រាជធានីភ្នំពេញ ៖ ក្នុងវិបត្តិនៃជំងឺកូវីដ១៩ សកម្មភាពនៃការទិញលក់ដីធ្លី មានការថមថយខ្លះ តែតម្លៃហាក់មិនមានការប្រែប្រួលនោះទេ បើទោះបីជាអ្នកទិញចង់បានតម្លៃទាប ដោយគិតថាក្នុងវិបត្តិយ៉ាងណាក្ដីតែអ្នកលក់នៅរក្សាតម្លៃថេរ ។ បើតាមលោកកែវ…
រាជធានីភ្នំពេញ ៖ ក្នុងវិបត្តិនៃជំងឺកូវីដ១៩ សកម្មភាពនៃការទិញលក់ដីធ្លី មានការថមថយខ្លះ តែតម្លៃហាក់មិនមានការប្រែប្រួលនោះទេ បើទោះបីជាអ្នកទិញចង់បានតម្លៃទាប ដោយគិតថាក្នុងវិបត្តិយ៉ាងណាក្ដីតែអ្នកលក់នៅរក្សាតម្លៃថេរ ។
បើតាមលោកកែវ សុជាតិ ប្រធានក្រុមហ៊ុនអចលនទ្រព្យ KW Cambodia ប្រចាំខេត្តកំពតបានឱ្យដឹងថា នៅក្នុងវិបត្តិកូវីដ១៩ ថ្វីត្បិតតែសកម្មភាពទិញលក់ដីធ្លីនៅក្នុងខេត្តកំពតមានការថមថយបន្តិចក្ដី តែតម្លៃហាក់នៅទ្រឹងល្អណាស់ ដែលធ្វើឱ្យការចរចាពីរឿងតម្លៃមិនសូវត្រូវរ៉ូវគ្នា ព្រោះអ្នកលក់ចង់បានតម្លៃខ្ពស់ ចំណែកអ្នកទិញវិញ ចង់បានតម្លៃទាបជាងទីផ្សារ ។
លោកបន្តថា អ្នកមានលុយគេចង់បានដីនៅតំបន់ល្អហើយតម្លៃទាបជាងទីផ្សារប្រមាណ៤០ទៅ៥០ភាគរយ ចំនែកអ្នកលក់វិញចង់បានតម្លៃទីផ្សារឬក្រោមទីផ្សារបន្តិច ដូចជាបញ្ចុះត្រឹម២០ភាគរយក៏ពួកគេលក់ដែរ តែ អ្នកទិញចង់បានទាបជាងនេះ ទើបធ្វើឱ្យការចរចាពីតម្លៃដីមិនត្រូវរ៉ូវគ្នានិងធ្វើឱ្យការទិញលក់មិនសូវមានក្នុងដំណាក់កាលនៃការរីករាលដាលនៃជំងឺកូវីដ១៩ ។
លោកបន្ថែមថា ថ្វីត្បិតតែសកម្មភាពនៃការទិញលក់ដីធ្លី និងអចលនទ្រព្យនៅក្នុងខេត្តកំពតមិនសូវមានក្ដីតែគម្រោងអភិវឌ្ឍន៍ធំៗមួយចំនួននៅក្នុងខេត្តនេះនៅតែបន្តជាសាងសង់ជាពិសេសគម្រោងរបស់វិនិយោគិនក្នុងស្រុកដែលមានទុនគ្រប់គ្រាន់ក្នុងការសាងសង់ ។
បើតាមលោកលឹម រដ្ឋា ភ្នាក់ងារអចលនទ្រព្យប្រចាំខេត្តកំពតនិងកែបក៏បានឱ្យដឹងផង ក្នុងពេលវិបត្តិកូវីដ១៩ការទិញលក់ពិតជាមានការថមថយមែនជាពិសេសក្នុងអំឡុងពេលរដ្ឋាភិបាលសម្រេចបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាល ដែលធ្វើឱ្យអ្នកទិញដីមួយចំនួនត្រូវជាប់គាំងក្នុងផ្ទះមិនអាចចេញធ្វើដំណើរឆ្លងខេត្តបាន ។លោកថា៖«ទោះបីជាសកម្មភាពនៃការទិញលក់មានការថមថយក្ដី តែតម្លៃមិនមានការប្រែប្រួលធ្លាក់ចុះនោះទេ ។ បើមានគឺមានសម្រាប់តែម្ចាស់ដីដែលត្រូវការលក់បន្ទាន់និងត្រូវការលុយប្រើការក្នុងពេលវិបត្តិនេះទេ តែមិនច្រើននោះឡើយ » ។
លោកឌឹត ចណ្ណាប្រធានក្រុមហ៊ុនអចលនទ្រព្យឡាក់គី ក៏បានឱ្យដឹងផងដែរថា អ្នកមានលុយគេនៅរក្សាលុយរបស់គេដដែល ហើយជាពេលវេលាដែលគេត្រូវរង់ចាំមើល ពីស្ថានភាព តែបើសិនជាដីតំបន់ណាដែលមានតម្លៃទាបជាងទីផ្សារនិងគិតថាអាចចំណេញនៅពេលអនាគតគឹនឹងចាប់ឱកាសនោះ ដើម្បីទិញទុកចំណេញនៅពេលចប់វិបត្តិ ៕
ចែករំលែកព័តមាននេះ