ខេត្តកំពង់ឆ្នាំង ៖ ករណីភ្លើងឆេះផ្ទះ នៅស្រុកបរិបូណ៌ ដែលបណ្ដាលឲ្យស្លាប់មនុស្សមួយគ្រួសារ សរុប៦នាក់ (រាប់ទាំងកូននៅក្នុងពោះម្ដាយម្នាក់ទៀត) បានស្លាប់នៅក្នុងភ្នក់ភ្លើង កាលពីយប់ថ្ងៃទី៩ ខែឧសភា ដោយរួចខ្លួនតែប្ដីម្នាក់ ពេលនេះ សមត្ថកិច្ចចម្រុះមកពីក្រសួងមហាផ្ទៃ រួមទាំងប៉ូលីសអន្តរជាតិ និងសមត្ថកិច្ចខេត្តកំពង់ឆ្នាំង កំពុងបើកការស្រាវជ្រាវ ប៉ុន្តែប្តី មិនព្រមនិយាយអ្វីទាំងអស់ ។
ហេតុការណ៍អគ្គិភ័យនេះ បានកើតឡើងនៅវេលាម៉ោង០៨និង៣០នាទីយប់ ថ្ងៃទី៩ ឧសភា ស្ថិតនៅភូមិដើមជ្រែ ឃុំខុនរ៉ង់ ស្រុកបរិបូណ៌ ។ ហើយបើតាមព័ត៌មានចុងក្រោយថា ស្ត្រីជាម្តាយកំពុងពរពោះ ដូច្នេះជីវិតមនុស្សដល់ទៅ៦នាក់ ត្រូវស្លា.ប់ដោយគ្រោះអគ្គិភ័យនេះ ។
លោកឧត្តមសេនីយ៍ត្រី ប៉ុល វុទ្ធី ស្នងការរងនគរបាលខេត្តកំពង់ឆ្នាំង បានបញ្ជាក់ប្រាប់កោះសន្តិភាព នៅព្រឹកថ្ងៃទី១១ ខែឧសភានេះថា ក្រោយការសាកសួរបុរសឈ្មោះ នួន សារ៉េត ដែលត្រូវជាប្ដី នៅមិនទាន់បានចម្លើយជាក់លាក់នៅឡើយទេ រហួតមកដល់ថ្ងៃនេះ ទើបសមត្ថកិច្ចនគរបាលបាននាំបុរសរូបនោះ មកបន្តការសាកសួរ នៅស្នងការដ្ឋាននគរបាលខេត្តទៀត ជុំវិញការស្លា.ប់យ៉ាងអាណោចអាធ័មរបស់ជនរងគ្រោះ សរុបចំនួន៦នាក់ (កូនតូចៗ រួមទាំងម្ដាយនិងទារកក្នុងផ្ទៃ) ។
លោកស្នងការរងនគរបាលខេត្តកំពង់ឆ្នាំង ក៏បានបន្ថែមដែរថា ពេលកើតហេតុ បុរសជាប្តី គឺមិននៅក្នុងបន្ទប់ទឹកដាច់ដោយឡែកនៅខាងក្រោយផ្ទះនោះឡើយ គឺពិតជានៅក្នុងហេតុការណ៍ នៃអគ្គិភ័យនោះតែម្តង ។
ទោះយ៉ាងណា ជុំវិញនៃការស្លា.ប់កុមារចំនួន៤នាក់ រួមទាំងម្ដាយកំពុងមានផ្ទៃពោះ កំពុងធ្វើឲ្យមានការសង្ស័យជាខ្លាំង ដែលជាហេតុធ្វើឲ្យសមត្ថកិច្ចកំពុងតែស្រាវជ្រាវយ៉ាងយកចិត្តទុកដាក់ ដើម្បីផ្ដល់ភាពយុត្តិធម៌ដល់ជនរងគ្រោះ ។
យ៉ាងណាក៏ដោយចុះ ព័ត៌មានស៊ីជម្រៅជាងនេះមិនត្រូវបានសមត្ថកិច្ចឲ្យដឹងនោះទេ គ្រាន់តែបញ្ជាក់ថា កំពុងតែស្រាវជ្រាវស៊ើបអង្កេត ឲ្យដឹងការពិត ។
ខណៈដែលមហាជនសង្ឃឹមថា ការស៊ើបអង្កេតទៅលើកសោកនាដកម្មមួយនេះ នឹងបង្ហាញការពិត នាពេលឆាប់ៗនេះ និងផ្ដល់ភាពយុត្តិធម៌ជនរងគ្រោះជាពុំខានឡើយ ។
