រាជធានីភ្នំពេញ ៖ យ៉ាងហោចណាស់រថយន្តចំនួន៣គ្រឿងបានរងការខូចខាតយ៉ាងដំណំ ក្នុងនោះមានរថយន្តម៉ាកហាយឡែនឌ័រចំនួន២គ្រឿង និងរថយន្តម៉ាកព្រូស១គ្រឿង បណ្ដាលរងការខូចខាតយ៉ាងដំណំ ដែលបង្កឡើងបើករថយន្តមួយគ្រឿងបើកបរលឿន និងខ្វះការប្រុងប្រយ័ត្នទៅបុករះជាបន្តបន្ទាប់នោះ។ កម្លាំងមានសមត្ថកិច្ចចុះមកធ្វើការសម្របសម្រួលអស់រយៈពេលជាច្រើនម៉ោងថៅកែមិនចេញមុខមកដោះស្រាយបានត្រឹមលើកម្រាមដៃដប់សំពះអង្វរ និងម្ចាស់រថយន្តយកទៅធ្វើការជួសជុលដោយខ្លួនឯងរៀងៗខ្លួន។
ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង១ និង៤៥នាទីរសៀល ថ្ងៃទី០៧ ខែមិថុនា ឆ្នាំ ២០២១ នៅចំណុចមុខអគារក្រុមហ៊ុនមួយកន្លែងដែលមានទីតាំងលេខលេខ៤៨ ផ្លូវលេខ៨៤ ក្នុងសង្កាត់ស្រះចក ខណ្ឌដូនពេញ។ រថយន្តដឹកខ្សាច់បង្កម៉ាកម៉ុងហ្គោល ពណ៌ខៀវ ពាក់ស្លាកលេខ ៧៣៩៣ ភព(ស្លាកលេខសខ្មៅ)។ ចំណែកឯរថយន្តរងគ្រោះមានទី១-ម៉ាកព្រូស ពណ៌ក្រហម ពាក់ស្លាកលេខភ្នំពេញ ២BJ-១៤៤0, ទី២-ម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AU-៣៩៥៨ និងទី៣-រថយន្តម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ ២AK-៧២៥៧(សរុប៤គ្រឿង)។
តាមប្រភពព័ត៌មានបានប្រាប់ឲ្យដឹងថា មុនពេលកើតហេតុគេបានឃើញរថយន្តដឹកខ្សាច់ធុនតូចបង្កមួយគ្រឿងខាងលើ ដែលបើកបរដោយបុរសម្នាក់ តាមបណ្ដោយផ្លូវលេខ៨៤ ធ្វើដំណើរក្នុងទិសដៅពីកើតទៅលិច។ តាមប្រភពដដែលបានប្រាប់បន្តទៀតថា លុះមកដល់ចំណុចកើតហេតុក៏ស្រាប់តែមានរថយន្តម៉ាកព្រូសមួយគ្រឿង បានបើកថយក្រោយចេញពីចំណត ក៏ត្រូវរថយន្តដឹកខ្សាច់ទៅបុកពេញទំហឹង ហើយខ្ទាតទៅបុកនឹងរថយន្តម៉ាកហាយឡែនឌ័រចំនួន២គ្រឿងទៀតដែលចតស្ងៀម បណ្ដាលឱ្យក្រពឹតរងការខូចខាតទាំង ៤គ្រឿងយ៉ាងដំណំដូចគ្នាតែម្ដង។ នៅលើដងផ្លូវលេខ៨៤ កន្លែងដែលបង្កគ្រោះថ្នាក់ចរាចរណ៍បុករះរថយន្តគ្រឿង ៤គ្រឿងខាងលើនេះដែរ គេសង្កេតឃើញលើផ្លូវម្ខាងមានរថយន្ដដាក់លក់ ដាក់លក់រាប់សិបគ្រឿង និងនៅលើផ្លូវម្ខាងទៀតជាចំណតរថយន្តដោយបន្សល់ទុកផ្លូវតូចចង្អៀតទើបងាយនឹងបង្កឲ្យមានគ្រោះថ្នាក់ចរាចរណ៍បែបនេះ។
ក្រោយពេលកើតហេតុ កម្លាំងមានសមត្ថកិច្ចមូលដ្ឋានខណ្ឌដូនពេញក៏បានចុះមកដល់កន្លែងកើតហេតុ ហើយតម្រូវឱ្យបុរសជាអ្នកបើកបររថយន្តដឹកខ្សាច់បង្កហៅថៅកែរបស់ខ្លួនមកធ្វើការនិយាយដោះស្រាយជាមួយនឹងភាគីខាងម្ចាស់រថយន្តរងគ្រោះទាំង៣គ្រឿង ក្នុងបំណងបញ្ចប់រឿង អស់រយៈពេលជាច្រើនម៉ោងតែមិនមានអ្នកតំណាងណាម្នាក់ចេញមុខមកធ្វើការដោះស្រាយនោះទេ។ ដោយមានការអាណិតអាសូរទៅដល់បុរសជាអ្នកបើកបររថយន្តដឹកខ្សាច់បង្កទើបម្ចាស់រថយន្តរងគ្រោះទាំង ៣គ្រឿងទទួលយកបានការដឹងកំហុស និងលុតជង្គង់លើកម្រាមដៃដប់សំពះអង្វរ ហើយក៏យករថយន្តទៅធ្វើការជួសជុលដោយខ្លួនឯងរៀងៗខ្លួនប៉ុណ្ណោះ៕ ដោយ ៖ ភី ផល
ចែករំលែកព័តមាននេះ