រាជធានីភ្នំពេញ ៖ កម្មករ កម្មការីនី និងអ្នកស្នាក់នៅផ្ទះជួលក្នុងតំបន់ក្រហមទួលសង្កែ១ ប្រមាណជាង៣០០នាក់ ក្នុងចំណោមផ្ទះជួលប្រមាណជិត១ពាន់បន្ទប់ បាននាំគ្នាលើកបដាតវ៉ា ដើម្បីទទួចសុំអោយម្ចាស់ផ្ទះជួលបញ្ចុះតម្លៃឈ្នួលផ្ទះ, ថ្លៃទឹក…
រាជធានីភ្នំពេញ ៖ កម្មករ កម្មការីនី និងអ្នកស្នាក់នៅផ្ទះជួលក្នុងតំបន់ក្រហមទួលសង្កែ១ ប្រមាណជាង៣០០នាក់ ក្នុងចំណោមផ្ទះជួលប្រមាណជិត១ពាន់បន្ទប់ បាននាំគ្នាលើកបដាតវ៉ា ដើម្បីទទួចសុំអោយម្ចាស់ផ្ទះជួលបញ្ចុះតម្លៃឈ្នួលផ្ទះ, ថ្លៃទឹក និងភ្លើងចំនួន៥០ភាគរយ ខណៈពេលដែលពួកគាត់ស្ថិតនៅ តំបន់ក្រហម មិនអាចប្រកបមុខរបររកស៊ីបាន។
ការតវ៉ានេះ បានផ្ទុះឡើងកាលពីវេលាម៉ោងប្រមាណ១១និង៤០នាទីថ្ងៃត្រង់ ថ្ងៃទី១១ ខែឧសភា ឆ្នាំ២០២១ ចំណុចផ្ទះជួលនៅផ្សារសុភមង្គល ផ្លូវ១០៣ ក្រុមទី៥ ក្នុងភូមិបាក់ទូក ដែលជាតំបនក្រហម ស្ថិតនៅសង្កាត់ទូលសង្កែ១ ខណ្ឌឬស្សីកែវ។
តាមអ្នកស្នាក់នៅផ្ទះជួលខាងលើ បានអោយដឹងថា ប្លុកផ្សារសុភមង្គល មានបន្ទប់ផ្ទះជួលប្រមាណជិត១ពាន់បន្ទប់ ដែលស្ថិតនៅក្នុងតំបន់ក្រហម ហើយត្រូវបានបិទខ្ទប់ បន្ទាប់ពីជំងឺកូវីដ១៩ កំពុងតែរីករាលដាល់ធ្វើអោយពួកគាត់មានការលំបាក មិនអាចចេញ-ចូលប្រកបមុខរបររកស៊ីបាន។ ដោយសារតែស្ថានភាពលំបាក ពួកគាត់ក៏បានសំណូមពរដល់ម្ចាស់ផ្ទះបញ្ចុះតម្លៃ ឈ្មួលផ្ទះ ឬតូបលក់ដូរចំនួន៥០ភាគរយ តែម្ចាស់ផ្ទះបញ្ចុះអោយតែ៣០ភាគរយប៉ុណ្ណោះ។ ចំណែក ថ្លៃទឹក ភ្លើងក៏បានសុំចុះដូចគ្នា នឹងឈ្នួលផ្ទះដែរ។ ដោយតែថៅកែម្ចាស់ផ្ទះជួល មិនឯកភាព ទើបពួកគាត់ក៏នាំគ្នាជួបជុំប្រមូលផ្តុំ និងនាំគ្នាលើកបដា ដើម្បីតវ៉ាតែម្តង។
ទន្ទឹមការតវ៉ានេះ គេឃើញមានលោក ជា ពិសី អភិបាលខណ្ឌឬស្សីកែវ និងលោក ប្រាជ្ញ សីហាអភិបាលរងខណ្ឌ ក៏បានចុះទៅសម្របសម្រួល ដោយសន្យាថា ជួយដោះស្រាយជូនកម្មករ ដោយណែនាំអោយម្ចាស់ផ្ទះមានការយោគយល់ជួយបញ្ចុះតម្លៃឈ្នួលផ្ទះ ទឹក ភ្លើង អោយបាន៥០%។
លោក ជា ពិសី អភិបាលខណ្ឌឬស្សីកែវ ក៏បានណែនាំដល់បងប្អូន កម្មករ កម្មការីនី និងអ្នកស្នាក់នៅផ្ទះជួលទាំងអស់ មេត្តាអនុវត្តវិធានការ «៣ការពារ និង៣កុំ» អោយបានខ្ជាប់ខ្ជួន ដើម្បីបង្ការទប់ស្កាត់ការរីករាលដាលជំងឺកូវីដ១៩ ។ បន្ទាប់ពីមានការសម្របសម្រួលហើយ ក្រុមអ្នកតវ៉ាក៏បានបំបែកគ្នាវិញ នៅវេលាម៉ោងប្រមាណ១២និង១៥នាទីថ្ងៃត្រង់ ក្នុងថ្ងៃដដែលនេះ៕
ចែករំលែកព័តមាននេះ