ខេត្តស្វាយរៀង ៖ កម្មករ-កម្មការិនីប្រមាណជាង២០០០នាក់ បានសម្រុករត់ចេញពីតំបន់សេដ្ឋកិច្ចពិសេស តាយ សេង នៅក្រុងបាវិត ដោយមិនព្រមឱ្យក្រុមការងារយកសំណាកវិភាគធ្វើតេស្តរកវីរុសកូវីដ-១៩ ឡើយ នារសៀលថ្ងៃទី២៦ ខែឧសភា ឆ្នាំ២០២១ នេះ បើទោះបីជាអាជ្ញាធរ ប៉ូលីស និងសន្តិសុខ ជាច្រើនរូបក៏មិនអាចទប់ជាប់បានដែរ ។
តាមរយៈវីដេអូ គេឃើញសកម្មភាពកម្មករ-កម្មការិនី ជាច្រើនបានរត់សម្រុកចេញ ក្រៅតំបន់សេដ្ឋកិច្ចពិសេស ដោយខ្លះរត់ ខ្លះបើកម៉ូតូ ចេញទៅ ដែលទង្វើនេះគឺជាទង្វើខុសច្បាប់មួយដែលពួកគាត់មិនព្រមសហការជាមួយនឹងក្រុមគ្រូពេទ្យក្នុងការយកសំណាក់ធ្វើតេស្តរកកូវីដ-១៩ ។
ជាមួយគ្នានោះផងដែរ រដ្ឋបាលខេត្តស្វាយរៀង បានចេញសេចក្តីជូនដំណឹង និងបានអំពាវនាវដល់បងប្អូនកម្មករ កម្មការិនី ប្រជាពលរដ្ឋ អ្នកបើកបររថយន្តដឹកកម្មករ-កម្មការនីទាំងអស់ជ្រាបថា អំពីរឿងហេតុនេះថា កាលពីវេលាម៉ោង៣និយ៥០នាទីរសៀលនៅថ្ងៃទី២៦ ខែឧសភា ឆ្នាំ២០២១នេះ កម្មករ-កម្មការិនី រោងចក្រតម្លើងទោចក្រយាន អេ អេន ជេ (ខេមបូឌា) នៅក្នុងតំបន់សេដ្ឋកិច្ចពិសេស តាយ សេង ១ ស្ថិតនៅភូមិតាពៅ សង្កាត់បាវិត ក្រុងបាវិត ពេលកំពុងយកវត្ថុវិភាគសំណាក កម្មករ កម្មការិនីមួយចំនួនធំ បានសម្រុករត់ចេញពីរោងចក្រ ។
ទន្ទឹមនឹងនោះ «រដ្ឋបាលខេត្តស្វាយរៀង សូមកុំទាក់ទង និងពាក់ព័ន្ធ ដោយសារស្ថានភាពសុខភាពពួកគាត់អ្នកខ្លះមានបញ្ហាសុខភាព នឹងចម្លងទៅបងប្អូន ក៏ដូចជាអ្នកផ្ទះ ដូច្នេះសូមធ្វើចត្តាឡីស័កតាមដានសុខភាព ។ ប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់.ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វើតេស្តរកមេរោគ #កូវីដ១៩ (#COVID-19) ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ ខេត្ត 044 712 522 ឬ 097 503 4567 ដើម្បីមានវិធានការណ៍បន្ត ។
សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល១៤ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ។ យោងតាម ច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ «បុគ្គល ដែលមិនសហការជាមួយមន្ត្រីសុខាភិបាល ដើម្បីយកវត្ថុសំណាកទៅវិភាគរកមេរោគកូវីដ-១៩ ត្រូវផ្តន្ទាទោសជាពិន័យអន្តរការណ៍ពី ១លានរៀល ទៅ ៥លានរៀល»។
សូមបញ្ជាក់ថា រដ្ឋបាលខេត្តស្វាយរៀង បានចេញប្រកាសព័ត៌មាននៅថ្ងៃទី ២៦ ខែឧសភា នេះថា បើដោយយោងតាមសេចក្តីជូនព័ត៌មានរបស់ក្រសួងសុខាភិបាល នៅថ្ងៃទី២៦ ខែឧសភា ឆ្នាំ២០២១ បានប្រកាសពីការរកឃើញករណីវិជ្ជមានកូវីដ-១៩ថ្មី ចំនួន៣៣នាក់បន្ថែមទៀត ក្នុងទឹកដីខេត្តស្វាយរៀង ។
រដ្ឋបាលខេត្តស្វាយរៀង បានបញ្ជាក់ថា នៅក្នុងខេត្តស្វាយរៀងកន្លងមក បានរកឃើញអ្នកវិជ្ជមានកូវីដ-១៩ សរុបចំនួន៥៨៣នាក់, ករណីជាសះស្បើយចំនួន៣៦៩នាក់, អ្នកជំងឺកំពុងសម្រាកព្យាបាលចំនួន៣០៨នាក់, និងករណីស្លា.ប់ចំនួន៥នាក់។
ចែករំលែកព័តមាននេះ