រាជធានីភ្នំពេញ ៖ នៅព្រឹកថ្ងៃទី១០ ខែឧសភា ឆ្នាំ២០២១ នៅបញ្ជាការដ្ឋានកងរាជអាវុធហត្ថលើផ្ទៃប្រទេស បានយកសំណាក ធ្វើតេស្តរកមេរោគកូវីដ-១៩ ពីលោកនាយឧត្តមសេនីយ៍ សៅ…
រាជធានីភ្នំពេញ ៖ នៅព្រឹកថ្ងៃទី១០ ខែឧសភា ឆ្នាំ២០២១ នៅបញ្ជាការដ្ឋានកងរាជអាវុធហត្ថលើផ្ទៃប្រទេស បានយកសំណាក ធ្វើតេស្តរកមេរោគកូវីដ-១៩ ពីលោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងលោក-លោកស្រី ឧត្តមសេនីយ៍ មេបញ្ជាការរង ព្រមទាំងនាយទាហាន នាយទាហានរង នៃកងរាជអាវុធហត្ថលើផ្ទៃប្រទេសទាំងអស់ ។
បើតាមលោកនាយឧត្តមសេនីយ៍ សៅ សុខា បានអោយដឹងថា ការយកសំណាកធ្វើតេស្តរកមេរោគកូវីដ-១៩ គឺដើម្បីបង្ការ ឫទប់ស្កាត់ទុកមុន ដោយហេតុថា កងកម្លាំងអាវុធហត្ថ បានធ្វើការផ្លាស់ប្តូរ និងចែកវេនគ្នា ក្នុងតំបន់បិទខ្ទប់ ហើយតំបន់ធំបង្រួមទៅជាតំបន់តូចនៅតំបន់ក្រហម តំបន់លឿងទុំ និងតំបន់លឿង គឺកម្លាំងអាវុធហត្ថ ក៏បន្ថយតាមនឹងដែរ ទៅតាមទំហំប្រតិបត្តិការ ។
នាយឧត្តមសេនីយ៍ សៅ សុខា បានលើកឡើងថា ទោះបីជាកងកម្លាំងអាវុធហត្ថ បានចាក់វ៉ាក់សាំងហើយក្តី ក៏យើងត្រូវត្រួតធ្វើតេស្តសំណាកដើម្បីឲ្យប្រាកដថា កម្លាំងអាវុធហត្ថទាំងអស់ តើមានអ្នកផ្ទុកមេរោគកូវីដ-១៩ ឬទេ ?
លោកបានបន្តទៀតថា ការធ្វើតេស្តរកកូវីដ-១៩ នៅថ្ងៃចន្ទនេះ គឺចាប់ផ្តើមធ្វើពីបញ្ជាការដ្ឋានកងរាជអាវុធលើផ្ទៃប្រទេសដំបូងគេ ហើយនឹងធ្វើជាបន្តបន្ទាប់នៅទូទាំងប្រទេស ។ ចាប់ផ្តើមមុនគេបំផុត គឺខ្ញុំតែម្តង បន្ទាប់មកគឺមានលោក-លោកស្រី ឧត្តមសេនីយ៍ មេបញ្ជាការរង ព្រមទាំងនាយទាហាន នាយទាហានរង ដែលចុះប្រតិបត្តិការនៅតំបន់ប្រឈមមួយចំនួន ក៏ត្រូវយកមកធ្វើតេស្តមុនដែរ ។
គួរបញ្ជាក់ដែរថា គិតត្រឹមល្ងាចថ្ងៃដដែលនេះ តាមរយៈការធ្វើតេស្តលឿន លទ្ធផលទាំងអស់បានបង្ហាញថា មិនទាន់រកឃើញករណី វិជ្ជមានកូវីដ-១៩ លើមន្ត្រីកងរាជអាវុធហត្ថណាម្នាក់នៅឡើយទេ ប្រសិនបើធ្វើតេស្តសំណាករកឃើញថា វិជ្ជមាន គឺនឹងបញ្ជូនទៅព្យាបាលនៅបញ្ជាការដ្ឋាន កងរាជអាវុធហត្ថ ៕
ចែករំលែកព័តមាននេះ