រាជធានីភ្នំពេញ ៖ ស្របពេលដែលអង្កររបស់កម្ពុជាបានជាប់ចំណាត់ថ្នាក់លេខ១ ក្នុងរយៈពេល៣ឆ្នាំជាប់ៗគ្នា និងមានច្រើនប្រភេទ នោះ ក្រសួងពាណិជ្ជកម្ម និងស្ថានទូតអង់គ្លេសប្រចាំកម្ពុជា ព្រមទាំងដៃគូអភិវឌ្ឍន៍នានាក្នុងវិស័យស្រូវអង្ករ បានជួបពិភាក្សាគ្នាផ្តោតលើប្រធានបទ «តើការដាក់ម៉ាកយីហោត្រឹមត្រូវមួយ អាចផ្តល់ផលប្រយោជន៍អ្វីខ្លះសម្រាប់ការនាំចេញអង្ករកម្ពុជា» ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ប្រាប់អ្នកសារព័ត៌មាននៅសណ្ឋាគារឡឺរ៉ូយាល់ កាលពីព្រឹកថ្ងៃទី២៨ តុលាថា ៖ «យើងខ្ញុំចូលរួមជានិច្ចជាមួយសហព័ន្ធស្រូវអង្ករកម្ពុជា និងដៃគូអភិវឌ្ឍនានា ដើម្បីធ្វើយ៉ាងណា ឱ្យមានការទទួលស្គាល់ម៉ាកអង្ករកម្ពុជា ព្រោះអង្ករយើងបានជាប់លេខ១ ក្នុងរយៈពេល៣ឆ្នាំជាប់ៗគ្នា ។ ក៏ប៉ុន្តែដោយសារអង្ករកម្ពុជាមានច្រើនប្រភេទពេក អុីចឹងហើយ ថ្ងៃនេះយើងបានពិភាក្សាគ្នារកនីតិវិធីផ្សព្វផ្សាយអង្ករកម្ពុជាតាមវិធីណា ?
យើងនឹងបន្តចូលរួមជាមួយផ្នែកឯកជន និងរាជរដ្ឋាភិបាល ជាពិសេស ជាមួយក្រសួងពាណិជ្ជកម្ម ដើម្បីជំរុញម៉ាកអង្ករនេះឲ្យបានច្បាស់ ។ ការដាក់ម៉ាក់អង្ករនេះ យើងកំពុងតែសិក្សា ហើយនៅឆ្នាំ២០១៦ គេនឹងពិនិត្យឡើងវិញទាំងអស់ ដោយបានសហការជាមួយសហព័ន្ធស្រូវអង្ករ CIF និងក្រុមហ៊ុនដៃគូអភិវឌ្ឍនានា ដែលបានផ្តល់គំនិតដល់យើងថា តើគួរដាក់ម៉ាកមួយណា ? ផ្ការំដួល ផ្កាម្លិះ សែនពិដោរ តើយើងគួរដាក់របៀបម៉េចដើម្បីឲ្យគេស្គាល់ថា ជារបស់ខ្មែរពិតប្រាកដ» ។
លោកទេសរដ្ឋមន្ត្រីបញ្ជាក់ថា ៖ «អត្ថប្រយោជន៍នៃការដាក់ម៉ាកអង្ករកម្ពុជានេះ គឺដើម្បីឱ្យគេទទួលស្គាល់ម៉ាកអង្ករផង និងអាចលក់បានក្នុងតម្លៃខ្ពស់ជាងអង្ករធម្មតា ។ ឧទាហរណ៍ ប្រេងអូលីវ ត្រូវគេកំណត់ម៉ាកមួយត្រឹមត្រូវ និងមានអតិថិជនជាច្រើនទទួលស្គាល់ពីគុណភាពរបស់វា ។ ក្រៅពីមានយីហោច្បាស់លាស់ហើយ យើងក៏មានការវេចខ្ចប់ និងស្លាកសញ្ញាឡូហ្គូត្រឹមត្រូវ ដែលមានការទទួលស្គាល់ពីក្រសួងពាណិជ្ជកម្មថា ផលិតផលដែលពលរដ្ឋផលិតឡើងត្រឹមត្រូវ មានគុណភាពល្អ នឹងជួយធ្វើឱ្យតម្លៃលក់ផលិតផលពួកគាត់កើនឡើងមួយកម្រិតថែមទៀត» ។ល។
លោកបន្តទៀតថា ៖ «ដើម្បីចូលរួមកាត់កាត់បន្ថយការចំណាយរបស់ក្រុមហ៊ុន អ្នកផលិតអង្ករសម្រាប់នាំចេញក្នុងពេលបច្ចុប្បន្ន រាជរដ្ឋាភិបាលបានពិចារណារកនីតិវិធីបញ្ចុះតម្លៃភ្លើង ។ ធ្វើយ៉ាងណា ឲ្យចុះថ្លៃលើការដឹកជញ្ជូន រកទីផ្សារជូនពលរដ្ឋ រកឃ្លាំងដើម្បីឲ្យពួកគាត់ផលិតបានទុកដាក់បានត្រឹមត្រូវ កុំឲ្យឈ្មួញកណ្តាលឲ្យតម្លៃស្រូវអង្កររបស់កសិករទាបពេក ព្រោះតែយើងគ្មានឃ្លាំងសម្រាប់ស្តុក» ។
លោកទេសរដ្ឋមន្ត្រីគូសបញ្ជាក់ថា ៖ «គុណភាពអង្ករខ្មែរអាចប្រកួតប្រជែងជាមួយអង្ករបរទេសបាន ។ សូមកុំយកអង្ករប្រទេសជិតខាងមកលាយជាមួយអង្ករខ្មែរ រួចថាជាអង្ករខ្មែរ សូមកុំយកអង្ករគេទៅលក់នៅបរទេសថា ជាអង្កររបស់ខ្មែរ មិនអាចទេ កុំធ្វើអីុចឹង ធ្វើបែបនេះនឹងធ្វើឲ្យខូចខាតផលប្រយោជន៍ពលរដ្ឋខ្មែរទាំងមូល ។ ខ្ញុំសូមសំណូមពរដល់អ្នកនាំចេញអង្ករខ្មែរទាំងអស់ សូមកុំយកអង្ករបរទេសមកលាយជាមួយអង្ករខ្មែរ សូមថែគុណភាព និងមុខមាត់ប្រទេសជាតិយើង ទើបអាចជួយកសិករខ្មែរបានទាំងអស់គ្នា និងសូមកុំយកមានបានតែម្នាក់ឯង ព្រោះពលរដ្ឋរាប់លាននាក់បានខិតខំផលិតអង្ករឱ្យមានគុណភាពល្អជាប់លេខ១ ក្នុងរយៈពេល៣ឆ្នាំជាប់ៗគ្នា» ៕
ចែករំលែកព័តមាននេះ