ប្រទេសមីយ៉ាន់ម៉ា៖ យោងតាមសារព័ត៌មាន ALJAZEERA ថ្មីៗនេះបានឱ្យដឹងថា និពន្ធនាយក ដែលគ្រប់គ្រងលំដាប់ជួរមុខ ត្រូវបានគេស្គាល់ថា Danny Fenster ត្រូវបានគេឃាត់ខ្លួន ការធ្វើដំណើរ នៅអាកាសយានដ្ឋាន ក្នុងទីក្រុងយ៉ាំងហ្គោន ខណៈពេលដែលលោករៀបនឹងធ្វើការហោះហើរទៅកាន់ប្រទេសម៉ាឡេស៊ី។
យោងតាមទស្សនាវដ្តីឯករាជ្យក្នុងស្រុកមួយនៅក្នុងប្រទេសមីយ៉ាន់ម៉ា បាននិយាយថា លោក Danny Fenster និពន្ធនាយក នៃទស្សនាវដ្តី Frontier កំពុងត្រូវបានឃុំខ្លួននៅក្នុងពន្ធនាគារ Insein បន្ទាប់ពីលោកត្រូវបានឃាត់ខ្លួន នៅអាកាសយានដ្ឋាន យ៉ាំងហ្គោន ដើម្បីត្រៀមចាកចេញ ដោយជើងហោះហើរអន្តរជាតិ។
លោក ហ្វេនស្ទឺរ (Fenster) ដែលមកពីតំបន់ the Detroit នៅសហរដ្ឋអាមេរិក លោកធ្លាប់ជាអតីតដែលធ្វើការនៅក្នុងសារព័ត៌មានឯករាជ្យមួយដែលមានឈ្មោះថា Myanmar Now ហើយលោកត្រូវបានគឹដឹងថា លោកគឺជាអ្នកកាសែតបរទេសទី៤ ដែលត្រូវបានឃុំខ្លួន បន្ទាប់ពីរដ្ឋប្រហារនៃរបបយោធាកើតឡើង នៅថ្ងៃទី ១ ខែកុម្ភៈ។
សូមជម្រាបថា អ្នកសារព័ត៌មានដែលត្រូវបានចាប់ខ្លួន៣នាក់មុន លោកហ្វេនស្ទឺរ (Fenster) គឺលោក Robert Bociaga ជាអ្នកធ្វើការក្រៅម៉ោង មកពីប្រទេស Poland អ្នកទី២ Yuki Kitazumi មកពីប្រទេសជប៉ុន។ និងអ្នកទី៣ គឺលោក Nathan Maungជាជនជាតិអាមេរិក ហើយការចាប់ខ្លួនលោកនៅការិយាល័យរបស់លោកផ្ទាល់ មានឈ្មោះថា Kamayut Media office ដែលលោកត្រូវបានចោទប្រកាន់ពីបទ បង្ហោះព័ត៌មានមិនពិត ហើយលោកត្រូវបាននាំមកតុលាការនៅដើម្បីខែនេះផងដែរ។
អ្នកតំណាងឱ្យទស្សនាវដ្តី Frontierបាននិយាយថា៖ «យើងមិនដឹងថាហេតុអ្វី បានជា ហ្វេនស្ទឺរ ត្រូវបានឃុំខ្លួន ហើយយើងមិនអាចទាក់ទងគាត់បានទេ តាំងពីព្រឹកមកនេះ។ យើងមានការព្រួយបារម្ភចំពោះសុខុមាលភាពរបស់គាត់ ហើយអំពាវនាវឱ្យមានការដោះលែងគាត់ជាបន្ទាន់។ អ្វីដែលជាអាទិភាពរបស់យើងត្រូវធ្វើនាពេលនេះ គឺត្រូវធានាថាគាត់មានសុវត្ថិភាព និងផ្តល់ជំនួយដែលគាត់ត្រូវការ»។
