រាជធានីភ្នំពេញ ៖ នារី២នាក់ ត្រូវបានកម្លាំងនគរបាលប៉ុស្តិ៍ចោមចៅទី២ និងនគរបាលខណ្ឌពោធិ៍សែនជ័យ ព្រមទាំងសន្តិសុខសាលាខណ្ឌពោធិ៍សែនជ័យ ធ្វើការឃាត់ខ្លួននាំទៅសាកសួរ និងកសាងសំណុំរឿងចាត់ការតាមច្បាប់ បន្ទាប់ពីពួកនាងលក់ប័ណ្ណសម្រាប់ចូលទៅចាក់វាក់សាំងបង្ការជម្ងឺ Covid-19…
រាជធានីភ្នំពេញ ៖ នារី២នាក់ ត្រូវបានកម្លាំងនគរបាលប៉ុស្តិ៍ចោមចៅទី២ និងនគរបាលខណ្ឌពោធិ៍សែនជ័យ ព្រមទាំងសន្តិសុខសាលាខណ្ឌពោធិ៍សែនជ័យ ធ្វើការឃាត់ខ្លួននាំទៅសាកសួរ និងកសាងសំណុំរឿងចាត់ការតាមច្បាប់ បន្ទាប់ពីពួកនាងលក់ប័ណ្ណសម្រាប់ចូលទៅចាក់វាក់សាំងបង្ការជម្ងឺ Covid-19 ទៅឲ្យបុរសម្នាក់ទៀត ដើម្បីលក់ចែកចាយបន្តទៅឲ្យប្រជាពលរដ្ឋ និងកម្មករកម្មការិនីដែលមិនទាន់មានឈ្មោះត្រូវចាក់វ៉ាក់សាំងបានចូលទៅចាក់វ៉ាក់សាំងនេះ ។
ការចាប់ខ្លួននេះបានធ្វើឡើង កាលពីវេលាម៉ោង៦និង៤៥នាទីយប់ថ្ងៃទី១០ ខែឧសភា ឆ្នាំ២០២១ នៅត្រង់ចំណុចមុខរោងចក្រ ប្រ៊ីលៀន ស្ថិតនៅក្នុងភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
នារីទាំង២នាក់នោះម្នាក់ ឈ្មោះ ចាប ម៉ាលីន អាយុ៣៣ឆ្នាំ មុខរបរជាកម្មការិនីរោងចក្រ និងម្នាក់ទៀតឈ្មោះ អ៊ុយ សុខា អាយុ៣៦ឆ្នាំ មុខរបរលក់ដូរ អ្នកទាំង២នាក់នេះ ស្នាក់នៅក្នុងភូមិព្រៃសណ្ដែក សង្កាត់ចោមចៅទី២ ខណ្ឌពោធិ៍សែនជ័យ ។
នគរបាលបានឲ្យដឹងថា ប្រជាពលរដ្ឋ និងត្រូវទទួលបានការចាក់វ៉ាក់សាំង ដើម្បីបង្ការ និងការពារការឆ្លងរាលដាលជម្ងឺ COVID-19 គ្រប់ៗរូប ដោយគ្រាន់តែអ្នកខ្លះបានមុន និងអ្នកខ្លះបានក្រោយតាមលំដាប់លំដោយប៉ុណ្ណោះ ។
ចំណែកឯប័ណ្ណសម្រាប់ចូលទៅចាក់វាក់សាំងពុំមែនបុគ្គលណាផ្សេងក្រៅពីក្រុមគ្រូពេទ្យ ឬអាជ្ញាធរមានសមត្ថកិច្ចដែលជាអ្នកគ្រប់គ្រងនោះទេ ។ ចំណែកប័ណ្ណចាក់វ៉ាក់សាំងនេះ ត្រូវបានមេភូមិប្រគល់ឲ្យទៅម្ចាស់ផ្ទះជួល ដើម្បីចែកឲ្យអ្នកស្នាក់នៅផ្ទះជួលរបស់ខ្លួន ហើយម្ចាស់ផ្ទះជួលបានប្រគល់ឲ្យអ្នកផ្សេងជួយចែកតៗគ្នាទៀត ហើយបានធ្លាក់ដល់ដៃស្ត្រីទាំង២នាក់នេះអត់យកទៅចែកទេ បែរជាយកទៅលក់បែបនេះទៅវិញ ។
ប្រភពដដែលបានបន្តទៀតថា ស្ត្រីទាំង២នាក់ខាងលើបានធ្វើសកម្មភាពលក់ប័ណ្ណចាក់វ៉ាក់សាំងនេះ ដោយខុសច្បាប់ច្រើនថ្ងៃកន្លងមកហើយ និងត្រូវបានកម្លាំងតាមដានជាប់រហូត ដោយប៉ុន្មានថ្ងៃមុនលក់ក្នុង១ច្បាប់៥ពាន់រៀល ។ លុះចុងក្រោយនេះបានលក់ក្នុង១ច្បាប់១ម៉ឺនរៀល និងបានលក់ចំនួន១០ច្បាប់ទៅឲ្យមនុស្សម្នាក់ទៀតឈ្មោះ ចន ដុន ដើម្បីលក់បន្តទៅឲ្យប្រជាពលរដ្ឋនិងកម្មករកម្មការិនីដែលមិនទាន់មានឈ្មោះ ត្រូវចាក់វ៉ាក់សាំងបានចូលទៅចាក់វ៉ាក់សាំងនេះ ។ ប៉ុន្តែឈ្មោះ ចន ដុន បានប្រគល់ប្រាក់ឲ្យចំនួន៦ម៉ឺនរៀលសិន ដោយសុំជំពាក់៤ម៉ឺនរៀលទៀត បន្ទាប់ពីតាមឃ្លាំមើលដឹងច្បាស់បែបនេះទើបកម្លាំងសមត្ថកិច្ចខាងលើធ្វើការចាប់ខ្លួនបានទាំង២នាក់ រីឯអ្នកទិញដើម្បីលក់ចែកចាយបន្តគេចខ្លួនបាត់ស្រមោល ។
ក្រោយពេលចាប់ខ្លួននគរបាលដកហូតបានប័ណ្ណសម្រាប់ចាក់វ៉ាក់សាំងចំនួន១០ច្បាប់ រួចបាននាំខ្លួនពួកនាងទាំង២នាក់ទៅធ្វើការសាកសួរនៅប៉ុស្តិ៍មួយជំហ៊ាន ទើបបញ្ជូនទៅកាន់ផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីសាកសួរ និងកសាងសំណុំរឿងបញ្ជូនបន្តទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