សហរដ្ឋអាមេរិក ៖ យោងតាមទិន្នន័យតាមដានកប៉ាល់បានបង្ហាញថា កប៉ាល់ដឹកប្រេង ១គ្រឿងចេញពីឃ្លាំងប្រេងបម្រុងយុទ្ធសាស្ត្ររបស់សហរដ្ឋអាមេរិក កំពុងធ្វើដំណើរឆ្ពោះទៅកាន់ប្រទេសហ្វីលីពីន ដែលនេះគឺជាការដឹកជញ្ជូនប្រេងបម្រុងសង្គ្រោះបន្ទាន់របស់សហរដ្ឋអាមេរិកទៅអាស៊ីលើកដំបូងក្នុងរយៈពេលជាង៣ឆ្នាំ ពោលគឺចាប់តាំងពីខែវិច្ឆិកា ឆ្នាំ២០២២មកម្ល៉េះ។ នេះបើតាមប្រភពពី Reuters បានចេញផ្សាយកាលពីថ្ងៃទី២៦ ខែឧសភា ឆ្នាំ២០២៦។
សកម្មភាពនេះកើតឡើង ចំពេលតំបន់អាស៊ីដែលទទួលបានប្រេងឆៅប្រមាណ ៨០% តាមរយៈច្រកសមុទ្រហ័រមូស (Hormuz) បាននិងកំពុងតែជួបប្រទះវិបត្តិលើការផ្គត់ផ្គង់ដោយសារការបិទច្រកដឹកជញ្ជូនដ៏សំខាន់នេះ អំឡុងពេលសង្គ្រាមអ៊ីរ៉ង់ដែលមានរយៈពេល៣ខែមកហើយ។ ការបិទច្រកដឹកជញ្ជូនដ៏តូចចង្អៀតនេះទៀតសោត ក៏បានធ្វើឱ្យការផ្គត់ផ្គង់ប្រេងសកលមានការប្រែប្រួលខ្លាំង និងរុញច្រានតម្លៃប្រេងឆៅជាក់ស្តែងឱ្យឡើងថ្លៃខ្ពស់បំផុតជាប្រវត្តិសាស្ត្រ ដែលបង្ខំឱ្យប្រទេសនាំចូលមួយចំនួនត្រូវស្វែងរកប្រភពផ្គត់ផ្គង់ថ្មី។
តាមទិន្នន័យរបស់ក្រុមហ៊ុន Kpler ដែលវិភាគទិន្នន័យ និងតាមដានការដឹកជញ្ជូនសមុទ្របានបង្ហាញថា កប៉ាល់ខា្នតយក្ស Arosa ដោតទង់ជាតិប្រទេសក្រិកបានផ្ទុកប្រេងឆៅចំនួន ៦១៦ ០០០ បារ៉ែលពីឃ្លាំងបម្រុងប្រេងយុទ្ធសាស្ត្រ Bryan Mound ក្នុងរដ្ឋតិចសាស់ សហរដ្ឋអាមេរិក កាលពីដើមខែឧសភា ហើយគ្រោងនឹងមកដល់ទីក្រុងបាតាន (Bataan) ប្រទេសហ្វីលីពីន នៅដើមខែកក្កដា។ កប៉ាល់១គ្រឿងនេះ ត្រូវបានជួលដោយក្រុមហ៊ុន Shell ហើយក៏មានផ្ទុកបន្ថែមនូវប្រេងឆៅអាមេរិកប្រភេទ Thunder Horse ប្រមាណ ៧០ ម៉ឺនបារ៉ែលផងដែរ។
យោងតាមរបាយការណ៍ពី Kpler បានឱ្យដឹងថា ប្រទេសហ្វីលីពីនមិនដែលទទួលបានប្រេងឆៅពីសហរដ្ឋអាមេរិក ចាប់តាំងពីខែកុម្ភៈ ឆ្នាំ២០២០មកម្ល៉េះ ហើយជាធម្មតាការផ្គត់ផ្គង់ភាគច្រើនរបស់ខ្លួនពីប្រទេសអារ៉ាប៊ីសាអូឌីត អេមីរ៉ាតអារ៉ាប់រួម និងអ៊ីរ៉ាក់។
ក្រឡេកមកសហរដ្ឋអាមេរិកវិញ បានដឹកជញ្ជូនប្រេងចេញពីឃ្លាំងបម្រុងបន្ទាន់របស់ខ្លួនទៅកាន់អាស៊ីចុងក្រោយបង្អស់នៅក្នុងខែវិច្ឆិកា ឆ្នាំ២០២២ នៅពេលដែលរដ្ឋបាលលោកប្រធានាធិបតី ចូ បៃដិន (Joe Biden) បញ្ចេញប្រេងចំនួន ១៨០ លានបារ៉ែល ដើម្បីកាត់បន្ថយវិបត្តិថាមពល បន្ទាប់ពីការឈ្លានពានរបស់រុស្ស៊ីលើអ៊ុយក្រែន។
សហរដ្ឋអាមេរិកក៏កំពុងតែស្ថិតក្នុងដំណើរការបញ្ចេញប្រេងចំនួន ១៧២ លានបារ៉ែលពីឃ្លាំងបម្រុងយុទ្ធសាស្ត្ររបសខ្លួន ដើម្បីប្រយុទ្ធទប់ស្កាត់ការកើនឡើងនៃតម្លៃប្រេងឆៅ ចំពេលសង្គ្រាមអ៊ីរ៉ង់បានធ្វើឱ្យការផ្គត់ផ្គង់សកលធ្លាក់ចុះ ដោយច្រកសមុទ្រហ័រមូសភាគច្រើនត្រូវបានបិទ។ សកម្មភាពនេះ គឺជាផ្នែកមួយនៃកិច្ចខិតខំប្រឹងប្រែងសម្របសម្រួលដោយទីភ្នាក់ងារថាមពលអន្តរជាតិ (IEA) ដើម្បីបញ្ចេញប្រេងចំនួន ៤០០ លានបារ៉ែល ដែលជាកំណត់ត្រាថ្មីបំផុត ដើម្បីទប់ស្កាត់ការកើនឡើងតម្លៃប្រេង៕
ចែករំលែកព័តមាននេះ