ខេត្តកំពង់ឆ្នាំង ៖ រដ្ឋបាលក្រុងកំពង់ឆ្នាំង បន្ទាប់ពីចេញលិខិតជូនដំណឹងស្តីពីការបិទចំណត និងអាជីវកម្មអ្នករត់តាក់ស៊ីពីកំពង់ឆ្នាំង រាជធានីភ្នំពេញ និងពីរាជធានីភ្នំពេញមកខេត្តកំពង់ឆ្នាំង រួចមកនៅព្រឹកថ្ងៃទី១០ ខែមិថុនានេះ គេឃើញមន្ត្រីជំនាញនៃមន្ទីរសុខាភិបាលខេត្តកំពង់ឆ្នាំងចុះគេយកសំណាក អ្នកប្រកបមុខរបររត់តាក់ស៊ីជាង១០០នាក់ នៅទីតាំងចំណតរថយន្តផ្សារលើផ្ទាល់តែម្ដង ដែលមានទីតាំង ស្ថិតនៅក្នុងសង្កាត់ខ្សាម ក្រុងកំពង់ឆ្នាំង ។
សូមរំលឹកថា បន្ទាប់ពីរកឃើញអ្នកបើកបររថយន្តតាក់ស៊ីចំនួន២ នាក់ ម្នាក់មានទីលំនៅភូមិកណ្ដាលសង្កាត់កំពង់ឆ្នាំង ក្រុងកំពង់ឆ្នាំង និងម្នាក់ទៀតមានទីលំនៅភូមិប្អេរ សង្កាត់ប្អេរ ក្រុងកំពង់ឆ្នាំង រួចមកអាជ្ញាធរក្រុងកំពង់ឆ្នាំងបានប្រញាប់បិទទីតាំងចំណតផ្សារលើជាបន្ទាន់ ជាមួយគ្នានេះ ភោជនីយដ្ឋានមួយកន្លែងដែលជាប់នៅចំណតរថយន្តនោះមានយីហោឈ្មោះសុខសាន្ត ក៏ត្រូវបានបិទជាបណ្ដោះអាសន្នផងដែរ ។
បើតាមការបញ្ជាក់ពី លោក យិន សាវ៉េន អភិបាលក្រុងកំពង់ឆ្នាំង ដែលបានចុះបិទទីតាំងចំណតរថយន្ត និងអាហារដ្ឋាន មានយីហោសុខសាន្ត ជាប់នឹងចំណតរថយន្តខាងលើ គឺបន្ទាប់ពីរកឃើញអ្នកបើកបររថយន្តតាក់ស៊ី ២ ម្នាក់ឈ្មោះ វណ្ណា និងម្នាក់ទៀតឈ្មោះឡុង មានកូវីដ១៩ ។
ចំណែកប្រពន្ធឈ្មោះ ឡុង ដែលជាអ្នកលក់បាយនៅចំណតរថយន្តផ្សារលើនេះ រួមនឹងកូនម្នាក់ ម្ដាយចិញ្ចឹមម្នាក់ទៀតក៏ឆ្លងជំងឺនេះដែរ សរុប ៣នាក់ទៀតមានកូវីដ១៩ ។ ចំណែកឯភោជនីយដ្ឋានឈ្មោះ សុខសាន្ដ ហៅហាងតាឡុង ជាប់នឹងចំណតរថយន្តដែលត្រូវបានបិទខ្ទប់មិនឲ្យលក់ដូរដែរនោះ ព្រោះតែមានអ្នកបកប្រែចិនម្នាក់ ឆ្លៀតពេលទំនេររត់តុ និងសម្រាកនៅក្នុងហាងនោះ មានកូវីដ១៩ ។
ទោះយ៉ាងណា លោកបានបញ្ជាក់ថា នេះជាការធ្វើតេស្តបឋម ដែលមិនទាន់ផ្លូវការ តែប៉ុណ្ណោះ ។ ចំពោះលទ្ធផលនៃការយកសំណាកនៅព្រឹកថ្ងៃទី ១០ ខែមិថុនា ឆ្នាំ២០២១នេះ លើអ្នកប្រកប មុខរបររត់តាក់ចំនួន១០២នាក់ គឺអវិជ្ជមានទាំងអស់ ។
ចំណែកអ្នកពាក់ព័ន្ធ នៅក្នុង អាហារដ្ឋានសុខសាន្តហៅហាងតាឡុង ជាប់នឹងចំណតរថយន្តផ្សារលើចំនួន១៨នាក់ ក៏អវិជ្ជមានទាំងអស់ដែរ សរុបអ្នកយកសំណាកនៅព្រឹកថ្ងៃទី ១០ ខែមិថុនានេះចំនួន ១២០ នាក់ គឺអវិជ្ជមានទាំងអស់ ។ នេះបើតាមការបញ្ជាក់ពី លោកវេជ្ជបណ្ឌិត ងិន សារ៉េត អនុប្រធានមន្ទីរសុខាភិបាលខេត្តកំពង់ឆ្នាំង ៕
ចែករំលែកព័តមាននេះ