ខេត្តព្រះសីហនុ ៖ មន្ត្រីជំនាញបានថ្លែងប្រាប់បណ្តាញសារព័ត៌មាន នៅព្រលប់ថ្ងៃ០២ ខែមិថុនា ឆ្នាំ២០២១នេះថា ចំនួនអ្នកឆ្លងកូវីដ-១៩ ក្នុងខេត្តព្រះសីហនុប៉ុន្មានថ្ងៃចុងក្រោយនេះ បានកើនឡើងមិនទាន់ធូរស្បើយនៅឡើយទេ ដែលភាគច្រើននៅក្នុងស្រុកព្រៃនប់រួមមានឃុំបិតត្រាំង ឃុំជើងគោ និងបណ្តាឃុំមួយចំនួនទៀត។ ជាមួយគ្នានេះនៅក្រុងព្រះសីហនុ យោងតាមការធ្វើតេស្តសំណាកថ្មីៗបំផុត បង្ហាញថា ចំនួនអ្នកឆ្លងបានកើនឡើងវិញដែរ ដូចជានៅតំបន់ទំនប់រលកក្នុងសង្កាត់លេខ១ និងសង្កាត់លេខ៣ ម្តុំខាងលើអូរសំអាតជាដើម។
ករណីនេះទាំងអជ្ញាធររដ្ឋបាលខេត្ត ក្រុង ស្រុក សមត្ថកិច្ចចម្រុះ និងក្រុមគ្រូពេទ្យបានខិតខំចាត់វិធានការជាច្រើនដើម្បីទប់ស្កាត់ការចម្លងបន្ត និងអំពាវនាវដល់ពលរដ្ឋទាំងអស់ កុំធ្វេសប្រហេស ជាពិសេសកាត់បន្ថយឲ្យបានការជួបជុំគ្នាច្រើន តាមរយៈរក្សាគម្លាត ពាក់ម៉ាស និងចូលរួមអនុវត្តន៍តាមវិធានការនានាដែលរដ្ឋបាលខេត្តដាក់ចេញ ការពារកុំឲ្យកូវីដ-១៩ឆ្លងមកខ្លួនយើង គ្រួសារយើង និងសហគមន៍យើង។ ហើយជាមួយគ្នានេះនៅតំបន់ស្រុកព្រៃនប់ បច្ចុប្បន្ននៅបន្តបិទបម្រាមគោចរណ៍ពីម៉ោង8យប់ដល់5ព្រឹកដដែល៕ ដោយ ៖ ហ៊ុយ ចាន់ធួន
ចែករំលែកព័តមាននេះ