លោក ជាវ តាយ អភិបាលខេត្តកំពតបានទម្លាយពាក្យឱ្យដឹងថា លោកបានឱ្យក្រុមការងារជំនាញចុះទៅហាមឃាត់ក្រុមហ៊ុនដែលកំពុងដឹកដីចាក់លុបរំលោភយកទាំងដុលនូវអាងស្ដុកទឹកដងទង់រួចហើយ តែរហូតមកទល់ពេលនេះលោកនៅមិនទាន់ឃើញរបាយការត្រឡប់មកលោកវិញនោះទេ ។លោកបាននិយាយឱ្យដឹងបន្តទៀតថា លោកមិនអនុញ្ញាតឱ្យអ្នកណាម្នាក់មកបំពានយកដីរដ្ឋឡើយ តែមុននឹងយើងចាត់វិធានការផ្លូវច្បាប់យើងត្រូវបង្កើតក្រុមជំនាញដើម្បីស្រាវជ្រាវទើបអាចបញ្ជាក់បានថា តើខុសច្បាប់ឬត្រូវច្បាប់ ។
យ៉ាងណាក៏ដោយលោកបានបញ្ជាក់ថា បើក្រុមហ៊ុននៅបន្តចាក់បានន័យថាក្រុមហ៊ុនកំពុងឆ្លៀតពេលថ្ងៃឈប់សម្រាកលួចចាក់បន្ថែមហើយ លោកថាពេលស្រាវជ្រាវចប់ លោកនឹងឆ្លើយតបជូនអ្នកសារព័ត៌មានវិញ ។ចំណែកលោក ដាញ់ ដារី ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកំពត បាន ថ្លែងថា ករណីលុបបឹងដងទង់ ដ៏គគ្រឹកគគ្រេងនៅក្បែរសាលា ស្រុកដងទង់កាលពីពេលថ្មីៗនោះ គឺពុំមានច្បាប់អនុញ្ញាតទេ ។ អ្នកដែលប្រព្រឹត្តដូចគាស់ក្រោលទាំងថ្ងៃនេះជាកូនស្រីរបស់ លោកអភិបាលស្រុកដងទង់ចំតួតែម្តង បានជាក្លាហានម្លុឹងៗ ។
បើតាមលោកប្រធានមន្ទីររៀបចំដែនដីរូបនេះថា ដីបឹងដងទង់នោះ គឺជាដីដែលគ្មានឈ្មោះពលរដ្ឋណាម្នាក់កាន់កាប់ទេ ព្រោះពេលមន្ត្រីសុរិយោដីចុះទៅធ្វើប្លង់ គឺពុំមានប្រជាជនណាម្នាក់មកអះអាង ឬបង្ហាញលិខិតសម្គាល់់អ្វីថាជាដីរបស់ខ្លួនទេ ។ ដូច្នេះដីនោះគឺពុំត្រូវបានប្រគល់ឲ្យអ្នកណាឡើយ ជាដីបឹងស្តុកទឹកសម្រាប់តម្រូវការសាធារណៈដែលអ្នកគ្រប់គ្រងដោយរដ្ឋ ។តាមការលើកឡើងរបស់លោកប្រធានមន្ទីររៀបចំដែនដីរូបនេះបានបញ្ជាក់យ៉ាងច្បាស់ថា ដីបឹងដងទង់ គឺពុំបានបែងចែក ឬប្រគល់ទៅឲ្យអ្នកណាម្នាក់ទេ តើហេតុអ្វី បានជា ក្រុមហ៊ុនរបស់លោកស្រី ប៊ូ ចាន់ធឿន កូនលោកអភិបាលស្រុកហ៊ានចាក់ដីលុបបឹងនោះដែលមានទំហំជាង១០០ហិកតាដើម្បីសង់ផ្ទះល្វែង ?យ៉ាងណាក៏ដោយ បើតាមការលើកឡើងរបស់ប្រភពខ្លះថា រឿងអីដែលក្រុមហ៊ុនរបស់ លោកស្រី ប៊ូ ចាន់ធឿន មិនហ៊ានចាក់ដីលុបបឹងជាង១០ហិកតានោះ បើគាត់គឺជាកូនស្រីរបស់ចៅហ្វាយស្រុកដងទង់ទៅហើយនោះ ។
គួរបញ្ជាក់ថា អាងទឹកដងទង់ទំហំប្រមាណជាង១០ហិកតា ស្ថិតនៅក្នុងភូមិសុភី ឃុំដងទង់ ស្រុកដងទង់ ខេត្តកំពត ត្រូវបានក្រុមហ៊ុនរបស់ លោកស្រី ប៊ូ ចាន់ធឿន ចាក់ដីលុបកាលពីពេលថ្មីៗកន្លងទៅនេះ ដើម្បីរៀបចំធ្វើផ្ទះល្វែងលក់ដូចសំណង់ផ្ទះល្វែងដែលគាត់កំពុងមាននៅតំបន់នោះ ។អាងទឹកដងទង់នេះ គឺជាអាងស្តុកទឹកដែលប្រជាពលរដ្ឋ ប្រើប្រាស់ជាយូរណាស់មកហើយ តាំងពីដូនតាមកម្ល៉េះ ជាអាងទឹកពីបុរាណកាល ប៉ុន្តែកាលពីពេលថ្មីៗនេះ ស្របពេលដែលមានការផ្ទុះឡើងនូវជំងឺកូវីដ១៩ ក្នុងសហគមន៍ដែលគ្រប់គ្នាមិនហ៊ានដើរហើរទៅណានោះ ស្រាប់តែមានគ្រឿងចក្ររាប់សិបគ្រឿង ដែលគេដឹងថា គឺជារបស់ក្រុមហ៊ុនលោកស្រី ប៊ូ ចាន់ធឿន បានសម្រុកដឹកដីយកមកចាក់លុបបឹងនោះ ដោយគេមិន ឃើញអាជ្ញាធរចាត់វិធានការអ្វីឡើយ ។
ប្រភពពីមេការសំណង់ផ្ទះល្វែងរបស់កូនស្រីលោកអភិបាលស្រុកដងទង់ទម្លាយប្រាប់អ្នកកាសែតថា គាត់បានឃើញកូនប្រុសលោកអភិបាលខេត្តចេញចូលសំណង់ផ្ទះល្វែងរបស់កូនស្រីលោកអភិបាលស្រុកដងទង់ ដែលជាអ្នកចាក់ដីជាង១០ហិកតានេះដែរទំនងដឹកគ្រឿងសំណង់ចូល និងជាដៃគូជាមួយគ្នា ។យ៉ាងណាក៏ដោយ ចាំមើលកណ្តាប់ដៃដែក ឯកឧត្តមជាវ តាយ អភិបាលខេត្តកំពត តើបញ្ជាឱ្យកាយដីចេញវិញឬក៏រុញទូកបណ្តោយទឹក ? ប្រសិនបើកូនប្រុសអភិបាលខេត្តហក់ចូលមែន…សង្ស័យនយោបាយរុញទូកបណ្តោយទឹកអាចនឹងមាន ព្រោះរួមដៃគ្នាយកដីរដ្ឋជាង១០ហិកតាសង់ផ្ទះល្វែងលក់ ប្រាកដជាក្លាយជាសេដ្ឋីថ្មីប្លែកជាងគេមិនខានឡើយ សម័យកូវីដរាតត្បាតនេះ…ចាំមើលកណ្តាប់ដៃដែក អភិបាលខេត្ត…ហេ ! ហេ !
ចែករំលែកព័តមាននេះ