ខេត្តកំពង់ចាម ៖ តាមប្រពៃណីព្រះពុទ្ធសាសនាតាំងពីបុរាណកាលរហូតមកដល់សព្វថ្ងៃនេះ ឱ្យតែដល់ថ្ងៃចេញព្រះវស្សាម្តងៗ គេសង្កេតឃើញព្រះសង្ឃនៅតាមបណ្តាខេត្ត-ក្រុងនានា និមន្តបិណ្ឌបាតតាមទំនៀមទម្លាប់មិនដែលអាក់ខានទ្បើយ ។ ជាក់ស្តែង នៅព្រឹកថ្ងៃទី២៩ តុលា នៅជុំវិញផ្សារធំក្រុងកំពង់ចាម មានព្រះសង្ឃរហូតដល់២០០អង្គ និមន្តបិណ្ឌបាតដោយមានពុទ្ធបរិស័ទក្មេងចាស់ប្រុសស្រី ចូលរួមសស្រាក់សស្រាំដាក់ចង្ហាន់ប្រគេនព្រះសង្ឃក្នុងមនោសញ្ចេតនាជ្រះថ្លាយ៉ាងផុលផុស ។
ព្រះឧត្តមប្រីជា អន ធាងអាន ព្រះមេគណខេត្ត គង់នៅវត្តសុទស្សនារាមជ្រោយថ្ម មានថេរដីកាថា ដោយមានការអនុញ្ញាតពីអាជ្ញាធរក្រុងកំពង់ចាម ក៏ដូចជាលោកវរសេនីយ៍ត្រី ស៊ឹង ចាន់អូន អធិការនគរបាលក្រុងកំពង់ចាម បានចាត់ឱ្យកម្លាំងនគរបាលចរាចរណ៍ក្រោមឱវាទជាច្រើននាក់ ជួយសម្រួលការពារចាប់តាំងពីវត្តជ្រោយថ្ម រហូតទៅដល់ផ្សារធំក្រុងកំពង់ចាម។ ចំពោះព្រះសង្ឃទាំង២០០អង្គ គឺនិមន្តមកពីវត្តជ្រោយថ្ម ១៥០អង្គ វត្តបឹងកុក១០អង្គ វត្តដីដុះ១០អង្គ វត្តអង្គរក្នុង១០អង្គ វត្តអង្គរក្រៅ១០អង្គ និងវត្តបឹងស្នាយ១០អង្គ ដោយមិនបានឱ្យលើសពីនេះទេ ដែលចំនួននេះសមល្មមទៅនឹងលទ្ធភាពរបស់ពុទ្ធបរិស័ទដាក់ចង្ហាន់ ដើម្បីចៀសវាងកុំឱ្យមានការខ្វះខាត ។
ពិធីចេញព្រះវស្សាឆ្នាំ២០១៥ ត្រូវបានធ្វើនៅថ្ងៃ២រោច ខែអស្សុជ គឺដោយសារតែនៅក្រុងកំពង់ចាម មានពិធីប្រណាំងទូក.ង បណ្ដែតប្រទីប និងការតាំងពិព័រណ៍រយៈពេល២ថ្ងៃ (២៧ និង២៨តុលា) ដែលបានធ្វើទ្បើងក្នុងភាពអធិកអធម មានប្រជាពលរដ្ឋមកពីគ្រប់ទិសទីចូលរួមទស្សនាកម្សាន្តសប្បាយ តាមរយៈការបាញ់កាំជ្រួចជាដើម ។
ព្រះអង្គសប្បាយព្រះទ័យ ដោយបានឃើញទូក.ងឈ្មោះ«ចៅពេជ្រកុមារបុប្ផាជ្រោយថ្ម» ជាប់ចំណាត់ថ្នាក់លេខ១ សម្រាប់ទៅចូលរួមប្រណាំងនៅរាជធានីភ្នំពេញនាថ្ងៃខាងមុខ ។ ព្រះអង្គបញ្ជាក់ថា ទូក.ងនេះបានស្ថាបនានៅឆ្នាំ១៩៩១ ដោយមានការជួយជ្រោមជ្រែងពីលោក ហ៊ុន ណេង អតីតអភិបាលខេត្ត និងសព្វថ្ងៃជាតំណាងរាស្ត្រមណ្ឌលកំពង់ចាម និងនៅតែបន្តជួយរហូតមក ។
ព្រះឧត្តមប្រីជា អន ធាងអាន មានថេរដីកាទៀតថា ក្រោមការយកចិត្តទុកដាក់របស់លោក លន់ លឹមថៃ អភិបាលខេត្ត ក៏ដូចជាស្ថាប័នពាក់ព័ន្ធ បានធ្វើឱ្យពិធីប្រណាំងទូក.ងខាងលើ ប្រព្រឹត្តទៅដោយរលូនទាំង២ថ្ងៃ និងប្រកបភាពជោគជ័យត្រចេះត្រចង់ ។ ដោយសារកត្តានេះហើយ ទើបពិធីចេញព្រះវស្សាត្រូវបានប្រារព្ធធ្វើនៅព្រឹកថ្ងៃ២រោចវិញ និងមានព្រះសង្ឃ២០០អង្គនិមន្តបិណ្ឌបាត ៕
ចែករំលែកព័តមាននេះ