រាជធានីភ្នំពេញ ៖ ផឹកស៊ីស្រវឹងស្រាយគំនុំចាស់កាប់រងរបួសធ្ងន់សន្លប់ស្តូកស្តឹងម្នាក់ សមត្ថកិច្ចចុះទៅដល់ចាប់បានជនដៃដល់ម្នាក់វាយខ្នោះ ហើយឲ្យបក្សពួករបស់គេយកខោជើងវែងមកស្លៀកឲ្យ ស្រាប់តែជនបង្កលួចរត់គេចខ្លួនទាំងដៃជាប់ខ្នោះបាត់ស្រមោល កាលពីវេលាម៉ោង១០និង៤៥នាទីយប់ថ្ងៃទី២៦ តុលា តាមបណ្តោយផ្លូវលំនៅចំណុចជិតវត្តនាគវន្ត សង្កាត់ផ្សារដេប៉ូទី៣ខណ្ឌទួលគោក ។
សាក្សីនៅកន្លែងកើតហេតុ បានឱ្យដឹងថា ជនបង្កនិងជនរងគ្រោះសុទ្ធតែជាកម្មករសំណង់ដូចគ្នា ស្នាក់នៅក្នុងការដ្ឋានសំណង់កន្លែងកើតហេតុ មុនពេលកើតហេតុ គេឃើញជនបង្កមានគ្នា៣ទៅ៤នាក់នាំគ្នាអង្គុយផឹកស៊ីនៅចំណុចកើតហេតុ តែជនរងគ្រោះមិនបានផឹកស៊ីជាមួយនោះទេ ដោយដេកនៅក្បែរជនបង្កដែលកំពុងផឹកស៊ី លុះពេលជនបង្កផឹកស្រវឹងហើយនឹកឃើញរឿងគំនុំចាស់ជាមួយជនរងគ្រោះក៏បានឈ្លោះប្រកែកជាមួយជនរងគ្រោះតាំងពីម៉ោងជិត១០យប់រហូតដល់ម៉ោងកើតហេតុជនបង្កបានស្ទុះយកកាំបិតកាប់ប្រហារទៅលើជនរងគ្រោះចំក្បាលនិងដើមទ្រូង បណ្តោយឱ្យរងរបួសធ្ងន់សន្លប់ស្តូកស្តឹង បានអ្នកឃើញហេតុការណ៍រុំនឹងកន្ទេលសែងយកដាក់នៅចិញ្ចើមផ្លូវ ចំណែកជនបង្កក៏ទៅដេកនៅក្នុងការដ្ឋានដដែល ។
ក្រោយពេលកើតហេតុ សមត្ថកិច្ចចុះទៅដល់បានឃាត់ខ្លួនជនដៃដល់បានម្នាក់ដែលកំពុងដេកស្លៀកខោលីអូដាក់ខ្នោះរួចហើយឲ្យបក្សពួករបស់គេយកខោជើងវែងមកស្លៀកឲ្យ ស្រាប់តែជនបង្កលួចរត់គេចខ្លួនបាត់ទាំងដៃជាប់ខ្នោះ ចំណែកជនរងគ្រោះបានបញ្ជូនទៅព្យាបាលនៅមន្ទីរពេទ្យកាល់ម៉ែត ៕
ចែករំលែកព័តមាននេះ