត ខៃ អតីតសង្ឃគង់នៅវត្ដស្រះចកចំនួន៣នាក់ថ្មីទៀត ដែលក្នុងនោះម្នាក់ជាអនីតិជនផង បានមកដាក់ពាក្យបណ្ដឹបន្ថែមលើជននោះ ខណៈកំពុងជាប់ឃុំរួចជាស្រេចទៅហើយ នៅក្នុងពន្ធនាគារព្រៃស ។ ជនរងគ្រោះទាំង៣នាក់ ដែលមកដាក់ពាក្យប្ដឹងតាមផ្លូវច្បាប់នេះ គឺជាគំរូមួយដើម្បីឱ្យជនរងគ្រោះទាំងអស់ នាំគ្នាដាក់បន្ទុកលើជនកំហូច ហើយមន្ដ្រីតុលាការរំពឹងថា នឹងមានអ្នករងគ្រោះដទៃទៀតមកដាក់ពាក្យបណ្ដឹងដែរ ។
តាមប្រភពព័ត៌មានថា អ្នករងគ្រោះដោយការលួចថតមានចំនួនជាង៦០០នាក់ ដោយជនឈ្មោះនេត ខៃ ប្រើល្បិចឱ្យចូលក្នុងបន្ទប់ទឹកដោះសំលៀកបំពាក់នៅខ្លួនននលគកដែលធ្វើឱ្យប៉ះពាល់ដល់កិត្ដិយសស្ដ្រីខ្មែរ យ៉ាងធ្ងន់ធ្ងរ
បំផុត ។ មន្ដ្រីតុលាការនិយាយថា បណ្ដឹងជនរងគ្រោះ៣នាក់នេះ វាគ្រប់គ្រាន់ពេកទៅហើយ សំរាប់តុលាការផ្ដន្ទាទោសទៅលើជនកំហូចនេត ខៃ នាពេលខាងមុខ ព្រោះមានជនរងគ្រោះ ម្នាក់ជាអនីតិជន គឺបើជនរងគ្រោះជាអនីតិជន តាមច្បាប់ពាក់ព័ន្ធនឹងការផលិត និងចែកចាយ រូបអាសអាភាសក្នុងកថាខណ្ឌទី១ ទី២ មាត្រា៤១ តំរូវផ្ដន្ទាទោសលើជនជាប់ចោទពី៥ឆ្នាំទៅ១០ឆ្នាំ ឬពី១០ឆ្នាំទៅ២០ឆ្នាំ ។ កន្លងមកមានពាក្យលេចឮតគ្នាថា នេត ខៃ ត្រូវបានដោះលែងឱ្យនៅក្រៅឃុំ និងខ្លះទៀត និយាយថា តុលាការចោទប្រកាន់គេស្រាលពេក ពី១ខែទៅ១ឆ្នាំ ។ ទោះបីជាបែបណាក្ដីព័ត៌មាន ទាំងអស់នោះមិនពិតទេ គឺសព្វថ្ងៃ នេត ខៃ កំពុងជាប់ឃុំខ្លួននៅក្នុងពន្ធនាគារព្រៃសហើយ នាពេលឆាប់ៗខាងមុខនេះសាលាដំបូងរាជធានីភ្នំពេញ នឹងបើកសវនាការផ្ដន្ទាទោស ព្រមទាំងកំពុងបន្ដចាត់ការលើបណ្ដឹងជនរងគ្រោះ ដែលជាអនីតិជនទៀត ។ នេត ខៃ ត្រូវបានតុលាការចេញដីកាឃុំខ្លួនបណ្ដោះអាសន្ន នៅពន្ធនាគារព្រៃសកាលពីថ្ងៃ ទី២៩មិថុនាដើម្បីរង់ចាំការបើកសវនាការវិនិច្ឆ័យទោសជាផ្លូវការ ។ តាមប្រភពច្បាស់ការណ៍នៅសាលាដំបូងរាជធានី តំណាងអយ្យការ គឺលោកឯក ឆេងហួត ព្រះរាជអាជ្ញារងបានធ្វើការឆែកឆេរ និងរកឃើញរូបភាពស្ដ្រីអាក្រាតកាយក្នុងម៉េម៉ូរីកុំព្យូទ័រជនកំហូចឈ្មោះ នេត ខៃ នេះមានចំនួន៦២៧នាក់ ដែលបានទៅងូតទឹកមន្ដក្នុងបន្ទប់ ។ សូមបញ្ជាក់ថា កាលពីពេលចាប់ខ្លួនភ្លាមៗ ប៉ូលិសរកឃើញតែជាង៣០០នាក់ប៉ុណ្ណោះ ។
