រដ្ឋបាលខេត្តប៉ៃលិន បានចេញសេចក្តីប្រកាសព័ត៌មាន សូមជម្រាបជូនដល់សាធារណជន និងប្រជាពលរដ្ឋ ដែលរស់នៅក្នុងខេត្តប៉ៃលិនថា ៖ បានរកឃើញជំងឺកូវីដ-១៩ លើបុរសម្នាក់ឈ្មោះ
ខេត្តប៉ៃលិន ៖ រដ្ឋបាលខេត្តប៉ៃលិន បានចេញសេចក្តីប្រកាសព័ត៌មាន លេខ០១ ចុះនៅថ្ងៃសៅរ៍ ទី០៨ ខែឧសភា ឆ្នាំ២០២១ ដោយសូមជម្រាបជូនដល់សាធារណជន និងប្រជាពលរដ្ឋ ដែលរស់នៅក្នុងខេត្តប៉ៃលិនថា ៖ បានរកឃើញជំងឺកូវីដ-១៩ លើបុរសម្នាក់ ឈ្មោះ វ៉ន សីហា ភេទប្រុស អាយុ២៨ឆ្នាំ ជនជាតិ ខ្មែរ មានអាសយដ្ឋានបច្ចុប្បន្ននៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ មុខរបរជាអ្នកបើកបររថយន្តឱ្យក្រុមហ៊ុនដឹកទុយោ (UPG) ព្រែកព្នៅ ។
សេចក្តីប្រកាសព័ត៌មានក្នុងលិខិតបានបញ្ជាក់ថា ៖ នៅថ្ងៃទី០៨ ខែឧសភា ឆ្នាំ២០២១ វេលាម៉ោង២និង៣០នាទីទៀបភ្លឺ បុរសឈ្មោះ វ៉ន សីហា រូបនេះ បានចេញដំណើរពីរាជធានីភ្នំពេញ សំដៅមកខេត្តប៉ៃលិន ។ ក្នុងការធ្វើដំណើរ បុរសខាងលើបានឈប់នៅខេត្តពោធិ៍សាត់ វេលាម៉ោង៧និង៣៥នាទីព្រឹក ដើម្បីពិសារអាហារពេលព្រឹក នៅហាងឈ្មោះ អាលីន ។
សេចក្តីប្រកាសព័ត៌មានក្នុងលិខិតបានបញ្ជាក់បន្តថា លុះវេលាម៉ោង៨និង១៥នាទីព្រឹក បានបន្តចេញពីខេត្តពោធិ៍សាត់ លុះពេលមកដល់ព្រំប្រទល់ខេត្តបាត់ដំបង-ប៉ៃលិន វេលាម៉ោង១១និង៤៨នាទីព្រឹក ក្រុមឆ្លើយតបបន្ទាន់ពីមន្ទីរសុខាភិបាលខេត្ត នៃរដ្ឋបាលខេត្តប៉ៃលិន ប្រចាំការនៅប៉ុស្តិ៍ត្រួតពិនិត្យ សុខភាពព្រំប្រទល់ខេត្តប៉ៃលិន-បាត់ដំបង បានធ្វើតេស្តរហ័សចំនួន២លើក ក៏រកឃើញថា វិជ្ជមានជំងឺកូវីដ-១៩ ទាំង២លើក ហើយត្រូវបានបញ្ជូនវត្ថុសំណាកទៅធ្វើតេស្តនៅមន្ទីរពិសោធន៍ខេត្តបាត់ដំបង បន្តលទ្ធផលគឺវិជ្ជមានដដែល ។
សេចក្តីប្រកាសព័ត៌មានក្នុងលិខិតបានបញ្ជាក់ថា ក្នុងនោះដែរ អ្នករួមដំណើរជាមួយនឹងបុរសខាងលើ ក៏មានធ្វើតេស្តរហ័ស លទ្ធផល គឺអវិជ្ជមាន ។ សូមបញ្ជាក់ថា បុរសខាងលើ មិនទាន់បានឆ្លងចូលមកក្នុងទឹកដីខេត្តប៉ៃលិននៅឡើយទេ ដូច្នេះបុរសរូបនេះ មិនទាន់មានការប្រាស្រ័យទាក់ទងជាមួយប្រជាពលរដ្ឋនៅក្នុងខេត្តប៉ៃលិនដែរ ។
រដ្ឋបាលខេត្តប៉ៃលិន ក៏សូមអំពាវនាវដល់សាធារណជន និងប្រជាពលរដ្ឋ ដែលធ្លាប់មានការប្រាស្រ័យទាក់ទងផ្ទាល់ ឬប្រយោល ជាពិសេសអ្នកដែលមានអាសយដ្ឋានស្នាក់នៅជាមួយបុរសខាងលើ សូមតាមដានសុខភាព និងត្រូវយកវត្ថុសំណាកទៅពិនិត្យនៅមន្ទីរសុខាភិបាល ឬមន្ទីរពេទ្យខេត្ត ឬមណ្ឌលសុខភាព ដែលនៅជិតបំផុត រៀងរាល់ម៉ោងធ្វើការ (រួមទាំងថ្ងៃឈប់សម្រាកផង) ។
អាស្រ័យ ដូចបានជម្រាបជូនខាងលើ សូមសាធារណជន និងប្រជាពលរដ្ឋជ្រាបជាព័ត៌មាន និងចូលរួមអនុវត្តឱ្យបានខ្ជាប់ខ្ជួននូវវិធានការ «៣ការពារ ៣កុំ» របស់សម្តេចតេជោ ហ៊ុន សែន នា យករដ្ឋមន្ត្រីនៃព្រះរាជាណាចក្រកម្ពុជា ឱ្យមានប្រសិទ្ធភាពខ្ពស់ ៕
ចែករំលែកព័តមាននេះ