សារសំខាន់ នៃការអភិវឌ្ឍន៍បង្គន់អនាម័យសាធារណៈ
ខេត្តសៀមរាប ៖ នាថ្ងៃទី១៥វិច្ឆិកា២០១៥នេះ នៅក្រុងសៀមរាប បានបើកសិក្ខាសាលាផ្សព្វផ្សាយមួយស្តីពីសារសំខាន់នៃការអភិវឌ្ឍន៍បង្គន់អនាម័យសាធារណៈ ដោយលោក Casey Killian អនុប្រធាន
ខេត្តសៀមរាប ៖ នាថ្ងៃទី១៥វិច្ឆិកា២០១៥នេះ នៅក្រុងសៀមរាប បានបើកសិក្ខាសាលាផ្សព្វផ្សាយមួយស្តីពីសារសំខាន់នៃការអភិវឌ្ឍន៍បង្គន់អនាម័យសាធារណៈ ដោយលោក Casey Killian អនុប្រធានសមាគមបង្គន់អនាម័យពិភពលោក (WTA) បានលើកឡើងថា ក្នុងមួយឆ្នាំៗ នៅលើពិភពលោកមានមនុស្សរាប់លាននាក់ត្រូវបានបាត់បង់ជីវិតដោយសារកង្វះអនាម័យ ហើយបច្ចុប្បន្ននេះនៅលើពិភពលោកមានមនុស្សប្រមាណជា៧០០លាននាក់កំពុងរស់នៅក្នុងស្ថានភាពដែលពុំមានអនាម័យ ។
លោក Casey Killian និយាយយ៉ាងដូច្នេះថា នៅក្នុងពេលដែលមានអង្គសិក្ខាសាលាផ្សព្វផ្សាយមួយ ស្តីអំពីសារសំខាន់នៃការអភិវឌ្ឍន៍បង្គន់អនាម័យសាធារណៈ ។ អ្វីដែលជាការលើកឡើងរបស់លោក Casey Killian វាដូចជាសារព្រមានមួយបង្ហាញអំពីសារសំខាន់ នៃការអភិវឌ្ឍន៍បង្គន់អនាម័យសាធារណៈ ដែលបញ្ហានេះវាមិនត្រឹមតែពាក់ព័ន្ធជាមួយសុខភាពរបស់មនុស្សប៉ុណ្ណោះទេ តែវាជាចំណែក នៃការពង្រឹងសេវាកម្មទេសចរណ៍ផងដែរ ព្រោះមនុស្សពិតជាមិនអាចប្រកែកបានទេ ក្រោយពីការបរិភោគអាហារ គឺមានតម្រូវការត្រូវបន្ទោបង់កាកសំណល់ចោលវិញ ។
សិក្ខាសាលានេះសហការរៀបចំឡើងដោយក្រសួងទេសចរណ៍កម្ពុជា និងមានកិច្ចសហការគាំទ្រដោយសមាគមបង្គន់អនាម័យពិភពលោក និងសាលារដ្ឋធានី ស៊ូវ៉ុន នៃសាធារណរដ្ឋកូរ៉េ ក្នុងនោះរួមមានការចូលរួមធ្វើបទបង្ហាញដោយវាគ្មិនជាតិ អន្តរជាតិ មកពីតំបន់អាស៊ាន និងពិភពលោក ហើយកិច្ចដំណើរការនៃអង្គសិក្ខាសាលានេះគ្រោងនឹងដំណើរការរហូតដល់ថ្ងៃទី១៨ ខែវិច្ឆិកា ឆ្នាំ២០១៥ ។
លោក ឱក តារារិទ្ធិ អនុរដ្ឋលេខាធិការក្រសួងទេសចរណ៍បានបញ្ជាក់ថា ឧស្សាហកម្មទេសចរណ៍ គឺជាវិស័យផ្តួចផ្តើមមុនគេសម្រាប់ការអភិវឌ្ឍន៍ភាពស្អាត និងអភិវឌ្ឍន៍បៃតង ។ លោកបង្ហាញបន្ថែមថា ជាលទ្ធផល ក្រសួងទេសចរណ៍កម្ពុជាបានដាក់ចេញនូវគោលនយោបាយយុទ្ធនាការទីក្រុងស្អាត រមណីយដ្ឋានស្អាត និងសេវាល្អ នៅក្នុងទូទាំងប្រទេស ហើយបង្គន់អនាម័យសាធារណៈជាវិស័យមួយក្នុងចំណោមអន្តរវិស័យដទៃទៀត ដោយផ្តោតទៅលើការអភិវឌ្ឍន៍ប្រកបដោយចិរភាព និងការទទួលខុសត្រូវ ។
ក្នុងឱកាសនោះដែរ លោក ឱក តារារិទ្ធិ បានសម្តែងនូវការអរគុណចំពោះថ្នាក់ដឹនាំសមាគមបង្គន់អនាម័យពិភពលោក ដែលបានផ្តល់សង្គហៈអភិវឌ្ឍន៍បង្គន់អនាម័យសាធារណៈចំនួន២កន្លែងដល់កម្ពុជា នៅរាជធានីភ្នំពេញ និងនៅក្រុងសៀមរាប ហើយនឹងអាចផ្តល់មួយកន្លែងទៀតនៅខេត្តបាត់ដំបង ។
លោកអនុរដ្ឋលេខាធិការក្រសួងទេសចរណ៍បានវាយតម្លៃថា សង្គហៈអភិវឌ្ឍន៍របស់សមាគមបង្គន់ពិភពលោក(WTA)តាមរយៈសាលារដ្ឋធានី ស៊ូវ៉ុន គឺជាសញ្ញានយោបាយមួយសម្រាប់វិស័យមនុស្សធម៌ អភិវឌ្ឍន៍សង្គមជាតិ ពង្រឹងទំនាក់ទំនងការទូត និងកិច្ចសហប្រតិបត្តិការក្នុងតំបន់និងសាកលលោក ៕
ចែករំលែកព័តមាននេះ