រាជធានីភ្នពេញ ៖ បុរសម្នាក់បានរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះភ្លាមៗបន្ទាប់ពីបានជិះម៉ូតូបុកគូទរថយន្តប្រភេទដឹកទំនិញម៉ាកហ៊ីយ៉ាន់ដាយដែលចតនៅតាមបណ្ដោយផ្លូវវេងស្រេង ស្ថិតក្នុងសង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង៩ និង១០នាទីយប់ ថ្ងៃទី២៦ តុលា ២០១៥ ។
ប្រភពពីសាច់ញាតិបានឲ្យដឹងថា ជនរងគ្រោះឈ្មោះ ភក្តិ ភេទប្រុស អាយុជាង៣០ឆ្នាំ ស្នាក់នៅម្តុំលូ៥ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុ បុរសម្នាក់សង្ស័យស្រវឹងស្រាបើកម៉ូតូម៉ាកអ៊ែរប្លេក ផលិតនៅប្រទេសវៀតណាម ពណ៌ខ្មៅ ពាក់ស្លាកលេខ ភ្នំពេញ 1AA-791 តាមបណ្តោយផ្លូវវេងស្រេងក្នុងទិសដៅពីកើតទៅលិចយ៉ាងលឿន ខណៈដល់កន្លែងកើតហេតុស្រាប់តែបុកគូទរថយន្តធុនធំដឹកទំនិញម៉ាកហ៊ីយ៉ាន់ដាយ១គ្រឿងពណ៌បៃតង ពាក់ស្លាកលេខ ភ្នំពេញ 3C-0864 ដែលចតស្ងៀមយ៉ាងពេញទំហឹង បណ្តាលឲ្យរងរបួសធ្ងន់ ហើយត្រូវរថយន្តសាមុយដឹកយកទៅសង្គ្រោះភ្លាមៗ ។
ក្រោយពេលកើតហេតុ សមត្ថកិច្ចបានធ្វើការវាស់វែង និងយកទាំងរថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីដោះស្រាយគ្នានៅពេលក្រោយ ៕
ចែករំលែកព័តមាននេះ