ខេត្តត្បូងឃ្មុំ ៖ ប្រជាពលរដ្ឋក្មេងចាស់ប្រុសស្រីចំនួន៣៤នាក់បានពុលនំបុ័ងដាក់សាច់ដោយមានអាការៈវិលមុខ និងក្អួតចង្អោរ ត្រូវបាននាំទៅសង្គ្រោះជាបន្ទាន់នៅមន្ទីរពេទ្យ ដែលហេតុការណ៍នេះកើតឡើងកាលពីវេលាម៉ោង៣ និង៣០នាទីរសៀល ថ្ងៃទី២៩ តុលា ២០១៥ ស្ថិតនៅភូមិចង្គុំទី១ ឃុំទន្លូង ស្រុកមេមត់ ដែលរហូតមកដល់រសៀលថ្ងៃទី៣០ តុលានេះប្រជាពលរដ្ឋចំនួន២២នាក់កំពុងតែសង្គ្រោះនៅមន្ទីរពេទ្យស្រុកមេមត់ ចំពោះមូលហេតុច្បាស់លាស់នោះគេមិនទាន់រកឃើញនូវឡើយទេ ។
តាមសមត្ថកិច្ចមូលដ្ឋានប្រាប់ឲ្យដឹងថា មានជនជាតិវៀតណាមម្នាក់ឈ្មោះ ង្វៀង យាំងរូវ ភេទប្រុស អាយុ៣៨ឆ្នាំ មានទីលំនៅភូមិថ្មី ឃុំតឹងហា ស្រុកតឹងចូវ ខេត្តតៃនិញ ប្រទេសវៀតណាម បានជិះម៉ូតូដឹកនំបុ័ងដាក់សាច់ដើរលក់នៅតាមភូមិខាងលើ ជាប់ព្រំប្រទល់ជាមួយប្រទេសវៀតណាម នារសៀលថ្ងៃខាងលើប្រជាពលរដ្ឋបាននាំគ្នាទិញហូប ក្រោយមកស្រាប់តែមានអាការៈពុលក្អួតចង្អោរជាបន្តបន្ទាប់រហូតដល់ទៅជាង៣០នាក់ឯណោះ ។
សមត្ថកិច្ចបានប្រាប់បន្តឲ្យដឹងទៀតថា ពេលដែលមានហេតុការណ៍នេះបង្កឲ្យមានការភ្ញាក់ផ្អើលពេញភូមិចង្គុំទី១ ក្នុងនោះគេឃើញអ្នកដែលមានអាការៈធ្ងន់ត្រូវបានសាច់ញាតិប្រញាប់ដឹកទៅសង្គ្រោះជាបន្ទាន់នៅមន្ទីរពេទ្យបង្អែកស្រុកមេមត់ ហើយលុះនៅព្រឹកព្រលឹមថ្ងៃទី៣០ តុលា ពេលដែលបុរសជនជាតិវៀតណាមនោះដឹកនំបុ័ងតាមម៉ូតូចេញតាមច្រករបៀងត្រពាំងឫស្សី ដោយមានចំនួន២០០នំបុ័ងដើម្បីមកលក់នៅក្នុងទឹកដីកម្ពុជា មានឃុំរូង ឃុំចាន់មូល និងឃុំជាំតាម៉ៅ ស្រុកមេមត់ សមត្ថកិច្ចក៏បានហៅមកធ្វើការសាកសួរ និងទិញនំប៉័ងដាក់សាច់មួយចំនួនប្រគល់ទៅឲ្យខាងសុខាភិបាលដើម្បីយកទៅពិសោធន៍នៅរាជធានីភ្នំពេញ ។
ចំពោះការពុលនៅរសៀលថ្ងៃទី២៩ តុលា សមត្ថកិច្ចមិនអាចរកវត្ថុតាងមកពិនិត្យបាននោះទេ ដោយសារតែពួកគាត់នាំគ្នាហូបអស់រលីងទៅហើយ ។
ចំណែកលោកវេជ្ជបណ្ឌិត នុត មុនី ប្រធានការិយាល័យបច្ចេកទេស នៃមន្ទីរសុខាភិបាលខេត្តត្បូងឃ្មុំ មានប្រសាសន៏ឲ្យដឹងដែរថា នៅពេលដែលមានហេតុការណ៍ភ្ញាក់ផ្អើលពុលនំបុ័ងដាក់សាច់នោះ អ្នកភូមិចង្គុំទី១ ឃុំទន្លូង ស្រុកមេមត់ ដែលមានអាការៈពុលក្អួតចង្អោរ មានលក្ខណៈធ្ងន់ចំនួន២២នាក់ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យបង្អែកស្រុកមេមត់ ដោយបានបន្តោងសេរ៉ូម ហើយអ្នកភូមិចំនួន១២នាក់ទៀតមានលក្ខណៈស្រាលនោះ ត្រូវបានព្យាបាលនៅមណ្ឌលសុខភាព ។
លោកវេជ្ជបណ្ឌិត នុត មុនី ប្រធានការិយាល័យបច្ចេកទេសបញ្ជាក់ថា រហូតមកដល់ល្ងាចថ្ងៃទី៣០ តុលានេះ ប្រជាពលរដ្ឋដែលនាំមកសង្គ្រោះនៅមន្ទីរពេទ្យនោះមិនទាន់វិលត្រឡប់ទៅផ្ទះវិញទេ ហើយនំបុ័ងដាក់សាច់ដែលទិញបាននៅព្រឹកថ្ងៃទី៣០ តុលា នឹងយកទៅពិសោធន៍នៅរាជធានីភ្នំពេញ ដើម្បីរកមូលហេតុពិតប្រាកដ ៕
ចែករំលែកព័តមាននេះ