ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ក្រុងប៉ោយប៉ែត មានករណីបុរសម្នាក់ដែលមានវិជ្ជមានកូវីដ១៩ ត្រូវបានស្លា.ប់ ហើយក្រុមគ្រូពេទ្យកំពុងតែស្រាវជ្រាវស្វែងរកអ្នកដែលប៉ះពាល់ដោយ និងប្រយោល ដើម្បីយកសំណាកទៅធ្វើតេស្តរកមេរោគវីរុសកូវីដ។ នេះជាការជូនដំណឹងជាសាធារណៈដោយរដ្ឋបាលក្រុងប៉ោយប៉ែត នៅថ្ងៃទី១០ ខែឧសភា ឆ្នាំ២០២១នេះ។
លោក គាត ហ៊ុល អភិបាលក្រុងប៉ោយប៉ែត បានប្រាប់ថា រដ្ឋបាលសាលាក្រុងប៉ោយប៉ែត បានចេញសេចក្តីជូនដំណឹងស្តីពីការទទួលមរណភាពរបស់អ្នកវិជ្ជមានកូវីដ១៩ម្នាក់ មានឈ្មោះ សួ ស៊ីនួន ភេទប្រុស អាយុ៥០ឆ្នាំ (មុខរបរជាអាជីវករ) រស់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត នៅវេលាម៉ោង១និង៣០នាទីយប់ ថ្ងៃទី១០ ខែឧសភា ឆ្នាំ២០២១ នៅក្នុងមន្ទីពេទ្យ។
លោកបានបញ្ជាក់ថា ឈ្មោះ សួ ស៊ីនួន (មុខរបរជាអាជីវករក្រុងប៉ោយប៉ែត) មានអាការៈក្តៅខ្លួន អស់កម្លាំង ហើយក៏បានចូលទៅសម្រាកព្យាបាលនៅបន្ទប់ពិគ្រោះជំងឺ «ឡុង សុធីរៈ» ដោយអ្នកជំងឺបានដាក់សេរ៉ូម ចាក់ថ្នាំ កាលពីថ្ងៃទី០៦ ខែឧសភា ឆ្នាំ២០២១ នៅជាប់របងសាលាវិទ្យាល័យគន្ធាហូមហ្វ្រេន ស្ថិតភូមិ-សង្កាត់ផ្សារកណ្តាល ក្រុងប៉ោយប៉ែត លុះយប់ឡើងបានធូរស្រាលបន្តិច អ្នកជំងឺក៏បានទៅសំរាកនៅផ្ទះវិញ ។
លោកបានបញ្ជាក់ទៀតថា លុះដល់ថ្ងៃទី០៨ ខែឧសភា ឆ្នាំ២០២១ អ្នកជំងឺនៅតែអស់កម្លាំងខ្លាំងដដែល ដោយអាការៈមិនស្រួល អ្នកជំងឺក៏បានមកសម្រាកព្យាបាលនៅបន្ទប់ពិគ្រោះជំងឺ «សំ សើរ» ទីតាំងទល់មុខនឹងមន្ទីរពេទ្យបង្អែកក្រុងប៉ោយប៉ែត ដោយដាក់សេរ៉ូមអស់កន្លះកំប្លោក ក៏ស្រាប់តែមានអាការៈដង្ហក់ខ្លាំងតែម្តង ហើយគ្រូពេទ្យក៏បានណែនាំឱ្យអ្នកជំងឺទៅមន្ទីរពេទ្យបង្អែកក្រុងប៉ោយប៉ែត។
អភិបាលក្រុងប៉ោយប៉ែតបានបញ្ជាក់បន្តថា លុះទៅដល់ ក្រុមគ្រូពេទ្យក៏យកសំណាកអ្នកជំងឺទៅធ្វើតេស្តរកមេរោគកូវីដ១៩ ជាលទ្ធផលជនរងគ្រោះគឹមានវិជ្ជមានកូវីដ១៩ ហើយក៏បានសម្រាកព្យាបាល១យប់នៅមន្ទីរពេទ្យបង្អែកក្រុងប៉ោយប៉ែត ក្រោយមកក៏បានបញ្ជូនទៅព្យាបាលនៅមន្ទីរពេទ្យមិត្តភាពកម្ពុជា-ជប៉ុនមង្គលបូរីវិញ លុះដល់វេលាម៉ោង១និង៣០នាទីយប់ ថ្ងៃទី១០ ខែឧសភា ឆ្នាំ២០២១ អ្នកជំងឺដែលឆ្លងកូវីដ១៩ ឈ្មោះ សួ ស៊ីនួន ក៏បានស្លា.ប់បាត់បង់ជីវិតតែម្តង។
លោក គាត ហ៊ុល បានបញ្ជាក់ថា ក្រោយពីអ្នកវិជ្ជមានកូវីដ១៩ ឈ្មោះ សួ ស៊ីនួន បានស្លា.ប់ដោយសារជំងឺកូវីដ១៩ រដ្ឋបាលសាលាក្រុងប៉ោយប៉ែត បានចេញសេចក្តីជូនដំណឹងដល់អ្នកដែលស្និទ្ធស្នាល និងធ្លាប់ប៉ះពាល់ជាមួយអ្នកជំងឺកូវីដ១៩ខាងលើ សូមរួសរាន់មកយកសំណាកទៅពិនិត្យ និងធ្វើចត្តាឡីស័ក ។ ចំពោះអ្នកប៉ះពាល់ដោយប្រយោលវិញ សូមធ្វើចត្តាឡីស័កនៅតាមផ្ទះរៀងៗខ្លួន ហើយបើមានអាការៈមិនស្រួល សូមប្រញាប់រួសរាន់ទៅយកសំណាកធ្វើតេស្ត នៅស្ថានីយរថភ្លើងប៉ោយប៉ែត មណ្ឌលសំចតប៉ោយប៉ែត និងមន្ទីរពេទ្យបង្អែកប៉ោយប៉ែត៕
ចែករំលែកព័តមាននេះ