កែប៖ វត្ថុបូរាណតម្លៃជាង ៤០ម៉ឺនដុល្លារ ត្រូវបានអ្នកនេសាទម្នាក់ បានអូសមងជាប់នៅក្នុងសមុទ្រ។ ក្រោយមក ក៏មានមន្ត្រីខាងខេត្តកែប បានយកទៅរក្សាទុក។ តែក្រោយមក ក៏បាត់ដំណឹង។…
កែប៖ វត្ថុបូរាណតម្លៃជាង ៤០ម៉ឺនដុល្លារ ត្រូវបានអ្នកនេសាទម្នាក់ បានអូសមងជាប់នៅក្នុងសមុទ្រ។ ក្រោយមក ក៏មានមន្ត្រីខាងខេត្តកែប បានយកទៅរក្សាទុក។ តែក្រោយមក ក៏បាត់ដំណឹង។ ខាងប្រធានមន្ទីរវប្បធម៌ និងវិចិត្រសិល្បៈ អះអាងថា នឹងស្រាវជ្រាវរឿងនេះ ឡើងវិញ។
រូបសំណាកគ្រុឌនោះ ត្រូវអ្នកនេសាទអូសមង ជាប់ នៅសមុទ្រខេត្តព្រះសីហនុ ក្នុងខែមេសា ឆ្នាំ២០២១។ អ្នកនេសាទ ដែលអូសមង បានរូបសំណាកពីក្នុងសមុទ្រនោះ ឈ្មោះ កាន់ ថា ភេទប្រុស អាយុ ៣៧ឆ្នាំ និងប្រពន្ធឈ្មោះ សេង ស៊ីថា អាយុ ២៧ឆ្នាំ នៅភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត។
ទាំងពីរនាក់ប្ដីប្រពន្ធ បានយកវត្ថុបូរាណគ្រុឌ មកដល់ផ្ទះ តែដោយសារតែដំណឹងនេះ លិចឮដល់អាជ្ញាធរខេត្តកែប។ អាជ្ញាធរ ក៏បានចុះមកដល់ផ្ទះអ្នកនេសាទ ដែលអូសបានសំណាកគ្រុឌនោះ។
ដំបូងគេ បានឃើញលិខិតកិច្ចសន្យាទាំងពីរនាក់ប្ដីប្រពន្ធ គឺរក្សាទុកវត្ថុបូរាណនេះ នៅផ្ទះ មិនអោយបាត់បង់ទៅណាទេ តែក្រោយមក អាជ្ញាធរបានទាមទារយកវត្ថុបូរាណរូបសំណាកគ្រុននោះ ទុកនៅខេត្តកែប។
ទោះជាបែបណា អ្នកយកព័ត៌មាន បានស្វែងរកឈ្មោះ កាន់ ថា ដើម្បីបំភ្លឺព័ត៌មានរឿងវត្ថុបូរាណនេះ អោយកាន់តែលម្អិតថែម។ ប៉ុន្តែឈ្មោះ កាន់ ថា ត្រូវបានគេអះអាងថា បានវិលត្រឡប់ទៅខេត្តព្រះសីហនុវិញហើយ។
រីឯលោកមេភូមិ កំពង់ត្នោត ក៏បាននិយាយថា អាជ្ញាធរខេត្តកែប បានយកវត្ថុបូរាណនោះ ទៅរក្សាទុកនៅខេត្តកែបហើយ។
ចំណែកស្ត្រីម្នាក់ ត្រូវជាសាច់ញាតិរបស់ឈ្មោះ កាន់ ថា បាននិយាយថា អាជ្ញាធរខេត្តកែប បានដកហូតរូបសំណាកគ្រុឌនោះ យកទៅទុកហើយ។ អាជ្ញាធរ គួរណាស់តែឧបត្ថម្ភអ្វីមួយ លើកទឹកចិត្តដល់អ្នករើសបានពីសមុទ្រ ដោយមិនគួរយកទៅ ដោយមិនមានអ្វីតបស្នងដល់អ្នករើសបានបែបនេះទេ។
លោក គង់ ផល្លា ប្រធានមន្ទីរវប្បធម៌ និងវិចិត្រសិល្បៈខេត្តកំពត កាលពីព្រឹកថ្ងៃទី៩ ខែឧសភា ឆ្នាំ២០២១ បានទាក់ទង និងសួរនាំរឿងវត្ថុបូរាណនោះដែរ ដែលអាជ្ញាធរខេត្តកែប បានដកហូតទុកជាបណ្ដោះអាសន្នសិន។ នេះបើយោងតាមកំណត់ហេតុ ចុះថ្ងៃទី១៦ ខែមេសា ឆ្នាំ២០២១ ព្រោះវត្ថុបូរាណរូបសំណាកគ្រុឌនោះ មានទម្ងន់ជិត ៥គីឡូក្រាម។
លោក តុង ភោ ប្រធានមន្ទីរវប្បធម៌ និងវិចិត្រសិល្បៈខេត្តកែប កាលពីព្រឹកថ្ងៃទី១០ ខែឧសភា ឆ្នាំ២០២១ នេះ បានប្រាប់អ្នកយកព័ត៌មាន កោះសន្តិភាពថា ខាងមន្ទីរវប្បធម៌ និងវិចិត្រសិល្បៈខេត្តកែប មិនបានដឹងទេ រឿងវត្ថុបូរាណ ថាខាងកែប អ្នកយកមកទុកនោះ។
លោក តុង ភោ ប្រធានមន្ទីរនិយាយថា ខាងមន្ទីរ ទើបតែបានដឹង កាលពីថ្ងៃទី៨ ខែឧសភា។ រូបលោក ក៏ដូចក្រុមការងារកំពុងស្រាវជ្រាវរឿងនេះ និងបញ្ជូនដំណឹងនេះ ទៅក្រសួង។
ប៉ូសិលម្នាក់ នៅស្នងការដ្ឋានខេត្តកែប ហើយសុំមិនបញ្ចេញឈ្មោះ បានអះអាងថា វត្ថុបូរាណនោះ គេហ៊ានអោយតម្លៃជាង ៤០ម៉ឺនដុល្លារ៕ កែវ ឆាត
ចែករំលែកព័តមាននេះ