ដោយពុំអាចទ្រទ្រង់បាន និងពុំអាចព្រមព្រៀងគ្នាលើការទទួលបន្ទុក បណ្តាប្រទេសអឺរ៉ុបមានតែបិទព្រំដែនធ្វើរបងរាំងពួកជនភៀសខ្លួន ។
ប្រទេសអូទ្រីសទើបប្រកាសពីបំណងកសាងរបាំងតាមបណ្តោយព្រំដែនជាមួយស្លូវេនី ដើម្បីធានាឱ្យមានការចូលដោយរៀបរយ និងមានការត្រួតពិនិត្យរបស់បណ្តាជនភៀសខ្លួន ។ ប្រសិនបើគម្រោងនេះត្រូវបានអនុវត្ត នោះនឹងជារបាំងព្រំដែនលើកដំបូងរវាងប្រទេសអឺរ៉ុបទាំង២នេះ ដែលតែងនិយាយពីការធ្វើចរាចរណ៍ដោយសេរីកាត់អឺរ៉ុប។
ពេលវិបត្តិអន្តោប្រវេសន៍កាន់តែធ្ងន់ធ្ងរបណ្តាប្រទេសនៅបាល់កង់ប៉ុនប៉ងឱ្យពួកជនភៀសខ្លួនចាកចេញដោយឆាប់រហ័សទៅកាន់បណ្តាប្រទេសជិតខាង បែបនេះនាំឱ្យមានភាពតានតឹងរវាងរដ្ឋទាំងនោះ ។ អូទ្រីសងាកមកប្រឆាំងស្លូវេនី ដែលបណ្តាមេដឹកនាំប្រទេសនេះនិយាយថា ទប់ទល់លែងបាន ហើយប្រកាសពីគម្រោងធ្វើរបាំងរាំងការហូរចូលនៃពួកអន្តោប្រវេសន៍ដែលគិតជាមធ្យម១.០០០នាក់ ក្នុង១ថ្ងៃ ។ នាយករដ្ឋមន្ត្រីស្លូវេនី លោក MILO CERAR ប្រកាសថា ត្រៀមកសាងរបាំងព្រំដែនជាប់ជាមួយក្រូអាស៊ីបើចាំបាច់ ។
ដោយសារការហូរចូលពុំស្រាកនៃពួកអន្តោប្រវេសន៍ ទំនាក់ទំនងរវាងអាល្លឺម៉ង់ និងអូទ្រីសជាដៃគូស្អិតរមួតជាប្រពៃណី បែរជាល្អក់កករ ។ រដ្ឋមន្ត្រីមហាផ្ទៃអាល្លឺម៉ង់ចោទអូទ្រីសថា ប្រកាន់ឥរិយាបថពុំត្រឹមត្រូវ ។ មេដឹកនាំតំបន់ BAVIERE អាល្លឺម៉ង់ លោក HORST SEEHOFER បានទាមទរឱ្យអធិការបតី លោកស្រីអេនហ្សឺឡា ម័រកែល ពិនិត្យឡើងវិញនយោបាយរបស់លោកស្រី ចំពោះពួកជនភៀសខ្លួន ហើយចោទអូទ្រីសថា រុញច្រានពួកជនភៀសខ្លួនឱ្យសម្រុកមកអាល្លឺម៉ង់ ៕
ចែករំលែកព័តមាននេះ