រាជធានីភ្នំពេញ ៖ ក្នុងពេលរដ្ឋាភិបាលបានសម្រេចបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាលកាលពីអំឡុងខែមេសា និងឧសភា ២០២១ ដើម្បីទប់ស្កាត់ការឆ្លងរាលដាលនៃកូវីដ១៩ ក៏បានធ្វើឱ្យអាជីវកម្មជាច្រើនត្រូវបានផ្អាក និងធ្វើឱ្យប៉ះពាល់ដល់ចំណូលរបស់អាជីវករទាំងនោះផងដែរ ។តែក្រោយពេលរដ្ឋាភិបាលសម្រេចបិទបញ្ចប់ការបិទខ្ទប់និងបើកឱ្យចរាចរណ៍នៅពេលយប់វិញបាននោះ ក្រុមអាជីវករមួយចំនួនក៏បានចាប់ផ្ដើមធ្វើអាជីវកម្មរបស់ខ្លួនឡើងវិញប៉ុន្តែពួកគេនៅតែជួបបញ្ហាប្រឈមដដែល ។
បុរសម្នាក់ដែលគេហៅថាតាម៉ាប់គោដុត លក់គោដុតនៅពេលរាត្រី នៅម្ដុំកំបូលបានឱ្យដឹងថា បន្ទាប់ពីរាជរដ្ឋាភិបាលបានសម្រេចបិទបញ្ចប់ការបិទខ្ទប់និងឱ្យពលរដ្ឋធ្វើដំណើរពេលយប់បានលោកអាចប្រកបអាជីវកម្មឡើងវិញបាន ប៉ុន្តែបើធៀបមុនពេលបិទខ្ទប់ ក៏ដូចជាមុនពេលព្រឹត្តិការណ៍សហគមន៍២០កុម្ភៈ២០២១ឃើញថាពេលនេះ នៅតែលក់មិនសូវដាច់ដូចមុនឡើង ព្រោះពលរដ្ឋជាច្រើនបាត់បង់ចំណូល ហើយក៏មិនអាចជួបជុំក្នុងការផឹកស៊ី បានដូចមុន ទើបធ្វើឱ្យការលក់មិនដូចមុនឡើយ ។ លោកបន្តថាពីមុនគោមួយក្បាល យើងលក់អស់ត្រឹមតែរយៈពេលតែពីរឬបីថ្ងៃ តែពេលនេះគោមួយក្បាលត្រូវលក់៥ថ្ងៃទៅ១អាទិត្យ ទើបលក់អស់ ។
អ្នកស្រីឃួន ស្រីស្រស់អ្នកដូរអាហារពេលយប់តិចតួច នៅតាមបណ្ដោយផ្លូវវេងស្រេងក៏បានឱ្យដឹងផងដែរថា ការលក់ដូរមិនដូចពីមុននោះឡើយ គឺមិនសូវមានមនុស្សដើរពេលយប់ដូចកាលមុនពេលមានការឆ្លងរាលដាលនៅក្នុងសហគមន៍ ។ ម្យ៉ាងទៀតទោះបីជារដ្ឋាភិបាលប្រកាសបិទបញ្ចប់ការបិទខ្ទប់ និងអាចធ្វើដំណើរពេលយប់បានមែន តែមនុស្សមួយចំនួននៅតែខ្លាចរអារមិនចេញពីផ្ទះ និងមួយវិញក្លឹបកម្សាន្ត បៀរហ្កាដិន ខារ៉ាអូខេ និងកន្លែងកម្សាន្តពេលរាត្រី ក៏នៅតែបន្តបិទដូច្នេះពួកគេក៏មិនចេញពីផ្ទះដែរ ។
លោកវន់ ពៅប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ក៏បានឱ្យដឹងថា នៅពេលដែលរដ្ឋាភិបាលបិទបញ្ចប់បម្រាមគោចរ ឃើញថាអ្នកប្រកបរបរមួយចំនួនអាចធ្វើរបរបានខ្លះៗ ដូចជាអ្នកដឹកជញ្ជូន អ្នកលក់អាហារកំប៉ិកកំប៉ុកពេលយប់ ជាដើម ប៉ុន្តែសម្រាប់ភោជនីយដ្ឋានធំៗមិនទាន់ប្រសើរឡើងវិញទេ ។
យ៉ាងណាក៏ដោយទោះបីជាអាជីវកម្មពេលរាត្រីមួយចំនួនបានបើកដំណើរឡើងវិញក្ដី វាក៏នៅតែមិនទាន់ប្រសើរឡើងដូចមុនដែរ និងនៅតែជួបបញ្ហាប្រឈមមួយចំនួន ជាក់ស្ដែងអ្នកដឹកជញ្ជូនពេលយប់ មិនអាចដឹកជូនភ្ញៀវរបស់ខ្លួនដូចមុនព្រោះតែការបន្តបិទ អាជីវកម្មធំៗពេលយប់ ដូចជាក្លឹបកម្សាន្ត រង្គសាលខារ៉ាអូខេ ភោជនីយដ្ឋានធំជាដើមមិនទាន់បើកនៅឡើយ ដែលធ្វើឱ្យចំណូលតិចតួច ។ ចំណែកអ្នកលក់ដូរវិញក៏មិនសូវសំបូរភ្ញៀវដូចមុនដែរ ដូច្នេះចំណូលក៏មិនទាន់ប្រសើរ តែក៏គ្រាន់បើជាងកាលបិទខ្ទប់ដែរ ។
លោកបានសំណូមពរដល់រដ្ឋាភិបាល ធ្វើយ៉ាងណាសូមបញ្ចប់ព្រឹត្តិការណ៍និងទប់ស្កាប់ការឆ្លងរាលដាលកូវីដ១៩បន្តទៀត និងជូយអប់រំនិងពង្រឹងប្រព័ន្ធការពារសុវត្ថិភាពដល់អាជីវកម្មរបស់ពលរដ្ឋ ដូចជាគោលការណ៍៣ការពារនិង៣កុំ ដើម្បីឱ្យការបើកអាជីវកម្មរបស់ពលរដ្ឋកម្ពុជានិងអាជីវករកាន់តែមានទំនុកចិត្តនិងប្រសិទ្ធភាពខ្ពស់ ។
គួររំលឹកថាស្ថានភាពកូវីដ១៩នៅក្នុងប្រទេសកម្ពុជា បើតាមរបាយការណ៍របស់ក្រសួងសុខាភិលបានបានឱ្យដឹងថា គិតត្រឹមព្រឹកថ្ងៃទី០៨ មិថុនា ២០២១នេះ កម្ពុជាមានអ្នកឆ្លងកូវីដ១៩សរុបចំនួន ៣៥.៥១១នាក់ ដោយក្នុងនោះ ក៏មានអ្នកស្លាប់ដោយសារកូវីដ១៩ចំនួន ២៧៨នាក់ផងដែរ ហើយរាជធានីភ្នំពេញ នៅតែកត្តាចំណុចក្ដៅនៃការឆ្លងរាលដាលនៃជំងឺនេះផងដែរ ៕
ចែករំលែកព័តមាននេះ