រាជធានីភ្នំពេញ ៖ មន្ត្រីយោធាម្នាក់ជិះម៉ូតូចេញពីធ្វើការបត់ចូលផ្ទះត្រូវរថយន្តស្ទូចមួយគ្រឿងបើកលឿនចាប់ហ្វ្រាំងមិនទាន់បុកបណ្ដាលឱ្យរងរបួសប៉ោងភ្នែកខាងស្តាំ កាលពីវេលាម៉ោង៦និង៣០នាទីយប់ថ្ងៃទី២៧ តុលា ២០១៥ នៅមុខផ្ទះលេខ១០៧ ស្ថិតតាមបណ្ដោយផ្លូវលេខ១៥៦ ក្នុងសង្កាត់ទឹកល្អក់២ ខណ្ឌទួលគោក ។
រថយន្តបង្កម៉ាកនីស្សាន់ ពណ៌ស ពាក់ស្លាកលេខភ្នំពេញ 3A-5896 ជាប្រភេទរថយន្តស្ទូច បើកបរដោយបុរស២នាក់ ទិសដៅពីលិចទៅកើតក្នុងល្បឿនលឿន ។ រីឯម៉ូតូរងគ្រោះម៉ាកហុងដាឌ្រីម ស៊េរីឆ្នាំ២០១០ ពណ៌ខ្មៅ ពាក់ស្លាកលេខភ្នំពេញ 1AV-5904 បើកបរដោយបុរសម្នាក់ជាមន្ត្រីយោធា ពីកើតទៅលិចបម្រុងបត់ចូលផ្ទះ ។
តាមប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុ រូបគាត់ទើបតែចេញពីកន្លែងធ្វើការជិតម៉ូតូទៅផ្ទះ លុះមកដល់ចំណុចកើតហេតុបត់ឆ្វេងបម្រុងចូលផ្ទះស្រាប់តែមានរថយន្តបើកបញ្ច្រាសទិសគ្នាក្នុងល្បឿនលឿនចាប់ហ្វ្រាំងមិនទាន់ជ្រុលទៅបុកចំកង់មុខម៉ូតូបណ្ដាលឱ្យអ្នកបើកម៉ូតូត្រូវរបួសប៉ោងភ្នែកខាងស្ដាំនិងរលាត់ដៃជើង ចំណែកឯម៉ូតូវិញខូចខាតផ្នែកកង់មុខវៀចចេញលេខ៨ ហើយភ្លាមនោះអ្នកបើកបររថយន្ត និងព្រូបានរត់បាត់បន្សល់ទុកតែរថយន្តនៅកន្លែងកើតហេតុ ។
ក្រោយពេលកើតហេតុ ជនរងគ្រោះត្រូវបានបញ្ជូនទៅមន្ទីរពេទ្យព្រះកុសមះដើម្បីព្យាបាល រីឯរថយន្តនិងម៉ូតូត្រូវបានបញ្ជូនទៅកាន់ចរាចរណ៍ផ្លូវគោករាជធានីភ្នំពេញដើម្បីធ្វើការដោះស្រាយនៅពេលក្រោយ ៕
ចែករំលែកព័តមាននេះ