ខេត្តកំពត ៖ លោកជាវ តាយ អភិបាលខេត្តកំពត បានអោយដឹងថា លោកបានអោយក្រុមការងារជំនាញចុះទៅហាមឃាត់ក្រុមហ៊ុនដែលកំពុងដឹកដីចាក់អាងស្ដុកទឹកដងទង់រួចហើយ តែរហូតមកទល់ពេលនេះ លោកនៅមិនទាន់ឃើញរបាយការណ៍ត្រឡប់មកលោកវិញនោះទេ។ លោកបន្តទៀតថា…
ខេត្តកំពត ៖ លោកជាវ តាយ អភិបាលខេត្តកំពត បានអោយដឹងថា លោកបានអោយក្រុមការងារជំនាញចុះទៅហាមឃាត់ក្រុមហ៊ុនដែលកំពុងដឹកដីចាក់អាងស្ដុកទឹកដងទង់រួចហើយ តែរហូតមកទល់ពេលនេះ លោកនៅមិនទាន់ឃើញរបាយការណ៍ត្រឡប់មកលោកវិញនោះទេ។
លោកបន្តទៀតថា លោកមិនអនុញ្ញាតអោយអ្នកណាម្នាក់ហ៊ានបំពានយកដីរដ្ឋឡើយ តែមុននឹងយើងចាត់វិធាត់ការផ្លូវច្បាប់ យើងត្រូវបង្កើតក្រុមជំនាញដើម្បីស្រាវជ្រាវទើបអាចបញ្ជាក់បានថា តើខុសច្បាប់ ឬត្រូវច្បាប់?
យ៉ាងណាក៏ដោយ លោកបានបញ្ជាក់ថា បើក្រុមហ៊ុននៅបន្តចាក់បានន័យថា ក្រុមហ៊ុនកំពុងឆ្លៀតពេលថ្ងៃឈប់សម្រាកលួចចាក់បន្ថែម ហើយលោកថា ពេលស្រាវជ្រាវ ចប់លោក និងឆ្លើយតបជូនអ្នកសារព័ត៌មានវិញ។
ចំណែកលោក ដាញ់ ដារី ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកំពត បានថ្លែងថា ករណីលុបបឹងដងទង់ដ៏គគ្រឹកគគ្រេងនៅក្បែរសាលាស្រុកដងទង់កាលពីពេលថ្មីៗនោះ គឺពុំមានច្បាប់អនុញ្ញាតទេ។
បើតាមលោកប្រធានមន្ទីររៀបចំដែនដីរូបនីយកម្មនេះថា ដីបឹងដងទង់នោះ គឺជាដីដែលគ្មានឈ្មោះ ព្រោះពេលមន្ត្រីសុរិយោដីចុះទៅធ្វើប្លង់ គឺពុំមានប្រជាជនណាម្នាក់មកអះអាង ឬបង្ហាញលិខិតសំគាល់អ្វីថា ជាដីរបស់ខ្លួនទេ ដូច្នេះដីនោះគឺពុំត្រូវបានប្រគល់ឲ្យអ្នកណាឡើយ។
តាមការលើកឡើងរបស់លោកប្រធានមន្ទីររៀបចំដែនដីរូបនេះបានបញ្ជាក់យ៉ាងច្បាស់ថា ដីបឹងដងទង់ គឺពុំបានបែងចែក ឬប្រគល់ទៅឲ្យអ្នកណាម្នាក់ទេ តើហេតុអ្វីបានជាក្រុមហ៊ុនរបស់លោកស្រី ប៊ូ ចាន់ធឿន ហ៊ានចាក់ដីលុបបឹងនោះដើម្បីសង់ផ្ទះល្វែង?
យ៉ាងណាក៏ដោយ បើតាមការលើកឡើងរបស់ប្រភពខ្លះថា រឿងអីដែលក្រុមហ៊ុនរបស់លោកស្រី ប៊ូ ចាន់ធឿន មិនហ៊ានចាក់ដីលុបបឹងជាង១០ហិកតានោះ បើគាត់គឺជាកូនស្រីរបស់ចៅហ្វាយស្រុកដងទង់ទៅហើយ។
គួរបញ្ជាក់ថា អាងទឹកដងទង់ទំហំប្រមាណជាង១០ហិចតា ស្ថិតនៅក្នុងភូមិសុភី ឃុំដងទង់ ស្រុកដងទង់ ខេត្តកំពត ត្រូវបានក្រុមហ៊ុនរបស់លោកស្រី ប៊ូ ចាន់ធឿន ចាក់ដីលុបកាលពីពេលថ្មីៗកន្លងទៅនេះ ដើម្បីរៀបចំធ្វើផ្ទះល្វែងលក់។ អាងទឹកដងទង់នេះ គឺជាអាងស្តុកទឹកដែលប្រជាពលរដ្ឋប្រើប្រាស់ជាយូរណាស់មកហើយ ប៉ុន្តែកាលពីពេលថ្មីៗនេះ ស្របពេលដែលមានការផ្ទុះឡើងនូវជំងឺកូវីដ១៩ក្នុងសហគមន៍ ដែលគ្រប់គ្នាមិនហ៊ានដើរហើរទៅណានោះ ស្រាប់តែមានគ្រឿងចក្ររាប់សិបគ្រឿង ដែលគេដឹងថា គឺជារបស់ក្រុមហ៊ុនលោកស្រី ប៊ូ ចាន់ធឿន បានសម្រុកដឹកដីយកមកចាក់លុបបឹងនោះ ដោយគេមិនឃើញអាជ្ញាធរចាត់វិធានការអ្វីឡើយ៕
ចែករំលែកព័តមាននេះ