បន្ទាយមានជ័យ៖ អភិបាលខេត្តបន្ទាយមានជ័យ លោក អ៊ុំ រាត្រី បានដឹកនាំមន្ត្រីជំនាញ បើកយុទ្ធនាការបាញ់ថ្នាំសម្លាប់មេរោគ រយៈពេល ៣ថ្ងៃ នៅស្រុកក្រុងចំនួន ៣ ដែលជាតំបន់ឆ្លងកូវីដ១៩ ក្នុងសហគមន៍។ យុទ្ធនាការនេះ ធ្វើឡើង ដើម្បីបង្ការ និងទប់ស្កាត់ការរីករាលដាលជំងឺកូវីដ១៩ ក្នុងខេត្តបន្ទាយមានជ័យ។
លោក អ៊ុំ រាត្រី បានអោយដឹងថា ជាការណែនាំពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងវិធានការក្រសួងសុខាភិបាល រដ្ឋបាលសាលាខេត្តបន្ទាយមានជ័យ បានបើកយុទ្ធនាការបាញ់ថ្នាំសម្លាប់មេរោគ តាមដងផ្លូវ និងទីតាំងតំបន់ប្រឈមរយៈពេល ៣ថ្ងៃ កាលពីថ្ងៃទី០៧ ខែឧសភា ឆ្នាំ២០២១ ដោយបានចុះបាញ់ថ្នាំសម្លាប់មេរោគ តាមដងផ្លូវ ក្នុងតំបន់នានា ក្នុងក្រុងប៉ោយប៉ែត រយៈពេល ១ថ្ងៃពេញ។ នៅថ្ងៃទី០៨ ខែឧសភា ឆ្នាំ២០២១ បានចុះបាញ់តាមដងផ្លូវជាតិលេខ៥ និងផ្លូវលំមួយចំនួន ក្នុងទីប្រជុំជនក្រុងសិរីសោភ័ណ។ ថ្ងៃទី០៩ ខែឧសភា ឆ្នាំ២០២១ បានដឹកនាំក្រុមការងារ ចុះបាញ់ថ្នាំ តាមដងផ្លូវ ក្នុងប្រជុំជនមុខផ្សារស្រុកម៉ាឡៃ។
លោកអភិបាលខេត្ត បានបញ្ជាក់ថា យុទ្ធនាការបាញ់ថ្នាំសម្លាប់មេរោគរយៈពេល ៣ថ្ងៃ នៅ ៣ស្រុកក្រុង ក្នុងខេត្តបន្ទាយមានជ័យនេះ គឺបាញ់លើតំបន់ ដែលប្រឈម និងដែលបានរកឃើញអ្នកវិជ្ជមានកូវីដ១៩ ដែលកំពុងឆ្លងរីករាលដាល ក្នុងសហគមន៍។
លោក អ៊ុំ រាត្រី បានបញ្ជាក់ថា យុទ្ធនាការបាញ់ថ្នាំសម្លាប់មេរោគ និងបង្ការទប់ស្កាត់កូវីដ១៩ គឺសុំអោយបងប្អូនប្រជាពលរដ្ឋ ត្រូវចូលប្រយុទ្ធប្រឆាំងជំងឺកូវីដ១៩ ដោយត្រូវទប់ស្កាត់អោយបាន និងការពាររីករាលដាលក្នុងសហគមន៍ ដោយត្រូវចូលរួមអនុវត្តវិធានការបង្ការទប់ស្កាត់កូវីដ១៩ តាមរយៈ «៣ការពារ និង៣កុំ»៕ ប៊ុន ធឿន
ចែករំលែកព័តមាននេះ