ខេត្តកំពង់ឆ្នាំង៖ អាជ្ញាធរក្រុងកំពង់ឆ្នាំង ​បានសម្រេច​បិទខ្ទប់ចំណតរថយន្តផ្សារលើ និងភោជនីយដ្ឋានមួយកន្លែង ដែលនៅជាប់នឹងចំណតរថយន្តនោះ កាលពីល្ងាចថ្ងៃទី៩ ខែមិថុនាឆ្នាំ២០២១។ វិធានការនេះ បានធ្វើឡើង បន្ទាប់ពី​រកឃើញអ្នកបើកបររថយន្តតាក់ស៊ី​ម្នាក់ និងក្រុមគ្រួសារ សរុប ៤នាក់ បាន​ឆ្លងកូវីដ១៩។

លោក យិន សាវ៉េន អភិបាលក្រុងកំពង់ឆ្នាំង ដែលបានចុះបិទទីតាំងចំណតរថយន្ត និងអាហារដ្ឋាន មានយីហោ «សុខសាន្ត» ជាប់នឹងចំណតរថយន្តខាងលើ បាន្យដឹងថា ការបិទខ្ទប់នេះ ធ្វើឡើង បន្ទាប់ពីរកឃើញអ្នកបើកបររថយន្តតាក់ស៊ី​ម្នាក់ ឈ្មោះ ឡុង មានទីលំនៅសង្កាត់ប្អេរ ក្រុងកំពង់ឆ្នាំង និង​ប្រពន្ធ ជាអ្នកលក់បាយ នៅចំណតរថយន្ត រួមនឹងកូន សរុប ៣នាក់ទៀត ឆ្លងកូវីដ១៩។

​ចំណែកឯភោជនីយដ្ឋានឈ្មោះ សុខសាន្ដ ជាប់នឹងចំណតរថយន្ត ដែលត្រូវបានបិទខ្ទប់ មិនឲ្យលក់ដូរដែរនោះ ក៏ព្រោះតែមាន​អ្នកបកប្រែចិនម្នាក់ ឆ្លៀតពេលទំនេរ មករត់តុ និងសម្រាកនៅ​ទីនោះ។ អ្នកបកប្រែចិននោះ បានឆ្លង​កូវីដ​។

ជាមួយគ្នាដែរ យោងតាម​របាយការណ៍របស់មណ្ឌលចត្តាឡីស័ក កម្រិត២ នៅសាលាគំរូ ក្នុង​ក្រុងកំពង់ឆ្នាំង បានបញ្ជាក់ពីការ​រកឃើញវិជ្ជមានកូវីដ​ ចំនួន ២នាក់ នៅភូមិស្រែព្រីង ដែលជាកម្មកររោងចក្រអឹមវ៉េ ផងដែរ។

ដោយឡែក សេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំង បានបញ្ជាក់ នៅថ្ងៃទី៩ ខែមិថុនានេះថា គិតចាប់ពីថ្ងៃទី៥ ​ដល់ថ្ងៃទី៨ ខែមិថុនា មន្ត្រីជំនាញនៃមន្ទីរសុខាភិបាល បានរកឃើញអ្នកឆ្លងគឺមានចំនួន ១៦នាក់។ ក្នុងនោះ ស្រុកកំពង់ត្រឡាច ២នាក់ (ម្នាក់ ជាសិស្ស ម្នាក់ជាកុមារ) ស្រុកសាមគ្គីមានជ័យ ចំនួន ១០​នាក់ ជាកម្មកររោងចក្រ និងនៅ​ស្រុកទឹកផុស ចំនួន  ៤នាក់ ក្នុងនោះ ៣នាក់ ជាកម្មកររោងចក្រ ម្នាក់ជាកសិករ។

សូមបញ្ជាក់ដែរថា ខេត្តកំពង់ឆ្នាំង មានអ្នកឆ្លងកូវីដ សរុ ចំនួន ៣១៩នាក់ ស្រី ២៣៩នាក់។ ក្នុងនោះ មានអ្នកជាសះស្បើយ សរុប ១៥៩នាក់ ស្រី ១១២នាក់៕ ពៅ សុខហ៊ាន