រាជធានីភ្នំពេញ៖ ក្នុងឆ្នាំ២០២១នេះក្រុមហ៊ុនរដ្ឋាករទឹកស្វយ័តក្រុងភ្នំពេញបានបង្ហាញផែនការអាជីវកម្មរបស់ខ្លួនថានឹងរកប្រាក់ចំណូលសរុបពីអាជីវកម្មឱ្យបានដល់ជាង៣៤៧ពាន់លានរៀល ពោលគឺមានការកើនប្រមាណជាង៧% បើប្រៀបធៀបនិងឆ្នាំ២០២០ ប្រាក់ចំណូលសរុបមានជាង៣២៤ពាន់លានរៀល។
យោងតាមរបាយការណ៍លទ្ធផលអាជីវកម្ម ឆ្នាំ២០២០របស់រដ្ឋាករទឹកស្វយ័តក្រុងភ្នំពេញបង្ហាញថា ឆ្នាំ២០២០រដ្ឋាករទឹកស្វយ័តក្រុងភ្នំពេញបានផលិតទឹកស្អាតបានជាង ២២៤លានម៉ែតគូប ,បង្កើនអតិថិជនថ្មីបានចំនួន១៧.៧១២បណ្តាញនិងបានរកប្រាក់ចំណូលសរុបជាង៣២៤ពាន់លានរៀល។សម្រាប់ទិសដៅអាជីវកម្មឆ្នាំ២០២១ គ្រោងផលិតទឹកស្អាតបានជាង២២៧លានម៉ែត្រគូប,បង្កើនអតិថិជនថ្មីចំនួន២៧.០០៦បណ្តាញនិងគ្រោងរកប្រាក់ ចំណូលសរុបបានជាង៣៤៧ពាន់លានរៀល។
ពាក់ព័ន្ធនិងការធ្វើអាជីវកម្មនេះបើតាម ឯកឧត្តម ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញបានឱ្យដឹងថា ការផ្គត់ផ្គង់ទឹកស្អាតជូនពលរដ្ឋនៅក្រុងភ្នំពេញ ក្នុងដែនសេវាកម្ម ដោយផ្អែកទៅលើផែនការដែលយើងបានធ្វើនៅដើមឆ្នាំនិងការអនុម័តរបស់ក្រុមប្រឹក្សាភិបាល ចាំបាច់យើងត្រូវផ្គត់ផ្គង់ទឹកឱ្យគ្រប់ទៅតាមផែនការគ្រោងទុក ហើយទន្ទឹមនិងនេះនៅចន្លោះមានជំងឺកូវីដ១៩និងការបិទខ្ទប់នេះក្តីក៏យើងនូវតែខិតខំធ្វើយ៉ាងណា ចែកវេនអ្នកប្រចាំការផលិតឱ្យបានគ្រប់គ្រាន់ជូនប្រជាពលរដ្ឋប្រើប្រាស់។
ឯកឧត្តម ស៊ឹម ស៊ីថា មានប្រសាសន៍ថា«តាមអ្វីដែលក្រុមប្រឹក្សាបានសម្រេច យើងនឹងបង្កើនប្រាក់ចំណូលសរុបក្នុងឆ្នាំ២០២១នេះឱ្យច្រើនជាងឆ្នាំ២០២០ ដោយផ្អែកទៅតាមផែនការដែលយើងបានដាក់ចេញ ផលិតទឹកឱ្យបានច្រើន, យើងត្រូវបង្កើនប្រវែងបណ្តាញចែកចាយទឹកនិងបង្កើនអតិថិជនជាង២ម៉ឺនកុងទ័រ ហើយចំណុចដែលយើងទទួលបានប្រាក់ចំណូលច្រើនជាងឆ្នាំទៅ គឺយើងបង្កើនអតិថិជនប្រើប្រាស់។លើសពីនេះ តាមរយៈការខិតខំរបស់និយោជិតខាងគ្រប់គ្រងប្រព័ន្ធការពារទប់ស្កាត់ទឹកបាត់បង់ក៏ជាចំណុចមួយនៃការបង្កើនប្រាក់ចំណូល» ។
ឯកឧត្តមសង្កត់ធ្ងន់ថា«យើងទទួលបានប្រាក់ចំណូលមិនមែនបានមកតែពីទឹកមួយមុខនោះទេ ។យើងបានចំណូលមកពីការតភ្ជាប់បណ្តាញ ចំណូលធ្វើសេវាកម្មទឹកស្អាតពីខាងក្រៅ ដោយយើងទទួលម៉ៅការបន្តនៅតាមបណ្តាខេត្តនានា »។
ឯកឧត្តម ស៊ឹម ស៊ីថា លើកឡើងថា ក្នុងបរិបទបិទខ្ទប់ហើយមានការអនុគ្រោះបង់ថ្លៃទឹកជំនួសរបស់ប្រជាពលរដ្ឋ តាមការអំពាវនាវរបស់រាជរដ្ឋាភិបាលរយៈពេល៣ខែ ថ្វីត្បិតមានការបង់ប្រាក់បែប។ យើងមានការគិតគូច្បាស់លាស់នូវចំនួនផ្ទះជួលដែលបានបិទខ្ទប់ យើងបានធ្វើការគណនាដឹងនូវអ្វីដែលយើងបានចំណាយ អីចឹងតាមការគិតគូអស់ប្រមាណ៧០០លានរៀល ហើយបើតាមការប៉ាន់ស្មាននៅពេលបញ្ចប់វិក័យបត្រក្នុងខែ៥នេះទៀត គ្រោងចំណាយអស់ជាង១.២០០លានរៀល ដើម្បីបង់ប្រាក់ជំនួសប្រជាពលរដ្ឋដែលជាកម្មករ កម្មការិនីជួលផ្ទះស្ថិតនៅតាមមូលដ្ឋានក្នុងក្រុងភ្នំពេញនិងក្រុងតាខ្មៅ៕
ចែករំលែកព័តមាននេះ