មិនទាន់ស្ងប់ទេ! អង្គភាពចម្រុះ កំពុងស៊ើបអង្កេតករណីឆេះស្លា.ប់ស្ត្រីមានផ្ទៃពោះនិងកូនៗ សរុបដល់ទៅ៦នាក់ នៅព្រឹកថ្ងៃទី១០ ឧសភា ម្សិលមិញនេះ ក្រុមការងារចម្រុះមួយត្រូវបានបង្កើតឡើង ដើម្បីធ្វើការស៊ើបអង្កេតទៅលើករណីអគ្គីភ័យនៅខេត្តកំពង់ឆ្នាំង ដែលបានបង្កអោយមនុស្សស្លាប់ចំនួន៥នាក់ ។ សមត្ថកិច្ចចម្រុះរួមមានអង្គភាពការពារកុមារ ហៅកាត់ (CPU) សហការជាមួយស្នងការដ្ឋាននគរបាលខេត្តកំពង់ឆ្នាំង និងនាយកដ្ឋានបច្ចេកទេស នៃក្រសួងមហាផ្ទៃ បានរួមគ្នាធ្វើការស៊ើបអង្កេតទៅលើករណីអគ្គីភ័យដែលបង្កអោយក្មេង៤នាក់បានបាត់បង់ជីវិតនៅក្នុងឧប្បត្តិហេតុនេះ កាលពីថ្ងៃទី០៩ ខែឧសភា ឆ្នាំ២០២១ ។
ដោយក្រុមការងារស៊ើបអង្កេត នៃអង្គភាពការពារកុមារ (CPU) រួមជាមួយកងកម្លាំងនគរបាលបច្ចេកទេស និងវិទ្យាសាស្ត្រខេត្តកំពង់ឆ្នាំង បាននិងកំពុងធ្វើកោសល្យវិច័យទៅលើសាកសពទាំង៥ ផងដែរ ។ ចំណែកឯ បុរសអាយុ៤១ឆ្នាំម្នាក់ ត្រូវជាប្តី និងឪពុករបស់ជនរងគ្រោះ កំពុងតែផ្តល់ការបំភ្លឺដល់នគរបាលព្រហ្មទណ្ឌ នៅស្នងការដ្ឋាននគរបាលខេត្ត ។
តាមប្រភពព័ត៌មាន ដែលទទួលបានពីលោក ឈុំ សាំ ជំទប់ទីមួយឃុំខុនរ៉ង់ បានឲ្យដឹងថា គ្រួសាររងគ្រោះខាងលើមានប្រពន្ធឈ្មោះ សៀន សុខជា អាយុ ៣៨ឆ្នាំ(មានផ្ទៃពោះ) ចំណែកប្ដីមានឈ្មោះ នុន សារ៉េត អាយុ៤១ឆ្នាំ កូនច្បងឈ្មោះ សេង រក្សា អាយុ៩ឆ្នាំ, កូនទី២ឈ្មោះ សេង ជីវន្ត័ អាយុ៧ឆ្នាំ, កូនទី៣ឈ្មោះ សេង ជីវ៉ា អាយុ៧ឆ្នាំ (ទី២និងទី៣ជាកូនភ្លោះ) និងកូនទី៤ ឈ្មោះ ឡុង ចំរើន អាយុ៣ឆ្នាំ (ប្រុសទាំង៤) ។ គ្រួសារនេះមានមុខរបរលក់ខោអាវជជុះ ចំណែកផ្ទះរងគ្រោះ ដោយអគ្គីភ័យមានទំហំ ៥គុណនឹង ៨ម៉ែត្រ ធ្វើអំពីដែក ប្រក់និងបានបាំងជញ្ជាំងស័ង្កសី ។
លោកជំទុបទី១ បានអោយដឹងថា លោកមិនបានដឹងពីមូលហេតុនោះទេ ប៉ុន្តែពេលអគ្គិភ័យកើតឡើងបានឆក់យកជីវិតស្ត្រីជាម្ដាយ និងកូន៤នាក់។ ក្នុងពេលកើតហេតុ បុរសជាឪពុក គេចរួចផុតពីសេចក្តីស្លា.ប់ និងបានសន្លប់ មិនអាចធ្វើអ្វីបានឡើយ ដោយសារតែស្លុតចិត្តខ្លាំងពេក ។
ដោយឡែកលោក ជាង សុវណ្ណារិទ្ធ អធិការនគរបាលស្រុកបរិបូណ៌ បានបញ្ជាក់ថា ពេលអគ្គិភ័យកើតឡើង មានរថយន្តរបស់អធិការរដ្ឋាននគរបាលស្រុកបានចេញប្រតិបត្តិការជួយពន្លត់ ប៉ុន្តែពេលទៅដល់ មនុស្សបានស្លា.ប់នៅក្នុងភ្លក់ភ្លើង៥នាក់ទៅហើយ ។ ចំពោះមូលហេតុ លោកបានសង្ស័យថា បណ្ដាលមកពីទុស្សេចរន្តអគ្គិសនី ដោយសារតែផ្ទះនេះធ្វើអំពីដែកសុទ្ធ ៕
ចែករំលែកព័តមាននេះ