ចាប់តាំងពីរដ្ឋប្រហារមក ឧត្តមសេនីយ៍មីយ៉ាន់ម៉ា បានបង្ក្រាបការរាយការណ៍និងបិទរាល់ការប្រាស្រ័យទាក់ទងគ្នាតាមអ៊ិនធើណេត ការប្រើយុទ្ធសាស្ត្រដ៏ឃោរឃៅជាច្រើនកាន់តែខ្លាំងឡើងៗ ទៅលើអ្នកប្រឆាំងនិងអ្នកដែលបន្តតវ៉ាប្រឆាំងនឹងរដ្ឋប្រហារនៃរបបយោធានេះ។ ប្រព័ន្ធផ្សព្វផ្សាយឯករាជ្យក្នុងស្រុកជាច្រើន ត្រូវបានបញ្ជាឱ្យបិទ ហើយអ្នកកាសែតប្រហែល ៨០ នាក់ ត្រូវបានឃុំខ្លួន និងពាក់កណ្តាលនៃពួកគេត្រូវបានឃុំខ្លួនជាបណ្តោះអាសន្ន រង់ចាំការចោទប្រកាន់ ឬការជំនុំជម្រះក្តី។
គណៈកម្មាធិការការពារអ្នកកាសែត (CPJ) ដែលជាអ្នកលើកកម្ពស់សេរីភាពសារព័ត៌មាននៅជុំវិញពិភពលោក បានអំពាវនាវឱ្យមានការដោះលែងជាបន្ទាន់ និងដោយគ្មានលក្ខខណ្ឌផងដែរ។
នៅក្នុងសេចក្តីថ្លែងការណ៍របស់ CPJលោក Shawn Crispinជាអ្នកតំណាងមន្ត្រីជាន់ខ្ពស់ ក្នុងតំបន់អាស៊ីអាគ្នេយ៍នៃ CPJ បាននិយាយថា៖ «ការរឹតត្បិតសេរីភាពក្នុងការធ្វើដំណើររបស់អ្នកកាសែតបរទេស គឺជាការគំរាមកំហែងចុងក្រោយបង្អស់ ដល់សេរីភាពសារព័ត៌មាន នៅក្នុងប្រទេសមីយ៉ាន់ម៉ា»។
ជាមួយគ្នានេះដែរ ក្លឹបអ្នកទទួលបន្ទុកព័ត៌មានបរទេសនៃប្រទេសថៃ ក៏បានថ្កោលទោសចំពោះការចាប់ខ្លួននេះដែរ និងបានកត់សម្គាល់ថាទស្សនាវត្តី Frontier និង Myanmar Now គឺជាសារព័ត៌មានមានវិជ្ជាជីវៈ ហើយព័ត៌មានរបស់ពួកគេមិនមានភាពប្រឌិតនោះទេ។
ក្លឹបអ្នកទទួលបន្ទុកព័ត៌មានបរទេសឬ the FCC (The Foreign Correspondents Club ) បានចេញសេចក្តីថ្លែងការណ៍នៅលើទំព័រហ្វេសប៊ុករបស់ខ្លួនថា ខ្លួនបានកត់សម្គាល់ឃើញថា៖ «ចាប់តាំងពីរដ្ឋប្រហារនៅថ្ងៃទី ១ ខែកុម្ភៈមក ស្ថាប័នទាំងនេះបានចូលរួមចំណែកយ៉ាងខ្លាំង និងអស្ចារ្យក្នុងការផ្តិតយករូបភាពក៏ដូចជាព័ត៌មាន និងព្រឹត្តិការណ៍នានា នៅក្នុងប្រទេសមីយ៉ាន់ម៉ា ជូនដល់ពិភពលោកបានដឹង ប៉ុន្តែច្បាប់របស់របបយោធានេះបែរជាបានដាក់បន្ទុក ទៅលើការអត្ថាធិប្បាយឬការបោះពុម្ភផ្សាយ ដែលពួករបបយោធានេះគិតថា អ្នកទាំងនេះអាចធ្វើឱ្យពួកគេអន្តរាយ និងធ្វើឱ្យទស្សនៈពិភពលោក កាន់តែដាក់បន្ទុកទៅលើក្រុមយោធា។ ម្យ៉ាងវិញទៀតគឺរបបយោធានេះ ខ្លាចនូវរាល់អំពើរ ដែលខ្លួនបានធ្វើ លើជាតិសាសន៍ក៏ដូចជាជនស៊ីវិលផងដែរ»។
សូមជម្រាបជូនថា លោក Fenster មានអាយុ ៣៧ ឆ្នាំ បានចូលធ្វើការនៅ Frontier Myanmar នៅខែសីហា ឆ្នាំ ២០២០៕
ចែករំលែកព័តមាននេះ