មន្ត្រីសាលាខណ្ឌច្បារអំពៅ ចំនួន៣រូប រកឃើញមានវិជ្ជមានកូវីដ១៩
- ភ្នំពេញ
មន្ត្រីសាលាខណ្ឌច្បារអំពៅ៣រូប បម្រើការនៅការិយាល័យច្រកចេញ-ចូលតែមួយ ចំណុះខណ្ឌច្បារអំពៅ ត្រូវបានពិនិត្យរកឃើញមានវិជ្ជមានវីរុសកូវីដ១៩ នៅវេលា
មន្ត្រីសាលាខណ្ឌច្បារអំពៅ៣រូប បម្រើការនៅការិយាល័យច្រកចេញ-ចូលតែមួយ ចំណុះខណ្ឌច្បារអំពៅ ត្រូវបានពិនិត្យរកឃើញមានវិជ្ជមានវីរុសកូវីដ១៩ នៅវេលា
រាជធានីភ្នំពេញ ៖ មន្ត្រីសាលាខណ្ឌច្បារអំពៅ៣រូប បម្រើការនៅការិយាល័យច្រកចេញ-ចូលតែមួយ ចំណុះខណ្ឌច្បារអំពៅ ត្រូវបានពិនិត្យរកឃើញមានវិជ្ជមានវីរុសកូវីដ១៩ នៅវេលាយប់ថ្ងៃទី០៩ ខែមិថុនា ឆ្នាំ២០២១ កន្លងទៅ ។
តាមការបញ្ជាក់អោយដឹងពីលោកចេង មុនីរ៉ា អភិបាលខណ្ឌច្បារអំពៅ បានប្រាប់កោះសន្តិភាពតាមរយៈទូរស័ព្ទនាព្រឹកថ្ងៃទី១១ ខែមិថុនា ឆ្នាំ២០២១នេះ អោយដឹងថា ៖ ពិតជាមានមន្ត្រីសាលាខណ្ឌ៣នាក់ ស្រីទាំង៣ ឆ្លងជំងឺកូវីដ១៩ ពិតប្រាកដមែន ហើយបច្ចុប្បន្នអ្នកទាំង៣ ត្រូវបានក្រុមគ្រូពេទ្យដឹកយកទៅព្យាបាលនៅមណ្ឌលសុខភាពចាក់អង្រែក្រោម ស្ថិតក្នុងខណ្ឌមានជ័យ ។
លោកអភិបាលខណ្ឌបន្ថែមថា ចំពោះក្រុមមន្ត្រីដែលមានការប៉ះពាល់ដោយផ្ទាល់ ឬប្រយោល ហើយមានការសង្ស័យលើអាការៈសុខភាពខ្លួនឯងនោះ គឺត្រូវធ្វើតេស្តសំណាករកមេរោគកូវីដ១៩ទាំងអស់ ហើយប្រសិនបើក្រោយលទ្ធផលនៃការតេស្តសំណាក បញ្ជាក់ថា អវិជ្ជមាននោះ អ្នកទាំងនោះគឺតម្រូវអោយធ្វើចត្តាឡីស័ក១៤ថ្ងៃនៅក្នុងវិទ្យាល័យច្បារអំពៅ ដើម្បីពិនិត្យតាមដានអាការៈសុខភាពបន្តទៀត ។
ទន្ទឹមនឹងនោះ លោកអភិបាល បញ្ជាក់ថា បើទោះបីជាមានការឆ្លងជំងឺកូវីដ១៩ ដល់មន្ត្រីសាលាខណ្ឌក៏ដោយ ក៏ដំណើរការការងារ និងការបម្រើប្រជាពលរដ្ឋ លើការផ្តល់សេវាសាធារណៈផ្សេងៗ គឺនៅដំណើរការជាធម្មតា ដូចសព្វមួយដងដដែល ដោយមានក្រុមមន្ត្រី ដែលមិនមានការប៉ះពាល់ជាមួយអ្នកវិជ្ជមានកូវីដ នៅបម្រើកិច្ចការងារជាធម្មតា ។
អ្វីជាការសំខាន់ គឺអាជ្ញាធរក្នុងសាលាខណ្ឌ នៅបន្តអនុវត្ត និងពង្រឹងបន្ថែមអោយបានខ្ពស់លើការអនុវត្តវិធានការសុខាភិបាល ពិសេសនោះ គឺ «៣ការពារ ៣កុំ» របស់សម្តេចតេជោ ហ៊ុន សែន ប្រមុខថ្នាក់ដឹកនាំនៃកម្ពុជា ។
សូមបញ្ជាក់ថា គិតត្រឹមវេលាព្រឹកថ្ងៃទី១១ ខែមិថុនា ឆ្នាំ២០២១នេះ ក្រុមមន្ត្រីជាច្រើននៅការិយាល័យមួយចំនួនចំណុះសាលាខណ្ឌ ដែលមានការពាក់ព័ន្ធដោយបានប៉ះពាល់ផ្ទាល់ និងប្រយោលជាមួយអ្នកវិជ្ជមាន ក៏បានធ្វើសំណាកជាបន្តបន្ទាប់ផងដែរ ដោយលទ្ធផលបញ្ជាក់ថា អវិជ្ជមាន ពោលគឺមិនទាន់រកឃើញមានមន្ត្រីដទៃណាផ្សេងទៀត មានការឆ្លង ក្រៅពីមន្ត្រី៣រូបដែលពិនិត្យឃើញវិជ្ជមានឡើយ ។
គួររំលឹកថា បើងាកទៅខាងសាលាខណ្ឌមានជ័យឯណោះវិញ រយៈពេល២ថ្ងៃ គឺថ្ងៃទី០៩ និងថ្ងៃទី១០ ក្រុមមន្ត្រីសាលាខណ្ឌ ចំនួន២១នាក់ ត្រូវពិនិត្យរកឃើញមានវិជ្ជមានកូវីដ១៩ ខណៈមន្ត្រីសាលាខណ្ឌ និងសង្កាត់ពាក់ព័ន្ធជាច្រើននាក់ បូកបញ្ចូលទាំងលោកអភិបាលខណ្ឌផងដែរ បានឆ្លងកាត់ការតេស្តសំណាកលើកទី១ហើយ ប៉ុន្តែលទ្ធផលបញ្ជាក់ថា អវិជ្ជមាន ។
សូមបញ្ជាក់ទៀតថា នៅក្នុងចំណោម២១នាក់ ដែលរកឃើញមានវិជ្ជមានកូវីដ១៩នោះ គឺមាន២នាក់ ជាជំនួយការផ្ទាល់ និងជាតៃកុងរថយន្តផ្ទាល់របស់លោកពេជ្រ កែវមុនី អភិបាលខណ្ឌមានជ័យផងដែរ ៕
ចែករំលែកព័តមាននេះ