អ្នកឈានមុខគេ២រូបក្នុងការសម្រាំងបេក្ខជនប្រធានាធិបតីនៃគណបក្សសាធារណរដ្ឋអាមេរិក១០រូប មហាសេដ្ឋី លោក DONALD TRUMP និងវេជ្ជបណ្ឌិត BEN CARSON ជាជនស្បែកខ្មៅ ក្នុងការជួបដេញដោលទល់មុខគ្នា
អ្នកឈានមុខគេ២រូបក្នុងការសម្រាំងបេក្ខជនប្រធានាធិបតីនៃគណបក្សសាធារណរដ្ឋអាមេរិក១០រូប មហាសេដ្ឋី លោក DONALD TRUMP និងវេជ្ជបណ្ឌិត BEN CARSON ជាជនស្បែកខ្មៅ ក្នុងការជួបដេញដោលទល់មុខគ្នាតាមទូរទស្សន៍កាលពីថ្ងៃទី២៨ តុលា សុទ្ធតែការពារបណ្តាគម្រោងសេដ្ឋកិច្ចរបស់ខ្លួន ។
ការជួបដេញដោលគ្នាតាមទូរទស្សន៍របស់បណ្តាបេក្ខជនសម្រាំងនៃគណបក្សសាធារណរដ្ឋសម្រាប់ការបោះឆ្នោតប្រធានាធិបតីឆ្នាំ២០១៦ បង្ហាញយ៉ាងច្បាស់ថា បណ្តាបេក្ខជនដែលធ្លាប់កាន់តំណែងជាអ្នកទទួលខុសត្រូវខាងនយោបាយ ជារឿយៗទទួលបានជោគជ័យ បែរជាត្រូវផាត់ចេញ ដោយបណ្តាមនុស្សដែលគ្មានបទពិសោធន៍ខាងនយោបាយ ។ បេក្ខជន២រូបលេចធ្លោជាងគេ គឺលោក DONALD TRUMP និងលោក BEN CARSON ។ បេក្ខជនស្បែកខ្មៅ លោក BEN CARSON តាមការស្ទាបស្ទង់ក្រោយការដេញដោលគ្នាតាមទូរទស្សន៍ដណ្តើមបានប្រជាប្រិយភាពខ្ពស់ ព្រោះពាក់កណ្តាលនៃពួកអ្នកសាធារណរដ្ឋមានបំណងបោះឆ្នោតឱ្យលោក ខណៈសល់ពេល៣ខែទៀតចាប់ផ្តើមការសម្រាំងបេក្ខជនចុងក្រោយហើយ ។
ក្នុងឱកាសនៃការដេញដោលគ្នាតាមទូរទស្សន៍រៀបចំឡើងដោយទូរទស្សន៍ហិរញ្ញវត្ថុ CNBC នៅសាកលវិទ្យាល័យកូឡូរ៉ាដូ លោក DONALD TRUMP ដែលមានបទពិសោធន៍ខាងជំនួញរងការវាយប្រហារចំពោះសំណើនានារបស់លោក ដែលគេយល់ថា ពុំប្រាកដនិយម ឬប្រហែលៗ ពិសេសលើការបញ្ចុះពន្ធយ៉ាងច្រើន ព្រមតាំងការកសាងរបងជញ្ជាំងនៅតាមព្រំដែនជាមួយម៉ិចស៊ិក ។ ចំពោះលោក BEN CARSON ជាវេជ្ជបណ្ឌិតវះកាត់ខួរក្បាលល្បី ហើយចូលនិវត្តន៍ក៏ជួបការលំបាកសម្រាប់បង្ហាញភាពត្រឹមត្រូវនៃសំណើរបស់លោកឱ្យមានអត្រាពន្ធតែមួយគត់១០%ដែរ ។ លោក DONALD TRUMP ក៏ត្រូវការពារបរាជ័យនៃគម្រោងអចលនទ្រព្យមួយចំនួនរបស់លោកដែរ ។
ការដេញដោលគ្នាខ្លាំងកើតមានរវាងអតីតសម្ព័ន្ធមិត្ត២រូប គឺព្រឹទ្ធសមាជិករដ្ឋផ្លរីដា លោក MARCO RUBIO និងអតីតអភិបាលរដ្ឋនេះ លោកជេបប៊ូស ហើយក្នុងការស្ទាបស្ទង់មតិ លោកជេបប៊ូស បែរជាធ្លាក់ដល់ចំណាត់ថ្នាក់ទី៤ ។ ដូច្នេះក្នុងចំណោមបេក្ខជនសម្រាំងនៃគណបក្សសាធារណរដ្ឋទាំង១០រូប លោក BEN CARSON បែរជាមានពិន្ទុខ្ពស់ជាងគេ បន្ទាប់មក លោក DONALD TRUMP ៕
ចែករំលែកព័តមាននេះ