ខេត្តពោធិ៍សាត់ ៖ ស្ត្រីពិការភ្នែកទាំងសងខាង និងដៃម្ខាង ហើយកំពុងចិញ្ចឹមចៅ៣នាក់ បានអំពាវនាវរកសប្បុរសជន ដើម្បីជួយដល់ការលំបាករបស់គាត់ ពិសេសគឺជោគវាសនារបស់ចៅទាំង៣នាក់ ។
ខេត្តពោធិ៍សាត់ ៖ ស្ត្រីពិការភ្នែកទាំងសងខាង និងដៃម្ខាង ហើយកំពុងចិញ្ចឹមចៅ៣នាក់ បានអំពាវនាវរកសប្បុរសជន ដើម្បីជួយដល់ការលំបាករបស់គាត់ ពិសេសគឺជោគវាសនារបស់ចៅទាំង៣នាក់ ។ ស្ត្រីចំណាស់ពិការរូបនេះឈ្មោះ ខេន ល័ក្ខណ៍ អាយុ៦៥ឆ្នាំ រស់នៅភូមិចំការចេកខាងជើង សង្កាត់ផ្ទះព្រៃ ក្រុងពោធិ៍សាត់ បានដង្ហោយរកសប្បុរសជនតាមរយៈសារព័ត៌មាន«កោះសន្តិភាព» ឲ្យជួយផ្សព្វផ្សាយពីទុក្ខលំបាករបស់គាត់ ។
នៅលើគ្រែតូចមួយក្រោមម្លប់ត្នោតមុខខ្ទម ស្ត្រីចំណាស់ពិការភ្នែក និងដៃម្ខាងរូបនេះ រៀបរាប់ថា សព្វថ្ងៃគាត់រស់នៅជាមួយចៅៗចំនួន៣នាក់ ដែលចៅស្រីច្បងឈ្មោះ សុខ រក្សា អាយុ១២ឆ្នាំ ចៅប្រុសបន្ទាប់ឈ្មោះ សុខ រតនៈ អាយុ៩ឆ្នាំ និងចៅស្រីពៅឈ្មោះ សុខ ស្រីណុច អាយុ៣ឆ្នាំ ។ ចៅស្រីទាំង៣នាក់ ជាកូនរបស់កូនស្រីគាត់ឈ្មោះ ខេន ចិន្តា អាយុ៣០ឆ្នាំ ជាស្ត្រីមេម៉ាយ ប្តីឈ្មោះ ពូក កុសល ហៅសុខ បានស្លាប់ដោយគ្រោះថ្នាក់ចរាចរណ៍កាលពីជាង៤ឆ្នាំមុន ។
ស្ត្រីចំណាស់ជាជីដូនបន្តថា សព្វថ្ងៃកូនស្រីគាត់ដែលត្រូវជាម្តាយចៅទាំង៣នាក់ បានទៅធ្វើការនៅភ្នំពេញ ហើយទុកកូននៅលើគាត់ជាជនពិការភ្នែក និងដៃម្ខាង ដោយផ្ញើប្រាក់មកឱ្យគាត់សម្រាប់ចិញ្ចឹមចៅ និងរូបគាត់ក្នុង១សប្តាហ៍៥ម៉ឺនរៀល សម្រាប់ទិញម្ហូប និងអង្ករ ។ ដោយសារតែគាត់ជាជនពិការ គ្រប់ការងារទាំងអស់ ដាំបាយ ទិញម្ហូប បោកខោអាវ មើលថែប្អូនៗគឺជាបន្ទុករបស់ចៅស្រីច្បង អាយុ១២ឆ្នាំ ។
ក្នុងគ្រួសារទាំងមូលបានធ្លាក់ទៅលើចៅស្រីច្បងម្នាក់គត់ ដូចមេគ្រួសារ ពេលនាងទៅរៀន នាងយកប្អូនពៅទៅរៀនជាមួយ ។ ពេលនាងមកវិញ ទិញម្ហូបឆ្អិនស្រាប់ លុះមកដល់ផ្ទះពុះអុស ដាំបាយ និងរៀបបាយទឹកឱ្យគាត់ជាជីដូន និងប្អូនៗហូបបាយជុំគ្នា ។ ក្រោយពីហូបបាយហើយ នាងលាងចានទុកដាក់ និងឆ្លៀតពេលបោកខោអាវ និងរកអុសមកទុកជាដើម ។ សព្វថ្ងៃនេះ នាងរៀនថ្នាក់ទី៤ នៅសាលាបឋមសិក្សាក្រុងពោធិ៍សាត់ តែរៀនមិនសូវពូកែទេ ដោយសារតែនាងរវល់ការងារផ្ទះខ្លាំងពេក និងអាហារូបត្ថម្ភមិនគ្រប់គ្រាន់ ។
ដោយសារតែលំបាកខ្លាំងពេក និងរស់ក្នុងស្ថានភាពបែបនេះ ស្ត្រីពិការភ្នែកចិញ្ចឹមចៅទាំង៣នាក់ សូមអំពាវនាវដល់សប្បុរសជនជិតឆ្ងាយ សូមមេត្តាជួយដល់រូបគាត់ដែលកំពុងជួបការលំបាកនេះផង ។
នៅរសៀលថ្ងៃទី២៨ តុលា លោកព្រិន្ទបាលឯក ញ៉េប ពៅភិរម្យ បម្រើការងារនៅកងពលតូចថ្មើរជើងលេខ៤១ យោធភូមិភាគទី៤ ឈរជើងនៅតំបន់ប្រាសាទព្រះវិហារ បានជួយឧបត្ថម្ភអង្ករ៥០គីទ្បូក្រាម មី១កេស និងប្រាក់៤ម៉ឺនរៀល ដល់ស្ត្រីពិការរូបនេះផងដែរ ខណៈលោកត្រទ្បប់ពីសមរភូមិមកផ្ទះមើលជីដូនមានជំងឺ ដែលនៅមិនឆ្ងាយប៉ុន្មានពីផ្ទះស្ត្រីខាងលើនេះ។
«កោះសន្តិភាព»សង្ឃឹមថា សាខាកាកបាទក្រហមកម្ពុជាខេត្ត ក៏នឹងមិនមើលរំលងជីវិតតោកយ៉ាកនេះឡើយ ហើយសប្បុរសជនដែលមានចិត្តបុណ្យទាំងទ្បាយ នឹងជួយឧបត្ថម្ភដល់ស្ត្រីពិការភ្នែក និងចៅទាំង៣នាក់នេះជាមិនខាន៕
ចែករំលែកព័តមាននេះ