ខេត្តកំពង់ឆ្នាំង៖ ផ្លូវលំមួយខ្សែ តភ្ជាប់ពីឃុំច្រណូក ទៅឃុំផ្លូវទូក ស្រុកកំពង់លែង ជាព្រះរាជអំណោយ ដ៏ថ្លៃថ្លារបស់ព្រះករុណា សម្តេចព្រះបរមនាថ នរោត្តម សីហមុនី…
ខេត្តកំពង់ឆ្នាំង៖ ផ្លូវលំមួយខ្សែ តភ្ជាប់ពីឃុំច្រណូក ទៅឃុំផ្លូវទូក ស្រុកកំពង់លែង ជាព្រះរាជអំណោយ ដ៏ថ្លៃថ្លារបស់ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កសាងរួចរាល់ជាស្ថាពរ ត្រូវបានមន្ទីរសាធារណការ និងដឹកជញ្ជូន ខេត្តកំពង់ឆ្នាំង កំពុងតែមមាញឹកក្នុងការជួសជុលថែទាំផ្លូវនេះ ជាប្រចាំ ដើម្បីឲ្យបានប្រើប្រាស់បានយូរអង្វែង។ ប្រជាពលរដ្ឋរស់នៅឃុំផ្លូវទូក មានសេចក្តីរីករាយ សប្បាយចិត្តក្រៃលែង។
លោក ខៀវ កៀត មេភូមិថ្នល់ឈើទាល ឃុំផ្លូវទូក ស្រុកកំពង់លែង បាននិយាយថា ក្រោយពីប្រជាពលរដ្ឋបន្លាស់ទីពីផ្ទះបណ្ដែតទឹក មករស់នៅលើគោក គឺពុំទាន់មានផ្លូវនៅឡើយទេ កាលណោះ ព្រះករុណា ព្រះបាទ នរោត្តម សីហមុនី ព្រះអង្គ សព្វព្រះរាជហទ័យ ប្រោសប្រទាននូវកំណាត់ផ្លូវមួយខ្សែ តភ្ជាប់ពីឃុំច្រណូក មកកាន់ឃុំផ្លូវទូក ដែលមានចម្ងាយ ១៤ ២០០គីឡូម៉ែត្រ។ ជាមួយគ្នានេះ ក្រសួងសាធារណការ និងដឹកជញ្ជូន បានកសាងបន្ថែមប្រវែង ចំនួន ២២គីឡូម៉ែត្រទៀត សរុបកំណាត់ផ្លូវនេះ មានប្រវែង ៣៦ ២០០ គីឡូម៉ែត្រ ទើបមកដល់ឃុំផ្លូវទូក។
លោកមេភូមិថ្នល់ឈើទាល បានបន្តថា ក្រោយការកសាងហើយ ផ្លូវតែងមានការខូចខាត ដោយ សារជំនន់ទឹកភ្លៀង និងទឹកជំនន់ទឹកទន្លេឡើង ជាដើម។ ហេតុនេះហើយ ខាងមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានយកចិត្តទុកដាក់ ជួសជុលថែទាំផ្លូវនេះ ជាប្រចាំ ទាំងប្រាំង និងវស្សា ដោយមិនឲ្យខូចខាតខ្លាំងឡើយ ធ្វើឱ្យប្រជាពលរដ្ឋពិតជាមានសេចក្តីរីករាយត្រេកអរក្រៃលែង។
លោកមេភូមិ ក៏បានរំលឹកពីអតីតកាលថា កាលនៅលើផ្ទះបណ្ដែតទឹក ពេលធ្វើដំណើរដោយផ្លូវទឹក ទៅកាន់ខេត្តកំពង់ឆ្នាំងម្ដងៗ គឺជួបការលំបាកខ្លាំងណាស់ សូម្បីតែការធ្វើដំណើរតាមកាណូតផ្ទាល់ខ្លួន ក៏ត្រូវចំណាយប្រេងមួយកាន ឬស្មើនឹង ៣០លីត្រដែរ ហើយបើពេលស្ទះកំប្លោកម្តងៗ មិនងាយធ្វើដំណើរទៅមុខបានស្រួលឡើយ។ ប៉ុន្តែចាប់តាំងពីពេលបន្លាស់ទី មកនៅលើគោក ការធ្វើដំណើរបានឆាប់រហ័ស ព្រោះបានផ្លូវមួយខ្សែដ៏ស្អាតនេះ បើប្រៀបធៀបពីការចំណាយវិញ ចាក់សាំងម៉ូតូ ត្រឹមតែ ១លីត្រ គឺដល់ខេត្តកំពង់ឆ្នាំងហើយ ខុសគ្នាឆ្ងាយណាស់ ចំណេញទាំងពេលវេលា និងថវិកា ហើយប្រសិនបើបងប្អូនមានជំងឺ ឬជូនស្ត្រីមានផ្ទៃពោះ ទៅកាន់មណ្ឌលសុខភាព ក៏កាន់រហ័ស និងទាន់ពេលវេលាដែរ។
ចំណែកលោក ឆាយ លាភា ប្រធានមន្ទីរសាធារណៈការ និងដឹកជញ្ជូន ខេត្តកំពង់ឆ្នាំង បានឱ្យដឹងថា ផ្លូវមួយខ្យែ ដែលមានប្រវែងសរុប ៣៦ ២០០គីឡូម៉ែត្រនេះ ជាផ្លូវលិចទឹក នៅខែវស្សា។ ម្លោះហើយ ខាងមន្ទីរ ត្រូវយកចិត្តទុកដាក់ជួសជុលថែទាំជាប្រចាំ សម្រាប់ប្រជាពលរដ្ឋ ក្នុងឃុំផ្លូវទូក ដែលកំពុងចាកចេញពីក្នុងទឹកមករស់នៅលើគោក៕ ពៅ សុខហ៊ាន
ចែករំលែកព័តមាននេះ