បន្ទាប់ពីបានរកឃើញរូបភាពស្ដ្រីស្រាតក្នុងបន្ទប់ទឹកមន្ដនៅក្នុងកុំព្យូទ័ររបស់ជនកំហូចនេះហើយលោកឯក ឆេងហួត ក៏បានចោទប្រកាន់លើឈ្មោះនេត ខៃ ជាផ្លូវការពីបទផលិត និងចែកចាយរូបភាពអាសអាភាស ។ បន្ទាប់ពីការចោទប្រកាន់ពីតំណាងអយ្យការរួចហើយ ក៏បានចាត់បញ្ជូនទៅលោកចៅក្រមស៊ើបសួរដើម្បីសំរេចឃុំខ្លួនដាក់ពន្ធនាគារជាបណ្ដោះ អាសន្នរង់ចាំការស៊ើបអង្កេតបន្ដ ។ ប្រភពព័ត៌មានបានឱ្យដឹងទៀតថា ជនកំហូចឈ្មោះនេត ខៃ ត្រូវបានតំណាងអយ្យការចោទប្រកាន់ពីបទផលិត និងចែកចាយរូបភាពអាសអាភាសយោងតាមមាត្រា៣៩ ក្នុងគោលដៅប្រើប្រាស់ ឬប្រព្រឹត្ដបទល្មើសដែលតាមច្បាប់ត្រូវផ្ដន្ទាទោសពី១ខែទៅ១ឆ្នាំ និងពិន័យជាប្រាក់ពី២០ម៉ឺនទៅ២លានរៀល ។ តាមមាត្រា៣៩ កថាខណ្ឌទី៣ បានបញ្ជាក់ យ៉ាងច្បាស់ថា រូបភាពនិងសំភារអាសអាភាស មានន័យថា ជាសំភារដែលអាចមើលឃើញនឹងភ្នែកដូចជារូបថត ខ្សែវីដេអូ រួមទាំងសំភារ អេឡិចត្រូនិកដែលពិពណ៌នាអំពីកេរិ៍្ដភេទ ឬរូបភាពអាសអាភាសប្រហាក់ប្រហែលផ្សេង ទៀតធ្វើឱ្យរំភើប ឬរំជួលដល់ចំណុចផ្លូវភេទ ។
បើពិនិត្យទៅលើអង្គច្បាប់ឃើញថា អ្នកប្រព្រឹត្ដបទល្មើសដូចជនកំហូច នេត ខៃ នេះហាក់ដូចជាមានទោសស្រាលពេកណាស់ ប៉ុន្ដែទោះជាយ៉ាងណាការស៊ើបអង្កេតរបស់តុលាការពិតជា រកបន្ទុកដាក់បន្ថែមទៀត ដើម្បីរកយុត្ដិធម៌ឱ្យ អ្នកដែលត្រូវរងគ្រោះដោយសារជនឈ្មោះនេត ខៃ ដែលយកកិត្ដិយសស្ដ្រីភេទលេងសើចបែបនេះជាកំហុសឆ្គងធ្ងន់ធ្ងរជាងអ្នកបញ្ចូលរូបអាសអាភាសនៅតាមចិញ្ចើមផ្លូវទៅទៀត ព្រោះ ទី១-បានធ្វើឱ្យប៉ះពាល់ទៅដល់កិត្ដិយស នៃព្រះពុទ្ធសាសនាដែលជាសាសនារបស់រដ្ឋ ទី២-បានធ្វើឱ្យពិធីការតាមបែបសាសនានានា មានការប៉ះពាល់ ទី៣-គឺភាពអាក្រាតរបស់នារី ភេទដែលធ្វើឱ្យមានភាពអាម៉ាស់ប៉ះពាល់ដល់កិត្ដិយសស្ដ្រីភេទយ៉ាងធ្ងន់ធ្ងរ ៕
ចែករំលែកព័តមាននេះ