កាលពីថ្ងៃទី២៨ តុលា មានការភ្ញាក់ផ្អើលក្នុងចំណោមកងយោធាអាមេរិកដោយបាល់ឡុងរ៉ាដាមួយមានប្រវែងដល់៧៤ម៉ែត្រ ត្រូវបានតាមដានថតរូបភាព ហើយផ្សាយផ្ទាល់ដោយបណ្តាសារព័ត៌មានអាមេរិក រួចក៏ត្រូវបានចាប់អារម្មណ៍ខ្លាំងផងដែរផ្សាយបន្តតាមបណ្តាញសង្គមនានា ។
បន្ទាប់ពីដាច់ខ្សែហោះលើដែនដីអាមេរិកជាច្រើនម៉ោង បាល់ឡុងរ៉ាដានេះបានធ្លាក់ក្នុងតំបន់ MONTOUR រដ្ឋផេនស៊ីលវេនី ។ នេះបើតាមទីបញ្ជាការដ្ឋានយោធាអាេមរិកទទួលបន្ទុកខាងសន្តិសុខអាកាសសហរដ្ឋអាេមរិក និងកាណាដា ។ បាល់ឡុងរ៉ាដានេះដែលដាច់ខ្សែកាបចងវាបានអូសទៅជាមួយនូវខ្សែកាបប្រវែងច្រើនរយម៉ែត្រញ៉ាំងឱ្យមានការខូចខាតនានាពេលវាធ្លាក់ចុះវិញជិតដល់ដី ប៉ះពាល់ជាពិសេសដល់ខ្សែកាបអគ្គិសនី ។ ការដាច់ភ្លើងត្រូវបានកត់សម្គាល់ឃើញក្នុងតំបន់ទីក្រុង BLOOMSBURG ជាទីក្រុងតូចមួយនៅភាគពាយ័ព្យហ្វីឡាដែលហ្វីយ៉ា ។ រូបភាពទាំងឡាយផ្សាយតាមអុីនធើរណេតបង្ហាញផងដែរនូវស្នាមលើដីបន្សល់ទុក ដោយខ្សែកាបចងបាល់ឡុងនេះដែលដាច់ ។
ចំណែកស្ត្រីអ្នកកាសែតម្នាក់របស់ទូរទស្សន៍ WNEP-TV បានថតរូបភាពនៃបំណែកមួយរបស់បាល់ឡុងនេះដែលជាប់នៅលើដើមឈើមួយដើម ។
យោងតាមលោក SCOT MILLER នាយទាហានអាេមរិកម្នាក់ថា បាល់ឡុងនេះត្រូវបានតាមដានពេលដាច់ខ្សែដោយយន្តហោះធុន F-16 ចំនួន២គ្រឿងរហូតដល់វាធ្លាក់ដល់ដី ហើយផ្ទុះបែកពុំដឹងមកពីអ្វី ។ លោកអះអាងថា យើងពុំមានបំណងបាញ់បំបែកវាឡើយ ។ ពួកអ្នកត្រួតពិនិត្យអាកាសអាេមរិកបានប្រកាសអាសន្ន ដើម្បីចៀសវាងការប៉ះគ្នាដោយចៃដន្យជាមួយយន្តហោះ ។
ពេលដាច់ខ្សែបាល់ឡុងនេះបានហោះក្នុងកម្ពស់រហូតដល់៤.៥០០ម៉ែត្រ ។ បាល់ឡុងរ៉ាដានេះជាផ្នែកមួយនៃប្រព័ន្ធកំពុងធ្វើការពិសោធន៍ខាងកិច្ចការពារអាកាសសាកល្បងក្នុងតំបន់ក្រុងវ៉ាស៊ីនតោនជាមួយបាល់ឡុងប្រភេទនេះមួយទៀត ដែលទម្លាក់វាមកដីវិញ ។ ប្រព័ន្ធនេះប្រើសម្រាប់ចាប់បណ្តាមីស៊ីលបណ្តែត បណ្តាយន្តហោះ ព្រមទាំងយន្តហោះគ្មានមនុស្សរបស់សត្រូវ ៕
ចែករំលែកព័តមាននេះ