លោកចូសេ ម៉ូរីនញ៉ូ គ្រូបង្វឹកជនជាតិព័រទុយហ្គាល់ របស់ក្លិប Chelsea អាចត្រូវសមាគមបាល់ទាត់អង់គ្លេស(FA)ពិន័យមិនឱ្យចូលទីលានប្រកួតចំនួន៥លើក ក្រោយពីបង្ហាញកាយវិការមិនសមរម្យក្នុងការប្រកួតប្រឺមីញេលីកអង់គ្លេស ដែលក្លិប Chelsea ចាញ់ក្លិប West Utam 1-2 នៅលើទឹកដី «អាប់តុនផាក» កាលពីថ្ងៃទី២៤ តុលា កន្លងទៅ ។ ការចោទប្រកាន់របស់ FA បានកើតឡើងក្រោយការសើុបអង្កេតបញ្ជាក់ថា ទង្វើរបស់គ្រូបង្វឹកChelsea រូបនេះបង្ហាញពីការមិនពេញចិត្ត បាត់ភាពម្ចាស់ការលើការគ្រប់គ្រងកីឡាករជាហេតុធ្វើឱ្យក្លិបត្រូវទទួលការពិន័យដោយស្វ័យប្រវត្តិចំនួន២៥.០០០ផោន ព្រោះមានកីឡាករចំនួន៧រូបបានទទួលកាតលឿង ។
កាលពីមុននេះមានរបាយការណ៍បញ្ជាក់ថា ក្លិប«តោខៀវ»Chelsea កំពុងស្វែងរកគ្រូបង្វឹកថ្មីជំនួសលោក ចូសេ ម៉ូរីនញ៉ូ ដោយសម្លឹងឃើញលោកការ៉ូល អាន់សេឡុតទី ឬលោកហ្គូស ហ៊ីដឌីង ដឹកនាំក្លិបជំនួសក្នុងរយៈពេលខ្លី តែជាចុងក្រោយប្រធានក្លិបបានផ្ដល់ឱកាសដល់លោកម៉ូរីនញ៉ូចំនួន២ប្រកួត ដោយចាប់ផ្ដើមពីការប្រកួត Capital One Cup ជុំទី៤ ត្រូវទៅសួរសុខទុក្ខក្លិប Stoke City ក្នុងថ្ងៃទី២៧ តុលា និងការប្រកួតបើកទ្វារទទួលភ្ញៀវក្លិប Liverpool នៅថ្ងៃទី៣១ តុលា ខាងមុខ។ ប្រសិនបើ២ប្រកួតខាងលើគ្មានលទ្ធផលល្អលោកមូ៉រីនញ៉ូ នឹងបាត់មុខពីក្លិបជាក់ជាមិនខាន ៕
ចែករំលែកព័តមាននេះ